1 Taarike 12 - ጌሻ ማፃፋ

ዳዊታ ካልዳ ኦላንቾታ

¹ ዳዊቲ ቂሳ ናኣ ሳኦላፐ ባቃትድ ፅቅላጋን ኡትዳ ዎደ እያኮ ይዳ አሳት ሀይሳፈ ካልድ ፃፈትዳይሳታ። ኤንታ ካሰ ዳዊታ ኦላን ማድዳ ምኖ አሳታ ግዶን ደኦሶና።

² ኤንቲ ዶንገን ዱከይሳታ፤ ቃስ ኡሻቻ ኩሸንነ ሀድርሳ ኩሸን ያምባራናዉነ ዶንገ ዱካናዉ ዳንዳኦሶና። ኤንቲ ብንያመ ኮቸ ግድዳ ሳኦላ ኮቻታ።

³ ኤንታ ሀላቃይ አህኤዘራ፤ እያፐ ካልድ እዮኣሳ፤ ኤንቲ ግብአ አድያ ሻማአ ናአ። ሀራት ቃስ አዝማወ ናይታ ግድዳ ይዝኤላነ ፓላፃ፥ ባራካ፥ አናቶተ አድያ እዩ፥

⁴ ሀስታማታ ግዶን ዎልቃማ ግድድ፥ ኤንታ ካለያ ጋባኦና አድያ ይሽማእያ፥ ኤርምያሳ፥ ያሀዝኤላ፥ ዮሃና፥ ገዳራ አድያ ዮዛባታ፥

⁵ ኤሉዛያ፥ ያርሞታ፥ ባላያ፥ ሳማራ፥ ሀርፋ አድያ ሳፋፃ፥

⁶ ቆረ ኮቸ ግድዳ ኤልቃና፥ ይሽያ፥ አዛርኤላ፥ ዮኤዘራነ ያሾብኣማ፥

⁷ ጋዶራ አድያ ይሮሃማ ናይታ ዮኤላነ ዛባዳ።

⁸ ዳዊቲ ባዞን ደእያ ሚፃን ደእሽን፥ ጋደ ኮቻፈ ጉ አሳት እያኮ ይዶሶና። ኤንቲ ምኖነ ኦላስ ጊግዳይሳታ፤ ጎንዳለነ ቶራ ኦይካናዉ ዳንዳኤይሳታ። ኤንታ ሶምኦይ ጋሞ ሶምኦ መላ፤ ኤንቲ ደረ ሁጰራ ጉፕያ ገንኤ መላ ኤሶቶሶና።

⁹ ኤንታ ሀላቃይ ኤፀራ፤ ናምአንይ አብድዩ፤ ሄንይ ኤልኣባ፤

¹⁰ ኦይዳንይ ምስማና፤ እቻሻንይ ኤርምያሳ፤

¹¹ ኡሱፑንይ አታያ፤ ላፑንይ ኤልኤላ፤

¹² ሆስፑንይ ዮሃና፤ ኡዱፉንይ ኤልዛባዳ፤

¹³ ታማንይ ኤርምያሳ፤ ታማነ እሳንይ ማክባናያ።

¹⁴ ሀይሳቲ ጋደ ኮቻ ኦላንቾታስ ሀላቃታ። ኤንታፈ ዝቃይ ማቶ ሀላቃ፤ ቃይ ቃስ ሻላቃ ግድስ።

¹⁵ ዮርዳኖሰ ሻፋይ፥ ጋፃፐ ጋፃ ጋክድ ክፅዳ ኮይሮ አጌናን ፕንዳይሳት ሀይሳታ። ኤንቲ ዛንጋራን ዶሎሀነ ዉሎሀ ባጋን ደእያ አሳ ኡባ የደዶሶና።

¹⁶ ብንያመ ኮቻፈነ ይሁዳ ኮቻፈ ጉ አሳት ዳዊቲ ደእያ ሚፃ ብዶሶና።

¹⁷ ዳዊቲ ኤንታራ ጋሄታናዉ ከይድ፥ “ህንተ ታና ማዳናዉ ሳሮ ታኮ ይዳባ ግድኮ ታ ዎዛናይ ህንተራ ግዳና። ሽን ህንተ ታና ታ ሞርከታስ አድ እማናዉ ይዳባ ግድኮ፥ ህንተና ኤርተ! ታኒ ኦዳ ኢታባይ ባይና ግሾ ኑ አዋታ ፆሳይ ሄሳ በኦ፤ እ ህንተና ፕርዶ!” ያግስ።

¹⁸ ሄሳፈ ጉየ፥ ሀስታማታ ሀላቃ አማሳያ ቦላ ፆሳ አያናይ ዎን፥ “ዳዊታ፥ ኑኒ ነይሳታ! እሰየ ናአዉ፥ ኑኒ ኔራ ደኦስ! ሳሮይ ነዉ ግዶ! ነና ማደይሳታስ ሳሮይ ግዶ! ነ ፆሳይ ነና ማዳና” ያግስ። ዳዊቲ ኤንታ ኤክድ ባ ኦላንቾታስ ሀላቃ ኦስ።

¹⁹ ዳዊቲ ፍልስፄመታራ ግድድ ሳኦላ ኦላናዉ ብዳ ዎደ፥ ምናሰ ኮቻፈ ጉ አሳት ዳዊታራ ጋሄትዶሶና። ሽን ፍልስፄመታ ሀላቃት ዳዊቲነ ዳዊታ አሳይ ባንታራ ቦናዳ ድግዶሶና። ዳዊቲነ ዳዊታ አሳይ፥ ኤንታ ካዋ ሳኦላስ አድ እማነኮ ግድ ያይዳ ግሾ ፍልስፄመት ዞረትዳፐ ጉየ ኤንታ ጉየ ዛርዶሶና።

²⁰ ዳዊቲ ፅቅላጋ ስምዳ ዎደ ምናሰ ኮቻፈ ዳዊታ ማዳናዉ ከይዳ አሳት አድና፥ ዮዛባታ፥ ይድኤላ፥ ምካኤላ፥ ዮዛባታ፥ ኤልሀነ ፅልታያ። ሀይሳቲ ካሰ ምናሰ ቢታን ሻላቃ።

²¹ ኤንቲ ኡባይ ምኖነ ዎልቃማ አስ ግድያ ግሾ ዳዊቲ ዙግድ ኦልያ አሳ ኦልድ እያ ማድዶሶና።

²² ዳዊቲ ኦላንቾት፥ ፆሳ ኦላንቾዳ ዳራና ጋካናዉ እያ ማድያ አሳይ ጋላስ ጋላስ ጉዠቴስ።

²³ ጎዳይ እያዉ ግዳይሳዳ ሳኦላ ካዎተ ዳዊታኮ ዛራናዉ ዳንጨትድ ዳዊታኮ ከብሮና ብዳ ኦላንቾታ ታይቦይ ሀይሳፈ ካልድ ፃፈትዳይሳታ።

²⁴ ጎንዳለነ ቶራ ኦይክድ ኦላስ ጊግዳ ይሁዳ ኮቻይ 6,800.

²⁵ ስሞና ኮቻፈ ኦላስ ጊግዳ ምኖነ ዎልቃማ ኦላንቾት 7,100.

²⁶ ሌወ ኮቻፈ 4,600.

²⁷ አሮና ኮቻ ሀላቃይ ዮዳሄ፤ ዮዳሄራ እስፈ 3,700 አሳት ደኦሶና።

²⁸ ሳዶቅ ናአተ፥ ምኖነ ዎልቃማ አስ፤ ሳዶቃ ሶ አሳፐ ላታማነ ናምኡ ሀላቃት እያራ ደኦሶና።

²⁹ ብንያመ ኮቸ ግድዳ ሳኦላ ዳቦት 3,000. ሽን ብንያመ ኮቻፈ ዳርያ ባጋይ ሳኦላ ሶ አሳስ ሄ ዎደ ጋካናዉ አማነትዶሶና።

³⁰ ኤፍሬማ ኮቻፈ ባንታ ሶ አሳን ኤረትዳ ምኖነ ዎልቃማ አሳት 20,800.

³¹ ዳዊታ ካዎያናዉ ባናዉ ዶረትዳ ምናሰ ኮቻፈ ባጋት 18,000.

³² እስራኤለ አሳይ አይ ኦናዉ በሲያኮ ዎድያባ ሻክድ ኤርያ አኬካንቾ አሳት፥ ይሳኮራ ኮቻ ሀላቃት፥ ናምኡ ፄታ፤ ኤንታ ዳቦት ኡባይ ኤንታዉ ኪተቶሶና።

³³ ኦላ ሚሸ ኡባ ኦይክድ ባንታ ኩመ ዎዛናን ዳዊታ ማዳናዉ ጊግዳ ኦላንቾታን ዛብሎና ኮቻይ 50,000.

³⁴ ንፍታለመ ኮቻፈ 1,000 ሀላቃትነ ጎንዳለነ ቶራ ኦይክያ 37,000 አሳት ኤንታራ ደኦሶና።

³⁵ ዳነ ኮቻፈ ኦላስ ጊግዳ አሳት 28,600.

³⁶ ኦላስ ከያናዉ አሴራ ኮቻፈ ጊግዳ አሳት 40,000.

³⁷ ዮርዳኖሰ ሻፋፐ ሄፍን ዶሎሀ ባጋን ደእያ ሮቤላ ኮቻፈ ጋደ ኮቻፈነ ምናሰ ኮቸ ባጋፈ ኦላ ሚሸ ኡባ ኦይክድ ይዳ አሳት 120,000.

³⁸ ሀ ኡባ ኦላንቾት ዳዊታ እስራኤለ ቦላ ካዎናዉ ባንታ ቆፋ ቃችድ፥ ከብሮና ካታማ ይዶሶና። ቃስ እስራኤለፐ አትዳይሳት ዳዊታ ካዎናዉ እስ ዎዛናን ግድዶሶና።

³⁹ ኤንታ ዳቦት ኤንታዉ ኮሽያባ ጊግስዳ ግሾ ምሸነ ኡይሸ ዳዊታራ ሄ ጋላስ ኡትዶሶና።

⁴⁰ እስራኤለ አሳስ ኡፋይስ ግድያ ግሾ፥ ፑደሀ ባጋን ደእያ ይሳኮራፐ፥ ዛብሎናፐነ ንፍታለመፐ ዳሮ አሳይ ለ፥ ባላሰ ኑካ፥ ዎይነ ቴራ፥ ዎይነ ኡሹነ ዛይተ ሀረን፥ ባቁሎን፥ ግማለንነ ቦራን ጫንድ ኤህዶሶና፤ ቃስ ኤንቲ መሄነ ዶርሰ ሹክድ ማናዉ ኤህዶሶና።