1 Sameela 31 - ጌሻ ማፃፋ

ሳኦላ ሀይቁዋ

¹ ፍልስፄመት እስራኤለታራ ኦለትዶሶና፤ እስራኤለት ፍልስፄመታ ስንፈ ባቃትዶሶና፤ ዳሮ እስራኤለት ግልቦአ ደርያ ቦላ ሀይቅዶሶና።

² ፍልስፄመት ሳኦላነ እያ አደ ናይታ የደድ፥ እያ አደ ናይታ ዮናታና፥ አምናዳበነ ማልክሳ ዎዶሶና።

³ ኦላይ ተቅድ ሳኦላ ኡንኤስ፤ ዶንገን ዱከይሳት እያ ጫድድ ዳሮ ማዱንፅስዶሶና።

⁴ ሳኦል ባ ኦላ ሚሽያ ቶከይሳኮ፥ “ሀ ቃፃረትቦናይሳት ይድ፥ ታና ጫድድ ካኦና መላ ነ ማሻን ታና ጫዳዳ ዎ” ያግስ። ሽን እያ ኦላ ሚሽያ ቶከይስ ያይድ እፅን፥ ሳኦል ባ ማሻ ሳአን ኤስድ፥ እያ ቦላ ኩንድስ።

⁵ እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ፥ እያ ቦላ ኩንድድ እያራ እስፈ ሀይቅስ።

⁶ ሀይሳዳ ሀንድ፥ ሳኦልነ እያ ሄ አደ ናይት፥ እያ ኦላ ሚሽያ ቶከይስነ እያ አሳት ኡባይ ሄ ጋላስ ሀይቅዶሶና።

⁷ ዛንጋራንነ ዮርዳኖሰ ሻፋፐ ሄፍን ባጋራ ደእያ እስራኤለ አሳይ፥ እስራኤለ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእድ ባንታ ካታማ አግድ ባቃትዶሶና። ፍልስፄመት ይድ፥ ሄ ካታማታ ኦይክዶሶና።

⁸ ዎንተ ጋላስ ፍልስፄመት አሀ ቦላፈ ኦላ ሚሸታ ቃርድ ኤካናዉ ይድ፥ ሳኦልነ እያ ሄ አደ ናይት ግልቦአ ደርያ ቦላ ሀይቅድ ዝንእዳይሳታ ደምዶሶና።

⁹ ኤንቲ ሳኦላ ቆያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃ ኬንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ ኪታ የድዶሶና።

¹⁰ ሳኦላ ኦላ ሚሽያ አስታሮተ ጌተትያ ኤንታ ማጫ ፆሰ ኬን ዎዶሶና። ሳኦላ አሀ ቤት-ሳና ካታማ ግምብያ ቦላ ምስማረን ሽድ ካቅዶሶና።

¹¹ ፍልስፄመት ሳኦላ ኦዳባ ጋላዳን ደእያ ያበሳ አሳይ ስእዳ ዎደ፥

¹² ምኖ አሳት ቃማ ደንድ ብድ፥ ሳኦላ አሃነ እያ ናይታ አሀ ቤት-ሳና ካታማ ግምብያ ቦላፈ ዎስድ ያበሳ ካታማ ኤህድ፥ ያን ፁግዶሶና።

¹³ ሄሳፈ ጉየ፥ ኤንታ መቀ ማፅ ኤክድ፥ ያበሳን ደእያ ታማርስከ ም ጋርሳን ሞግዶሶና፤ ያትድ ላፑን ጋላስ ፆምዶሶና።