1 Taarike 10 - ጌሻ ማፃፋ

ካዋ ሳኦላ ሀይቁዋ

¹ ፍልስፄመት እስራኤለ አሳራ ኦለትዶሶና። እስራኤለት ፍልስፄመታ ስንፈ ባቃትዶሶና። ሄ ዎደ ዳሮ እስራኤለ አሳይ ግልቦአ ደርያ ቦላ ሀይቅዶሶና።

² ፍልስፄመት ሳኦላነ እያ አደ ናይታ ጎድ ኤፍድ ሳኦላ ናይታ ዮናታና፥ አብናዳባነ ማልክሳ ዎዶሶና።

³ ኦላይ ሳኦላ ተቅድ ኡንኤስ፤ ዶንገን ዱከይሳት ሳኦላ ደምድ ማዱንፅስዶሶና።

⁴ ሳኦል ባ ኦላ ሚሽያ ቶከይሳኮ፥ “ሀ ቃፃረትቦና ፍልስፄመት ታና ካኦና መላ ነ ማሻን ታና ዎ” ያግስ። ሽን እያ ኦላ ሚሽያ ቶከይስ ዳሮ ያይዳ ግሾ እፅስ፤ ሄሳ ግሾ፥ ሳኦል ባ ማሻ ሳአን ኤስድ እያ ቦላ ኩንድድ ሀይቅስ።

⁵ እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ እያ ቦላ ኩንድድ ሀይቅስ።

⁶ ሄሳዳ ሀንድ ሳኦል፥ እያ ሄ ናይትነ እያ ሶ አሳ ኡባይ ሄ ጋላስ ሀይቅዶሶና።

⁷ ዛንጋራን ደእያ እስራኤለት ኡባይ ባንታ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእዳ ዎደ ባንታ ካታማታ አግድ ባቃትዶሶና። ፍልስፄመት ይድ ሄ ካታማታን ደእዶሶና።

⁸ ዎንተ ጋላስ ፍልስፄመት አሀታ ቦላፈ ኦላ ሚሸታ ቃር ኤካናዉ ይድ፥ ሳኦልነ እያ ናይት ግልቦአ ደርያን ሀይቅድ፥ ዝንእዳይሳታ ደምዶሶና።

⁹ ኤንቲ ሳኦላ ቆያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃታ ኬንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ አሰ ኪትዶሶና።

¹⁰ ኤንቲ ሳኦላ ኦላ ሚሽያ ባንታ ፆሳታ ኬታፐ እሱዋን ዎዶሶና፤ እያ ሁጵያ ባንታ ፆሳ ዳጎና ኤቃ ኬን ካቅዶሶና።

¹¹ ፍልስፄመት ሳኦላ ቦላ ኦዳባ ኡባ ጋላዳን ደእያ ያበሳ ካታማ አሳይ ስእዳ ዎደ፥

¹² ምኖ አሳት ኡባይ ብድ፥ ሳኦላ አሃነ እያ ናይታ አሀ ኤክድ ያበሳ ካታማ ኤህዶሶና። ያበሳን ደእያ ዎላ ጋርሳን ኤንታ ሞግዶሶና፤ ያትድ ላፑን ጋላስ ፆምዶሶና።

¹³ ሳኦል ጎዳስ አማነትቦና ግሾ ሀይቅስ። ጎዳ ቃላ እ ናግቤና፤ ጎዳ ዞረ ኦይቸይሳ አግድ፥

¹⁴ ሞይትለ ፄግያ አስ ዞረ ኦይችስ። ሄሳ ግሾ፥ ጎዳይ እያ ዎድ እያ ካዎተ እሰየ ናኣ ዳዊታስ አድ እሚስ።