1 Taarike 18 - ጌሻ ማፃፋ

ዳዊታ ፆኖታ

¹ ሄሳፈ ጉየ፥ ዳዊቲ ፍልስፄመታ ፆንድ ሃርስ፤ ጌተ ካታማነ እያ ጉታታ ፍልስፄመታ ኩሸፐ ኤክስ።

² ዳዊቲ ሞአበ አሳ ፆንን፥ ኤንቲ እያዉ ሃረትድ ጊርዶሶና።

³ ሀማታ ካታማ ማታን ደእያ ሱባ ካዎይ አድራዛር፥ ባ ካዎተ ኤፍራፂሳ ሻፋ ጋካናዉ አሳናዉ ብሽን ዳዊቲ እያ ኦልስ።

⁴ ዳዊቲ አድራዛራፐ እስ ሙኩሉ ፓራ ጋረታ፥ ላፑን ሙኩሉ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ፄቱ ጋረታስ ግድያ ፓራታ አሽድ ሀራ ፓራታ ኡባስ ገዳ ፃጱዋ ቃንፅስ።

⁵ ዳማስቆ ካታማን ደእያ ሶረት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ 22,000 አሳ ዎስ።

⁶ ሄሳፈ ጉየ፥ ሶረ ቢታን ዳማስቆ ካታማን ኦላ ሚፃ መስ። ሶረ አሳት ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።

⁷ ዳዊቲ አድራዛራ ኦሳንቾት ቶክዳ ዎርቃ ጎንዳለታ ኤክድ የሩሳላመ ኤፍስ።

⁸ ቃስ ዳዊቲ አድራዛር ሃርያ ፀባሀነ ኩና ካታማታፐ ዳሮ ናሰ ብራታ ኤክስ። ሄሳፈ ጉየ፥ ሶሎሞነይ ሄ ናሰ ብራታፐ ኦሰትዳ ከረታ፥ ቱሳታነ ዱማ ዱማ ሚሸታ ኦስ።

⁹ ዳዊቲ ሱባ ካዋ አድራዛራ ኦላንቾታ ኡባ ፆንዳይሳ ሀማታ ካዎይ ቶይ ስእስ።

¹⁰ ቶይ አድራዛራራ ኦለትሸ ጋምእዳ ግሾ ዳዊቲ አድራዛራ ኦልድ ፆንዳ ግሾ እያ ሀሹ ጋናዉነ ሳሮናዉ ባ ናኣ ሀዶራማ ካዋ ዳዊታኮ ኪትስ። ሀዶራም ዎርቃፈ፥ ብራፐነ ናሰ ብራታፐ ኦሰትዳ ሚሸታ እሞታ ኤክድ ብስ።

¹¹ ካዎይ ዳዊቲ ኤዶመፐ፥ ሞአበፐ፥ አሞነፐ፥ ፍልስፄመታፐነ አማለቃታፐ ድእድ ኤክዳ ብራነ ዎርቃ ሀ ሚሸታራ ጋድ ጎዳስ ዱማይድ ዎስ።

¹² ፃሩያ ናአይ አብስ ኤዶመ አሳፐ 18,000 አሳ፥ ማፅነ ዛንጋራን ዎስ።

¹³ ዳዊቲ ኤዶመን ኦላ ሚፃ መስ፤ ያትን፥ ሄ ቢታ አሳ ኡባይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።

¹⁴ ሄሳዳ ኦድ፥ ዳዊቲ እስራኤለ ኡባ ቦላ ካዎትድ ባ አሳ ኡባ ፅሎተንነ ሱረ ፕርዳን አይስስ።

¹⁵ ፃሩያ ናአይ እዮኣብ ቶራ ሞጮና፤ አህሉዳ ናአይ እዮሳፈፅ ታርከ ፃፈ።

¹⁶ አህፁባ ናአይ ሳዶቅነ አብያታራ ናአይ አብመለከይ ካህነ፤ ሳራይ ዋና ፃፈ።

¹⁷ ዮዳሄ ናአይ ባናይ ዳዊቲ ናግያ አሳ ሀላቃ፤ ዳዊታ አደ ናይት እያ ካዎተን ቃ በሳ ኦይክዳ ሀላቃታ።