1 Taarike 22 - ጌሻ ማፃፋ

¹ ሄሳፈ ጉየ፥ ዳዊቲ፥ “ጎዳ ፆሳ ኬይነ እስራኤለ አሳይ ፁሳ ያርሾ በሳይ ሀይሳን ግዳና” ያግስ።

ፆሳ ኬ ኬፃናዉ ጊገተ

² ዳዊቲ እስራኤለ ቢታን ደእያ በተ አሳታ ሺሻና መላ ኪትስ። ፆሳ ኬ ኬፃናዉ ሹቹ ማሰይሳት ማስድ ሎይና መላ ኤንታ ግዶፈ ዶርስ።

³ ዳዊቲ፥ ድርሳ ፐንግያ ጊግሳናዉ ምስማረነ ማፃፈ ቆፃናዉ ዳሮ ብራታነ ዛው ባይና ናሰ ብራታ ጊግስስ።

⁴ ስዶናነ ፅሮሳ አሳት ዳዊታስ ዝጋ ኤህያ ግሾ ዳዊቲ፥ ታይቦይ ባይና ዝጋ ጊግስስ።

⁵ ዳዊቲ፥ “ታ ናአይ ሶሎሞነይ ዮጋነ ኤራተን ሎህቤና። ጎዳስ ኬፀትያ ኬይ ቢታ ኡባን ኤረትዳነ ቦንቸትዳ ሎኦ ኬ ግዳናዉ በሴስ። ሄሳ ግሾ፥ እያዉ ኮሽያባ ታኒ ጊግሳና” ያግስ። ዳዊቲ ሀይቃናፐ ስን ዳሮባ ጊግስድ ዎስ።

⁶ ሄሳፈ ጉየ፥ ዳዊቲ ባ ናኣ ሶሎሞነ ፄግድ፥ ጎዳስ እስራኤለ ፆሳስ ኬ ኬፃና መላ ኪትስ።

⁷ ዳዊቲ ሶሎሞነኮ፥ “ታ ናአዉ፥ ታኒ ጎዳ ታ ፆሳ ሱንስ ኬ ኬፃናዉ ታ ዎዛናን ቆፓስ።

⁸ ግዶሽን፥ ጎዳ ቃላይ፥ ‘ኔኒ ዳሮ ሱ ጉሳዳሳ፤ ዳሮ ኦላ ኦለታዳሳ። ኔኒ ሀ ሳኣ ቦላ ታ ስንን ዳሮ ሱ ጉስዳ ግሾ ታ ሱንስ ኬ ኬፃካ።

⁹ ግዶሽን፥ ሳሮነ ሸምፖ ግድዳ ናእ የለታና፤ እያ ዩሹዋን ደእያ ሞርከታፐ ታኒ እያ ሸምፕሳና። እያ ሱንይ ሶሎሞነ፤ ታኒ እያ ካዎተ ላይን እስራኤለ አሳስ ሳሮተነ ዎፓ እማና።

¹⁰ እ ታ ሱንስ ኬ ኬፃና። እ ታ ናአ ግዳና፤ ታኒ እያዉ አዋ ግዳና። እያ አራታ እስራኤለን መርናዉ ምንዳ ኤሳና’ ” ያግስ።

¹¹ “ህዛ ታ ናአዉ፥ ጎዳይ ኔራ ግዶ። ጎዳ ነ ፆሳ ኬ ኬፃና መላ ጎዳይ ካሰ ኦድዳይሳዳ ነና ፖልሶ።

¹² ጎዳይ ነና እስራኤለ አሳ ቦላ ካዎ ኦያ ዎደ፥ ጎዳ ነ ፆሳ ህግያ ናጋና መላ ጎዳይ ነዉ ጭንጫተነ አኬካ እሞ።

¹³ ጎዳይ ሙሰ ባጋራ እስራኤለስ እምዳ ዎጋነ ኪታ ኔኒ ናግኮ ኡባይ ነዉ ሀናና። ምና፤ ያዮፋ፤ ዳጋሞፋ፥ ኡፋይስ ቃንፆፋ!

¹⁴ ታኒ ታዉ ዳንዳኤትዳ መላ ጎዳ ኬ ኬፃናዉ 3,400 ክሎ ግራመ ዎርቃ፥ 34,000 ክሎ ግራመ ብራ፥ ዛው ባይና ናሰነ ብራታ ሺሻስ፤ ሄሳዳካ ምነ ሹቹ ጊግሳስ። ነካ ነ ባጋራ ሄሳ ቦላ ሀራ ጉጃናዉ ኮሼስ።

¹⁵ ነ ማታን ዳሮ ኦሳንቾት ሹቹ ቆኤይሳትነ ማሰይሳት፥ አናፀትነ ኡባ ኦሶ ኦናዉ ዳንዳእያ ሂላንቾት ደኦሶና።

¹⁶ ዎርቃ፥ ብራ፥ ናሰነ ብራታ ኦያ አሳስ ዛው ባዋ። ህዛ ኔኒ ኦሱዋ ዶማ፤ ጎዳይ ኔራ ግዶ” ያግስ።

¹⁷ እስራኤለ ካለይሳት ኡባይ ባ ናኣ ሶሎሞነ ማዳና መላ ዳዊቲ ሀይሳዳ ያግድ ኪትስ፤

¹⁸ “ጎዳይ፥ ህንተ ፆሳይ ሀእ ጋካናዉ ህንተራ ደኤነዬ? እ ህንተና ኡባ ባጋራ ሸምፕስበነዬ? ሀ ቢታን ደእያ አሳ እ ታ ኩሸን አድ እምዳ ግሾ ሀ ቢታይ ጎዳስነ እያ አሳስ ሃረትስ።

¹⁹ ህዛ ጎዳ ህንተ ፆሳ ኮያናዉ ህንተ ዎዛናነ ህንተ ሸምፑዋ እምተ። ጎዳ ሱንስ ኬፀትዳ ኬ ግዶን ጎዳ ጫቆ ታቦትያነ ፆሳ ጌሻ ሚሸታ ኤህድ ዎና መላ ደንድድ ጎዳ ፆሳ ኬ ኬፅተ” ያግስ።