1 Sameela 9 - ጌሻ ማፃፋ

ሳኦላነ ሳሜላ

¹ ብንያመ ኮቸ ግድዳ እስ ቂሳ ጌተትያ አደይ ደኤስ፤ እ ኤረትዳ አስ። እ አብኤላ ናአ፤ አቤል ፃሮራ ናአ፤ ፃሮር ባኮራተ ናአ፤ ባኮራት ብንያመ ኮቸ ግድዳ አፌቃ ናአ።

² እያዉ ሳኦላ ጌተትያ እስ ማላ ሎኦ ግድዳ ፓን ናእ ደኤስ። እስራኤለታ ግዶን እያ መላ ማላ ሎኦይ ባዋ፤ እ አስ ኡባይ እያ ሀሸፐ ጋርሳን አትያ አዱሳ አስ።

³ እስ ጋላስ ሳኦላ አዋ ቂሳ ሀረት ይዶሶና፤ ቂስ ባ ናኣ ሳኦላኮ፥ “ኦሳንቾታፐ እሱዋ ኤካዳ ሀረታ ኮያናዉ ባ” ያግስ።

⁴ ኤንቲ ደረይ ዳርያ ኤፍሬማ ቢታራነ ሻልሻ ቢታራ ኮይሸ አዶሶና፥ ሽን ሀረታ ደምቦኮና። ቃስ ሻአልማ ቢታራ ኮይሸ አዶሶና፥ ሽን ያንካ ሀረት ዶኮና። ብንያመ ቢታራ አዶሶና፥ ሽን ያንካ ደምቦኮና።

⁵ ኤንቲ ዙፋ ቢታ ጋክዳ ዎደ ሳኦል ባራ ደእያ ኦሳንቹዋኮ፥ “ሃያ፤ አነ ጉየ ስሞስ፤ አዋይ ሀረታባ ቆፐይሳ አግድ፥ ኑስ ህርጋና” ያግስ።

⁶ ሽን ኦሳንቾይ፥ “ሄኮ፥ እስ ቦንቸትዳ ፆሳ አስ ሀ ካታማን ደኤስ፤ እ ኦድያ ኡባይ ፖለቴስ። አነ ሀእ ያ ቦስ፤ ኦን ኤር ኑ ባና ኦግያ እ ኑስ ኦዳነኮ” ያግስ።

⁷ ሳኦል፥ “ኑ ብያባ ግድኮ እያዉ አይ እማኔ? ኑ ኦይክዳ ካይ ዉርስ፤ ኑ ፆሳ አሳስ እምያባይ ባዋ። ኑስ አይብ ደኢ?” ያግስ።

⁸ ኦሳንቾይ ዛሪድ፥ “ታ ኩሸን ጉ ብራ ሳንትመይ ደኤስ፤ ኑ ባና ኦግያ ኑስ ኦዳና መላ ፆሳ ኡራስ ሀኖ እማና” ያግስ።

⁹ (በን ዎደ እስራኤለ ቢታን እስ አስ ፆሰ ኦይቻናዉ ብሸ፥ “አነ ቆንጨ በእያ አሳኮ ቦስ” ያጌስ። ሀእ ናበ ጌተተይስ ሄ ዎደ ቆንጨ በእያ አስ ጌተቴስ።)

¹⁰ ሳኦል ዛሪድ፥ “ሎኦ፤ የ” ያግን፥ ፆሳ ኡራይ ደእያ ካታማ ብዶሶና።

¹¹ ኤንቲ ፑደ ካታማ ከይሽን፥ ሃ ትካናዉ ያ ጌላኦታራ ኦገን ጋሄትድ፥ “ቆንጨ በእያ አስ ሀይሳን ደኢ?” ያግድ ኦይችዶሶና።

¹² ኤንቲ፥ “ኤ ደኤስ፤ እ ህንተፈ ስንን ደኤስ፤ ኤለስድ ቢተ። ሀች አሳይ ቃ ጎይኖ በሳን ያርሾ ያርሽያ ግሾ፥ እ ኑ ካታማ ይስ።

¹³ ህንተ ካታማ ገልያ ዎደ እ ማናዉ ቃ ጎይኖ በሳ ከዮና ደእሽን ህንተ እያ ደማና። እ ያርሹዋ አንጃናዉ ኮሽያ ግሾ እ ጋኮና ደእሽን አሳይ ካ ሜና። እ አንጅዳፐ ጉየ ፄገትዳይሳት ማና። ኤለ ከይተ፤ ህንተ እያ ሀእ ደማና” ያግዶሶና።

¹⁴ ኤንቲ ካታማ ገልያ ዎደ ሳሜል ጎይኖ በሳ ከያናዉ ብሸ ኤንታራ ጋሄትስ።

¹⁵ ሳኦል ያናፐ ካሰ ጋላስ ሳሜላስ ጎዳይ ሀይሳዳ ያግድ ቆንጭስስ፤

¹⁶ “ዎንቶ ሀኖደ ብንያመ ቢታፈ እስ አስ ታ ኔኮ የዳና፤ እ ታ አሳ እስራኤለ ካለና መላ ትያ። እ ታ አሳ ፍልስፄመ ኩሸፐ አሻና፤ ታ አሳ ዋሶይ ታኮ ጋክዳ ግሾ ታ ኤንታ በአስ” ያግስ።

¹⁷ ሳሜል ሳኦላ በእዳ ዎደ ጎዳይ፥ “ታኒ ነዉ ኦድዳ ኡራይ ሀይሳ፤ እ ታ አሳ ካለና” ያግስ።

¹⁸ ሳኦል ግምበ ድርሳ ፐንግያ ማታን ደእያ ሳሜላኮ ሺቅድ፥ “ቆንጨ በእያ ኡራ ሶይ አዉነኮ ታዉ ኦዳርኪ?” ያግስ።

¹⁹ ሳሜል ዛሪድ፥ “ቆንጨ በኤይ ታና። ሀች ህንተ ታራ ምያ ግሾ ታፐ ስንትድ ጎይኖ በሳ ቢተ። ታኒ ነና ዎንቶ ጉራ የዳና፤ ነ ዎዛናን ደእያ ኡባ ታ ነዉ ኦዳና።

²⁰ ሄ ጋላሳፐ ስን ይዳ ሀረታባ ግድኮ ኤንቲ በንትዳ ግሾ ህርጎፋ። እስራኤለ አሳ ኡባ አሞይ ኦኔ? ነናነ ነ አዋ ሶ አሳ ግደኔ?” ያግስ።

²¹ ሳኦል ዛሪድ፥ “ሽን ታኒ እስራኤለ ዛረ ኡባፈ ላፋ ግድዳ ብንያመ ኮቸ ግድክና? ታ ሶ አሳይ ብንያመ ኮቻ ግዶን ጉ ግደኔ? ኔኒ አይስ ታዉ ሀይሳ መላባ ኦዳይ?” ያግስ።

²² ሄሳፈ ጉየ፥ ሳሜል ሳኦላነ እያ ኦሳንቾይ ኤፍድ፥ ዳልጋ ኬ ገልስድ ሄ በሳ ፄገትዳ ሀስታሙ ግድያ አሳ ግዶን ቦንቾ በሳን ኡትስስ።

²³ ሳሜል ካ ካይሳኮ፥ “ነ ማታን ዱማ ዎሻ ጋዳ ታኒ ነዉ እምዳ አሹዋ ሀማ” ያግስ።

²⁴ ካ ካይስ ምሳ አሹዋ ኤህድ፥ ሳኦላ ስንን ዎስ። ሳሜል ሳኦላኮ፥ “ታ ነዉ ዱማ ሻካዳ ዎዳ አሾይ ሀይሳ፤ ኤካዳ ማ። ታኒ እማታ ፄግዳ ዎደፐ ዶማዳ ሀይሳ ነዉ አሻስ” ያግስ። ሄ ጋላስ ሳኦል ሳሜላራ ምስ።

²⁵ ኤንቲ ጎይኖ በሳፈ ዱገ ካታማ ዎን፥ ኬ ቦላ ደእያ በሳን ሳሜል ሳኦላራ ኦደትስ።

²⁶ ሳእ ዎንትን፥ ሳሜል ሳኦላ ኬ ቦላፈ ፄግድ፥ “ደንዳ፤ ታ ነና ሞይዛና” ያግስ። ሳኦል ደንድን፥ ናምአይ ኦገ ቦላ ከይዶሶና።

²⁷ ኤንቲ ካታማ ጋፃ ጋክሽን፥ ሳሜል ሳኦላኮ፥ “ነ ኦሳንቾይ ስን ባና መላ ኦዳ” ያግስ። ኦሳንቾይ ስን አድ ብን፥ ሳሜል ሳኦላኮ፥ “ፆሲ ግዳባ ታ ነዉ ኦዳና መላ ሀይሳን ጉ ጋምአ” ያግስ።