1 Sameela 6 - ጌሻ ማፃፋ

ታቦተይ እስራኤለ ስምስ

¹ ጎዳ ታቦተይ ፍልስፄመ ቢታን ላፑን አጌና ኡትስ።

² ሄ ዎደ ፍልስፄመ አሳይ ባንታ ካህነታነ ማሮታ ፄግድ፥ “ጎዳ ታቦትያ ኑኒ ዋትኖ? ኑኒ ጉየ እያ በሳ እያ ዋት የዳኔኮ ኑስ ኦድተ” ያግዶሶና።

³ ኤንቲ ዛሪድ፥ “እስራኤለ ፆሳ ታቦትያ ጉየ የድሸ መላ ኩሸ የዶፍተ። አይ ሀንድካ ናጋራ ያርሾራ የድተ። ሄሳ ኦኮ ህንተ ፓፃና፤ እያ ኩሸይ ህንተ ቦላፈ አይስ ክችቦናኮ ህንተ ኤራና” ያግዶሶና።

⁴ ፍልስፄመ አሳይ፥ “ኑኒ የዳናዉ በሲያ ናጋራ ያርሾይ አይቤ?” ያግድ ኦይችዶሶና። ኤንቲ፥ “ህንተናነ ህንተ ሀላቃታ ጋክዳ ጋዶይ እስኖ ግድያ ግሾ፥ ፍልስፄመ ሀላቃታ ታይቦን እቻሹ ዎርቃ ክፃታነ እቻሹ ዎርቃ ኤጨረታ የድተ።

⁵ ህንተ ሄ ክፃታነ ህንተ ቢታ ይስያ ሄ ኤጨረታ ምስለታ መድ፥ እስራኤለ ፆሳስ ቦንቾ እምተ። ኦን ኤር እ ህንተ ቦላፈ፥ ህንተ ፆሳታ ቦላፈነ ህንተ ቢታ ቦላፈ ባ ኩሽያ ደንና።

⁶ ግብፀ አሳይነ ኤንታ ካዎይ ዞረ ኤኮና እፅዳይሳዳ ህንተ አይስ ዞረ ኤከከቲ? ጎዳይ ኤንታ ዳሮ ሴርን እስራኤለት ባንታ ኦግያ ባና መላ የድቦኮና?

⁷ ሀእ እስ ኦራ ጋረ ጊግስተ፤ ቃምባራ ዎቦና ናምኡ ንያ ሚዛታ ሄ ጋርያን ዋፅተ፤ ሽን ማራታ ኤንታፈ ዱድ ሶን አሽተ።

⁸ ጎዳ ታቦትያ ጋርያ ቦላ ዎተ፤ ናጋራ ያርሾስ ጊግስዳ ዎርቃ ክፃታነ ዎርቃ ኤጨረታ ሳፅነን የግድ ጎዳ ታቦትያ ማታን ዎድ እ ባና መላ የድተ።

⁹ ሽን እ ብያ በሳ በእተ፤ እ ባ ዛዋ ኦይክድ፥ ቤት-ሳሜሳ ስሚድ ብያባ ግድኮ፥ ሀ ጋዱዋ ኑ ቦላ ኤህዳይ ጎዳ ግደይሳ በሴስ። ሽን እ ሀራ ሶ ቢኮ ሀይስ ኑ ቦላ ጮ ጋክስፐ አትሽን፥ ኑና ደችዳይ ጎዳ ኩሸ ግዶናይሳ ኤራና” ያግድ ዛርዶሶና።

¹⁰ ኤንቲ ጌተትዳይሳዳ ኦዶሶና፤ ናምኡ ንያ ሚዛታ ኤክድ፥ ጋረን ዋፅዶሶና፤ ማራታ ሶ ዛሪድ ጎርድዶሶና።

¹¹ ኤንቲ ጎዳ ታቦትያ፥ ዎርቃ ክፃነ ኤጨረ ምስለት ደእያ ሳፅንያ ጋረን ዎዶሶና።

¹² ሄሳፈ ጉየ፥ ሚዛት ቤት-ሳሜሳ ኤፍያ ኦግያ ኦይክድ ገደ ሃ ጎና “ህምባ” ግድ ዋስሸ ብዶሶና። ፍልስፄመ ሀላቃት ሚዛታ ጌዶ ካልድ፥ ቤት-ሳሜሳ ዛዋ ጋካናዉ ብዶሶና።

¹³ ቤት-ሳሜሳ አሳይ ሄ ዎደ ዛንጋራን ግስተ ጫኮሶና፤ ኤንቲ ቁ ግድ ፄልድ፥ ታቦትያ በእድ ኡፋይትዶሶና።

¹⁴ ጋረይ ቤት-ሳሜሳን ደእያ እያሱ ጌተትያ ኡራ ጋደ ጋክድ፥ እስ ግታ ሹቻ ማታን ኤቅስ። ኤንቲ ጋርያ ም ቀርድ፥ ፁሳ ያርሾ ኦድ ሄ ሚዛታ ጎዳስ ያርሽዶሶና።

¹⁵ ሌወት ጎዳ ታቦትያነ ዎርቃ ሚሸት ደእያ ሳፅንያ ጋርያፐ ዎስድ፥ ግታ ሹቻ ቦላ ዎዶሶና። ሄ ጋላስ ቤት-ሳሜሳ አሳይ ጎዳስ ፁሳ ያርሾነ ሀራ ያርሾታ ያርሽዶሶና።

¹⁶ እቻሹ ፍልስፄመ ሀላቃት ሀንዳባ ኡባ በእድ ሄ ጋላስ ኤቅሮና ስምዶሶና።

¹⁷ ዎርቃ ክፃት ፍልስፄመ ሀላቃት ናጋራ ያርሾ ኦድ ጎዳስ ኪትዳ አሽዶዳ፥ ጋዛ፥ አስቃሎና፥ ጋተነ ኤቅሮና ጌተትያ እቻሹ ካታማታ ሱንን እሱዋ እሱዋ እምዶሶና።

¹⁸ ዎርቃ ኤጨረታ ታይቦይ ፍልስፄመ ሀላቃታ እቻሻይ ደእያ ግምበትዳ ካታማታነ ሄራን ደእያ ጉታታ ታይቡዋ መላ። ቤት-ሳሜሳን ደእያ እያሱ ጌተትያ ኡራ ጋደን ጎዳ ታቦትያ ዎዳ ግታ ሹቻይ ሀች ጋካናዉ ማርካ ግድድ ደኤስ።

¹⁹ ሽን ኤንቲ ጎዳ ታቦትያስ ግዶ ባጋ በእዳ ግሾ ጎዳይ ቤት-ሳሜሳ አሳፐ ላፑን ታሙ አሳታ ዎስ። ጎዳይ ኤንታፈ ዳሮ አሳ ዎዳ ግሾ አሳይ ዬክዶሶና።

²⁰ ሄሳ ግሾ፥ ቤት-ሳሜሳ አሳይ፥ “ጎዳ ስንን፥ ሀ ጌሻ ፆሳ ስንን ኦን ኤቃናዉ ዳንዳኢ? ታቦተይ ኑፐ ከይድ ኦደኮ ባኔ?” ያግዶሶና።

²¹ ቅርያት-ይኣርማን ደእያ አሳኮ ኪታ የድድ፥ “ፍልስፄመ አሳይ ጎዳ ታቦትያ ዛርዶሶና፤ ይድ እያ ህንተኮ ኤክተ” ያግዶሶና።