1 Sameela 5 - ጌሻ ማፃፋ

ታቦተይ ፍልስፄመ ካታማታን

¹ ፍልስፄመት ፆሳ ታቦትያ ድእዳፐ ጉየ አበንኤዘራፐ አሽዶዳ ኤፍዶሶና።

² ፆሳ ታቦትያ ኤፍድ፥ ዳጎነ ኤቃ ኬን ገልስድ፥ ዳጎነ ምስልያ ማታን ዎዶሶና።

³ አሽዶዳ አሳይ ዎንተ ጋላስ ጉራ ደንድድ በእያ ዎደ ጎዳ ታቦትያ ስንን ዳጎን ጉፋንዳይሳ በእዶሶና። ዳጎነ ደንድ፥ ካሰ በሳን ኤስዶሶና።

⁴ ቃስ ዎንተ ጋላስ ጉራ ደንድድ በእያ ዎደ ጎዳ ታቦትያ ስንን ዳጎን ሳአን ጉፋንዳይሳ በእዶሶና። ሄ ዎደ ዳጎነ ሁጰይነ እያ ናምኡ ኩሸይ መቅድ ፐንግያ ቦላ ደኤስ፤ ሀንኮ አሳተይ ዱማ አትስ።

⁵ ሀች ጋካናዉ ዳጎነ ካህነትነ አሽዶዳን ደእያ ዳጎነ ኬ ገልያ አሳት ኡባይ ዳጎነ ፐንግያ የና ፃምባል አይ ሄሳ ግሾሳ።

⁶ አሽዶዳ ካታማ ቦላነ እያ ሄራን ደእያ አሳ ቦላ ጎዳ ኩሸይ ዴፅስ፤ ጎዳይ ክፃ ሀርገ የድድ ኤንታ ሴርስ።

⁷ አሽዶዳ ካታማ አሳይ ሀንዳባ በእዳ ዎደ፥ “እስራኤለ ፆሳ ኩሸይ ኑ ቦላነ ኑ ፆሳ ዳጎነ ቦላ ዴፅዳ ግሾ፥ እስራኤለ ፆሳ ታቦተይ ኑ ማታን ጋምኦፎ” ያግዶሶና።

⁸ ሄሳ ግሾ፥ እቻሹ ፍልስፄመ ሀላቃታ ኡባ ፄግድ፥ “እስራኤለ ፆሳ ታቦትያ ዋትኖ?” ያግድ ኦይችዶሶና። ሀላቃት፥ “እስራኤለ ፆሳ ታቦተይ ጋተ ካታማ ቦ” ያግድ ዛርዶሶና። እስራኤለ ፆሳ ታቦትያ ጋተ ኤፍዶሶና።

⁹ ሽን ታቦተይ ጋተ ጋክዳፐ ጉየ፥ ጎዳ ኩሸይ ሄ ካታማ ቦላ ዴፅድ፥ ዳሮ ዳጋንስ። ካታማን ደእያ አሳ ናአፐ ጭማ ጋካናዉ ክፃ ሀርገን ሾጭስ።

¹⁰ ሄሳ ግሾ፥ ፆሳ ታቦትያ ኤቅሮና ካታማ የድዶሶና። ፆሳ ታቦተይ ኤቅሮና ገልያ ዎደ፥ ኤቅሮና አሳይ፥ “ኑናነ ኑ አሳ ይሳናዉ እስራኤለ ፆሳ ታቦትያ ኑኮ ኤህዶሶና” ያግድ ዋስዶሶና።

¹¹ ሄሳ ግሾ፥ ኤንቲ ፍልስፄመ ሀላቃታ ፄግድ፥ “ኑናነ ኑ አሳ ይሳናፐ ስን እስራኤለ ፆሳ ታቦትያ ሀይሳፈ ድግተ፤ እያ እያ በሳ ጉየ ዛርተ” ያግዶሶና። ጎዳ ኩሸይ ካታማ ቦላ ዴፅዳ ግሾ ካታማ ኡባይ ሀይቆ ዳጋማን ኦይከትስ።

¹² ሀይቆፐ አትዳ አሳ ክፃ ሀርገይ ኡንኤዳ ግሾ ሄ ካታማ አሳ ዬሆይ ሳሎ ጋክስ።