1 Taarike 16 - ጌሻ ማፃፋ

¹ ኤንቲ ፆሳ ታቦትያ ኤህድ ዳዊቲ ታቦትያ ዎናዉ ኤስዳ ዱንካንያ ግዶን ዎድ፥ ፁሳ ያርሾነ እስፈተ ያርሾ ፆሳስ ያርሽዶሶና።

² ዳዊቲ ፁሳ ያርሾነ እስፈተ ያርሾ ያርሽድ ፖልዳፐ ጉየ ጎዳ ሱንን አሳ አንጅስ።

³ እስራኤለ አሳ ኡባስ ማጫስነ አደስ፥ ሁጰን ሁጰን እስ ሙመ ኡይ፥ እስ ቃንፆ አሾነ እስ ዎይነ ኑካ ግሽስ።

⁴ ጎዳ ታቦትያ ስንን ኦና መላነ ጎዳ እስራኤለ ፆሳ ሳባና መላ፥ ጋላታና መላነ ቦንቻና መላ ጉ ሌወታ ዳዊቲ ሹምስ።

⁵ ሌወታ ሀላቃይ አሳፋ፤ አሳፋ ካልድ ዛካርያሳ። ዛካርያሳ ካልድ ደኤይ ይኤላ፥ ሻምራሞታ፥ ይኤላ፥ ማትታ፥ ኤልኣባ፥ ባናያነ ኦቤድ-ኤዶመ። ኤንቲ ማስንቆነ ዲ ዲፃናዉ ሹመትዶሶና፤ ሽን አሳፍ ዳላ ግርሳናዉ ሹመትስ።

⁶ ካህነይ ባናይነ ያሀዝኤል ፆሳ ጫቆ ታቦትያ ስንን ኡባ ዎደ ሞይዘ ፑናናዉ ሹመትዶሶና።

⁷ ሄ ጋላስ ዳዊቲ አሳፍነ እያ ዳቦት ጎዳ ሳባና መላ ሀ ማዝሙርያ ኮይሮ ኪትስ።

ጋላታ ማዝሙረ

⁸ ጎዳ ጋላትተ፤ እያ ሱን ፄግተ፤ እያ ኦሱዋ ካዎተታ ግዶን ኦድተ።

⁹ እያ ሳቢተ፤ ጋላታ ማዝሙርያ እያዉ የፅተ፤ ማላልስያ እያ ኦሶ ኡባ ኦድተ።

¹⁰ እያ ጌሻ ሱንን ጬቀትተ፤ ጎዳ ኮየይሳታ ዎዛናይ ኡፋይቶ።

¹¹ ጎዳነ እያ ዎልቃ በእተ፤ ኡባ ዎደ እያ ስን ኮይተ።

^12-13 ህንተኖ፥ እስራኤለ ኮቻቶ፥ ዶረትዳ ያይቆባ ናይቶ፥ እያ ማላታ፥ እ እምዳ ፕርዳነ ማላልስያባታ ሀሳይተ።

¹⁴ እ ጎዳ ኑ ፆሳ፤ እያ ፕርዳይ ቢታ ኡባ ቦላና።

¹⁵ እያ ጫቁዋ መርናዉ ሙኩሉ የለተ ጋካናዉ፥ እያ ቃላ ናግተ።

¹⁶ አብራሃመራ ጫቅዳ ጫቁዋ ናጌስ፤ ይሳቃስ ገልዳ ቃላ ምንስ።

¹⁷ ያይቆባስ ዎጋ፥ እስራኤለስ መርና ጫቁዋ፥ ኦድ ምንስ።

¹⁸ “ታኒ ነዉ ካናነ ቢታ እማና፤ እ ነ ኮቻስ ላታ ግዳና” ያግስ።

¹⁹ ሄስ ህንተ ታይቦን ጉነ ካናነን በተ ግድድ ደእያ ዎደ ሀንስ።

²⁰ እስ ደርያፐ ሀራ ደረ ፕንዶሶና፤ እስ ካዎተፈ ሀራ ካዎተ ዩይዶሶና።

²¹ ፆሳይ ኤንታ ኦንካ ናቃና መላ እምቤና፤ ኤንታ ግሾ ካዎታ ሴርስ።

²² “ታኒ ትይዳይሳታ ቦቾፍተ፤ ታ ናበታ ቆሆፕተ” ያግስ።

²³ ሳአን ደእያ አሳ ኡባይ ጎዳስ የፅተ፤ እያ አሹዋ ጋላስ ጋላስ ኦድተ።

²⁴ ካዎተታ ግዶን እያ ቦንቹዋ፥ ማላልስያ እያ ኦሱዋ አሳ ኡባ ግዶን አዋጅተ።

²⁵ ጎዳይ ግታ፤ አ ጋላታይ እያዉ በሴስ፤ ፆሳታ ኡባፈ አድ ቦንቸታናዉ በሴስ።

²⁶ ሀራ ካዎተታ ፆሳት ኡባይ ኤቃታ፤ ሽን ጎዳይ ሳሎታ መዳ ፆሳ።

²⁷ እያ ስንን ቦንቾይነ ቴም ደኤስ፤ ምኖተነ ኡፋይስ እ ደእያ በሳን ደኤስ።

²⁸ ህንተኖ፥ ቢታ ካዎተቶ፥ ጎዳ ቦንቾነ ዎልቃ እምተ።

²⁹ እያ ሱንስ በሲያ ቦንቾ እምተ፤ ያርሾ ኤክድ እያ ስን ዪተ፤ እያ ጌሻተ ቴማን ጎዳ ጎይንተ።

³⁰ ቢታን ደእያ አሳ ኡባይ እያ ስንን ኮኮርተ፤ ሳአይ ምን ኤቅዳ ግሾ ቃፀና።

³¹ ሳሎት ኡፋይቶ፤ ሳእ ሀሹ ጎ! ካዎተታ ግዶን ኤንቲ “ጎዳይ ካዎትስ!” ያጎ።

³² አባይነ እያ ግዶን ደእያ ኡባይ ጉሞ፤ ጋደይነ እያን ደእያ ካ ኡባይ ኡፋይቶ።

³³ ሄ ዎደ ዎራን ደእያ ም ኡባይ ኡፋይሳን ጎዳ ስንን የፃና። እ ሳኣ ቦላ ፕርዳናዉ ዬስ።

³⁴ ጎዳይ ኬሀ ግድያ ግሾነ እያ ሲቆይ መርናሳ ግድያ ግሾ፥ ጎዳ ጋላትተ።

³⁵ “አቤት ኑና አሽያ ፆሳዉ ኑና አሻ፤ ኑኒ ነ ጌሻ ሱን ጋላታና መላነ ነ ቦንቹዋን ኑ ቦንቸታና መላ፥ ካዎተታ ግዶፈ ሺሻዳ ኑና አሻ” ያግተ።

³⁶ ጎዳይ እስራኤለ ፆሳይ፥ መርናፐ መርና ጋካናዉ ጋላተቶ! አሳ ኡባይ፥ “አምንእ” ግድ፥ ጎዳ ጋላትዶሶና።

³⁷ ጎዳ ጫቆ ታቦትያ ስንን ጋላስ ጋላስ ጎይኖስ ኮሽያባ ኡባ ዎደ ኤንቲ ኦና መላ ዳዊቲ አሳፋነ እያ ዳቦታ ዎስ።

³⁸ ቃስ ኦቤድ-ኤዶመነ ኡሱፑን ታማነ ሆስፑን እያ ዳቦታ ኤንታራ ኦና መላ ዎስ፤ የዱቱና ናኣ ኦቤድ-ኤዶመነ ሆሳ ፐንግያ ናጋና መላ ዎስ።

³⁹ ካህነይ ሳዶቅነ እያራ ኦያ ካህነት ጋባኦናን ደእያ ቃ በሳን፥ ዱንካንያ ስንን ኦና መላ ኤንታ ያን አግስ።

⁴⁰ ጎዳይ እስራኤለስ እምዳ ህግያን ፃፈትዳይሳዳ ኤንቲ ዎንታነ ኦማርስ ኡባ ዎደ ፁሳ ያርሾ ያርሻና መላ ኦስ።

⁴¹ እያ ሲቆይ መርናሳ ግድያ ግሾ ጎዳ ማዝሙረን ጋላታና መላ ሄማና፥ የዱቱናነ ዶረትዳ ሀራታ ዳዊቲ ኤንታራ እስፈ ዎስ።

⁴² ሄማንነ የዱቱን ሞይዘ ፑኖሶና፥ ዳላ ጊርሶሶና ጋላታ ማዝሙረ የፅሸ ካእያ ሀራ ሚሸታ ካኦሶና። የዱቱና አደ ናይት ፐንግያ ናጋናዉ ሹመትዶሶና።

⁴³ ሄሳፈ ጉየ አሳ ኡባይ ባ ሶ ሶ ብስ። ዳዊቲካ ባ ሶ አሳ አንጃናዉ ስምስ።