1 Taarike 11 - ጌሻ ማፃፋ

ዳዊቲ እስራኤለ ቦላ ካዎትስ

¹ ሄሳፈ ጉየ፥ እስራኤለ አሳ ኡባይ እስፈ ከብሮናን ደእያ ዳዊታኮ ብድ፥ “ኑኒ ነ ሱነ ነ አሾ።

² ካሰ ሳኦል ካዎ ግድድ ደእያ ዎደካ፥ እስራኤለ አሳ ኦላስ ካለዳይ ነና። ጎዳይ ነ ፆሳይ፥ ‘ታ አሳ እስራኤለ ኔኒ ሄማና፤ ኤንታ ቦላ ኔኒ ካዎታና’ ” ያግስ።

³ እስራኤለ ጭማት ኡባይ ካዋ ዳዊታኮ ይዳ ዎደ እ ኤንታራ ከብሮናን ጎዳ ስንን ጫቅስ። ጎዳይ ሳሜላ ባጋራ ኦድዳ ቃላዳ ዳዊቲ እስራኤለ ቦላ ካዎታናዳ ኤንቲ እያ ትይዶሶና።

⁴ ዳዊቲነ እስራኤለ አሳ ኡባይ የሩሳላመ ካታማ ብዶሶና። ሄ ዎደ ያቡሰ አሳይ ሄ በሳን ደእያ ግሾ ሄ ካታማይ ያቡሰ ጌተቴስ።

⁵ ያቡሰት ዳዊታኮ፥ “ኔኒ ሀ ካታማ ገላናዉ ዳንዳአካ” ያግዶሶና። ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ ፅዮነይ ዳዊቲ ካታማ ጌተትስ።

⁶ ዳዊቲ ባ ኦላንቾታ፥ “ያቡሰታ ኮይሮትድ ኦልያ ኦንካ ቶራ ሞጮና ግዳና” ያግስ። ፃሩያ ናአይ እዮኣብ ኮይሮትድ ኦልድ ሀላቃ ግድስ።

⁷ ዳዊቲ ሄ ሚፃን ደእዳ ግሾ ሄ ካታማይ ዳዊታ ካታማ ጌተትስ።

⁸ ዳዊቲ ሚሎፐ ዶምድ ሄ ካታማ ዛሪድ ኬፅስ፤ አትዳ ባጋ እዮኣብ ዛሪድ ኬፅስ።

⁹ ኡባፈ ዎልቃማ ጎዳይ እያራ ደእያ ግሾ ዳዊቲ ምን ምን ብስ።

ምኖ ግድዳ ዳዊታ አሳታ

¹⁰ ምኖ ግድዳ ዳዊታ አሳት ሀይሳፈ ካልድ ፃፈትዶሶና። ጎዳይ እስራኤለስ ግዳ ቃላዳ ዳዊቲ ካዎታና መላ ሀ አሳት እስራኤለ አሳራ ዳሮ ማድዶሶና። ቃስ እያ ካዎተ ምንዶሶና።

¹¹ ምኖ ግድዳ ዳዊተ አሳት ሀይሳፈ ካልድ ደኤይሳታ። ኤንታፈ ሄት ዳሮ ኤረትዳይሳታ። ሄታፐ ኮይሮይ ሀክሞና አድያ ያሾብኣማ፤ እ እስ ቶሆ ኦላን ሄ ፄቱ አሳ ባ ቶራን ዎስ።

¹² እያ ካለይ፥ ሄ ምኖ አሳታፐ እሶይ አሆሀ አድያ ዶዳ ናአ አላዛራ።

¹³ ፍልስፄመ አሳይ ኦለታናዉ ፓስዳምማ ጌተትያ በሳ ሺቅዳ ዎደ አላዛር ዳዊታራ ደኤስ። እስራኤለ ኦላንቾት ፍልስፄመ አሳታ ስንፈ ባቃትያ ዎደ አላዛር ባንጋ ጋደን ደኤስ።

¹⁴ እነ እያ አሳት ጋድያ ግዶን ፍልስፄመ አሳራ ኦለትን፥ ጎዳይ ግታ ፆኖ እምድ ኤንታ አሽስ።

¹⁵ ፍልስፄመ ኦላንቾት ራፋይመ ዛንጋራን ዱንካንዳ ዎደ ሀስታሙ ሀላቃታፐ ሄት ዳዊቲ ደእያ አዱላማ ጎንጎሉዋን ደእያ ዛላኮ ብዶሶና።

¹⁶ ሄ ዎደ ዳዊቲ ሚፃን ደኤስ፤ ፍልስፄመ ኦላንቾታፐ እስ ጩጋይ ቤተለመ ኦልድ ኦይክስ።

¹⁷ ዳዊቲ ሃ ኡያናዉ አሞትድ፥ “ቤተለመ ፐንግያ ማታን ደእያ ፑልቶ ሃፈ ታና ኡሻናይ ኦነ!” ያግስ።

¹⁸ ሄ ምኖ አሳት ፍልስፄመት ዱንካንዳ በሳ ካን ብድ ቤተለመ ፐንግያ ማታን ደእያ ፑልቶ ሃፈ ዱቅድ ዳዊታስ ኤህዶሶና። ሽን ዳዊቲ ኡዮና እፅድ ሃ ጎዳ ስንን ትግስ።

¹⁹ “ሀ ሃ ኡሽ ታፐ ሃኮ! ባንታ ሸምፑዋ ባይዝድ ኤህዳ ሀ አሳታ ሱ ታኒ ኡዮ? ኤንቲ ባንታ ሸምፑዋ አድ እምድ ኤህዶሶና” ያግስ። ሄሳ ግሾ፥ ዳዊቲ ሃ ኡይቤና። ሄ ምኖ አሳት ሄሳ ኦዶሶና።

²⁰ እዮኣባ እሻይ አብስ ሀስታሙ ኦላንቾታስ ሀላቃ። እ ባ ቶራን ሄ ፄቱ አሳ ዎድ፥ እካ ሀ ሄታዳ ኤረትዳ አስ ግድስ።

²¹ አብስ ሄታራ ታይበቶና እፅኮካ፥ እ ሄታፐ አድ ቦንቸትዳ አስ፤ እ ኤንታዉ ሀላቃ ግድስ።

²² ቃብፄላ አደይ ዮዳሄ ናአይ ባናይ ምኖ አስ፤ እ ምኖ ኦሶ ኦስ። እ ናምኡ ኤረትዳ ሞአበ አሳታ ዎስ። ቃስ ሻች ዎዳ እስ ጋላስ ኦላ ግዶ ገልድ ጋሞ ዎስ።

²³ ባናይ እቻሹ ዋ ግድያ ግብፀ አድያ ዎስ። ግብፀ አድያ ኩሸን ዋንዳራሸ መላ ቶር ደኤስ፤ ሽን ባናይ ፃምአ ኦይክድ አድያኮ ብድ እያ ኩሽያን ደእያ ቶራ ዳፍ ኤክድ እያ ቶራን እያ ዎስ።

²⁴ ዮዳሄ ናአይ ባናይ ሀይሳ ኦስ። እያ ሱንይ ሄ ሄታይሳዳ ኤረትስ።

²⁵ እ ሀስታማታ ግዶን ዳሮ ቦንቸትስ፤ ሽን እ ሄታ ታይቡዋን ዴና። ዳዊቲ እያ ባና ናገይሳታ ሀላቃ ኦስ።

²⁶ ምኖ አሳት እዮኣባ እሻ አሳሄላ፥ ቤተለመ አድያ ዶዳ ናኣ ኤልያና፥

²⁷ ሀሮዳ አድያ ሳሞታ፥ ፕሎና አድያ ሰለሳ፥

²⁸ ተቁሄ አድያ ኤስካ ናኣ እራ፥ አናቶታ አድያ አብኤዘራ፥

²⁹ ኩሳታ አድያ ሳባካ፥ አሆሀ አድያ ኤላያ፥

³⁰ ናፆፋ አድያ ኖኤራነ ባናሀ ናኣ ሄለዳ፥

³¹ ብንያመን ደእያ ግብአ አድያ ራባያ ናአ ኤታያ፥ ፕርአቶና አድያ ባናያሳ፥

³² ጋኣሳ ዛንጋራ ማታፐ ይዳ ኡራያ፥ አራባ አድያ አብኤላ፥

³³ ባርሁማ አድያ አዝሞታ፥ ሳአልቦና አድያ አብኤላ፥

³⁴ ግዞና አድያ ሀሰማ፥ ሀራራ አድያ ሻገ ናአ ዮናታና፥

³⁵ ሀራራ አድያ ሳካራ ናአ አህኣማ፥ ኡረ ናኣ ኤልፋላ፥

³⁶ ማኬራ አድያ ሄፌራ፥ ፕሎና አድያ አክያ፥

³⁷ ቃርመሎሳ አድያ ሄፅራ፥ ኤዝባያ ናኣ ናእራያ፥

³⁸ ናታና እሻ እዩኤላ፥ ሀግራ ናኣ ምብሃራ፥

³⁹ አሞነ አድያ ፀለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ አድያ ናህራያ፥

⁴⁰ ያትራ አድያ እራነ ጋሬባ፥

⁴¹ ህተ አድያ ኦርዮና፥ አህላያ ናኣ ዛባዳ፥

⁴² ሮቤላ ኮቸ ግድዳ ሺዛ ናኣ አድና። እ ሮቤላ ኮቻታ ሀላቃ፤ ሀስታማት እያራ እስፈ ደኦሶና።

⁴³ ሀራ ምኖ አሳት ማእካ ናኣ ሀናና፥ ምታነ አድያ እዮሳፈፃ፥

⁴⁴ አስታሮታ አድያ ኦዝያና፥ አሮኤራ አድያ ሆታማ ናይታ ሻማአነ ይኤላ፥

⁴⁵ ሽምራ ናኣ ይድኤላነ እያ እሻ ቲፃ አድያ ዮሀ፥

⁴⁶ ማሃዋ አድያ ኤልኤላ፥ ኤልናማ ናይታ ይርባያነ ዮሻዋ፥ ሞአበ አድያ ይትማ፥

⁴⁷ ፆባ አድያ ኤልኤላ፥ ኦቤዳነ ያእስኤላ።