1 Sameela 8 - ጌሻ ማፃፋ

እስራኤለት ካዎ ኮይዶሶና

¹ ሳሜል ጭምዳ ዎደ ባ ናይታ እስራኤለ ቦላ ዳይና ኦድ ሹምስ።

² እያ ባይራ ናኣ ሱንይ እዩኤላ፤ ካሎ ናአ ሱንይ አብያ፤ ኤንቲ በርሳበን ፕርዶሶና።

³ ሽን እያ ናይት ባንታ አዋ ኦግያ ካልቦኮና። ኤንቲ በሶና ጎአ ደማናዉ ጉየ ስምዶሶና፤ ዎፈ ኤክዶሶና፥ ሱረ ፕርዳ ዎቢስዶሶና።

⁴ ሄሳ ግሾ፥ እስራኤለ ጭማት እስፈ ሺቅድ፥ ሳሜላኮ ራማ ይድ፥

⁵ “ሄኮ ኔኒ ጭማዳሳ፤ ነ ናይት ነ ኦግያ ካሎኮና፤ ሀራ ካዎተት ኦይሳዳ ኑና አይስያ ካዎ ሀእ ኑስ ሹማ” ያግዶሶና።

⁶ ኤንቲ፥ “ኑና አይስያ ካዎ ኑስ እማ” ግድ ኦይችዳይስ ሳሜላ ኡፋይስቤና። ሄሳ ግሾ፥ ሳሜል ጎዳ ዎስስ።

⁷ ጎዳይ ሳሜላ፥ “ታኒ ኤንታ ቦላ ካዎቶናዳ ነና ግዶናሽን ታና እፅዳ ግሾ አሳይ ኔኮ ግያባ ኡባ ስአ።

⁸ ኤንታ ታኒ ግብፀፈ ከስዳ ዎድያፐ ዶምድ ሀች ጋካናዉ ታና አግድ፥ ሀራ ፆሳታ ጎይንሸ ደእዶሶና። ሀእ ኤንቲ ታ ቦላ ኦዳ ኡባ ነ ቦላ ኦሶና።

⁹ ሀእ ኤንቲ ግያባ ስአ፤ ሽን ኤንታ ቦላ ካዎታና ካዋ ዎጋ ኤንታዉ ምንዳ ኦዳ” ያግስ።

¹⁰ ካዎ ኦይችዳ ደርያስ ጎዳይ ኦድዳ ቃላ ኡባ ሳሜል ያግድ ኦድስ።

¹¹ “ህንተ ቦላ ካዎታና ካዎይ ኦናባይ ሀይሳ፤ እ ህንተ አደ ናይታ ኤክድ፥ ፓራ ጋረ አሳታነ ፓራ አሳታ ኦና፤ ኤንቲ እያ ጋርያ ስንን ዎፃና።

¹² ኤንታፈ አትዳይሳታ ሻላቃታነ ሀምሳላቃታ፥ ሀራታ እያ ቢታ ጎየይሳታ እያ ካ ጫከይሳታ፥ ቃስ ሀራታ እያ ኦላ ሚሸነ ፓራ ጋረ ሚሸ ኦይሳታ ከሳና።

¹³ ህንተ ማጫ ናይታካ ኤፍድ፥ ባዉ ሽቶ ጊግሰይሳታ፥ ካይሳታነ ኡከይሳታ ኦና።

¹⁴ ህንተ ጎሻፈ፥ ዎይነ ጋደፐነ ሻማሆ ጋደፐ ሎኦ በሳታ ኤክድ፥ ባ ሞርናታስ እማና።

¹⁵ ካፈነ ዎይንያፐ ታማፈ እስ ኩሽያ ኤክድ ባ ሹማታስነ ባ ሞርናታስ እማና።

¹⁶ ህንተ አደ አይለታፐ፥ ማጫ አይለታፐ፥ ህንተ ናአተታፈነ ህንተ ሀርያፐ ሎኤይሳ ባዉ ጎኤታናዉ ኤካና።

¹⁷ ህንተ ዶርሳፈነ ዴሻፐ ታማፈ እስ ኩሸ ኤካና፤ ህንተ እያ ኦሳንቾ ግዳና።

¹⁸ ሄ ጋላሳይ ጋክዳ ዎደ ህንተ ዶርዳ ካዎይ ጋያ ቆሁዋ ግሾ ዋሳና፤ ሽን ሄ ጋላስ ጎዳይ ህንተ ዋሱዋ ስኤና” ያግስ።

¹⁹ ግዶሽን፥ አሳይ ሳሜላ ቃላ ስኦና እፅድ፥ “አካይ፥ ኑስ ካዎይ ደኦ።

²⁰ ሀራ ካዎተታ መላ ኑና ካለያ፥ ኑ ስንን ብያነ ኑ ኦላ ኦለትያ ካዎይ ደኦ።”

²¹ ሳሜል አሳ ቃላ ኡባ ስእድ፥ ጎዳስ ኦድስ።

²² ጎዳይ ሳሜላኮ፥ “ኤንታ ቃላ ስአ፤ ኤንታ ቦላ ካዎ ካዎ” ያግስ። ሳሜል እስራኤለ አሳኮ፥ “ህንተ ሶ ሶ ስምተ” ያግስ።