1 Sameela 3 - ጌሻ ማፃፋ

ሳሜላ ፄገተ

¹ ናአይ ሳሜል ኤልፐ ጋርሳራ ጎዳስ ኦስ፤ ጎዳ ቃላይ ሄ ዎደ ዳሮ አልኦ፤ ቆንጨካ ባዋ።

² አይፈይ ዳቡርን ዋየትድ ፄልያ ኤል እስ ቃማ ባ በሳን ዝንእስ።

³ ሄ ዎደ ፆሳ ፆምፐይ ቡሮ ቶእቤና፤ ጎዳ ታቦተይ ደእያ ኬን ሳሜል ስክስ።

⁴ ጎዳይ ሳሜላ ፄግስ፤ ሳሜል፥ “ዬ” ግድ ኮይስ።

⁵ እ ኤልኮ ዎፅ ብድ፥ “ኔኒ ፄግን ሄኮ ያስ” ያግስ። ሽን ኤል፥ “ታ ነና ፄጋብከ፤ ባዳ ዝንአ” ያግን፥ ሳሜል ብድ ዝንእስ።

⁶ ቃስ ጎዳይ፥ “ሳሜላ” ያግድ ናምአን ፄግን፥ ሳሜል ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ። ሽን ኤል፥ “ታ ናአዉ፥ ታ ነና ፄጋብከ፤ ባዳ ዝንአ” ያግስ።

⁷ ጎዳ ቃላይ ቡሮ እያዉ ቆንጭቦና ግሾ፥ ሳሜል ጎዳ ግደይሳ ኤርቤና።

⁸ ጎዳይ ሳሜላ ሄን ፄግን ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ። ሄሳን ጎዳይ ናኣ ፄግዳይሳ ኤል አኬክድ፥

⁹ “ባዳ ዝንአ፤ እ ነና ፄግያባ ግድኮ፥ ‘ጎዳዉ፥ ኦዳ፤ ታ ነ አይለይ ስአይስ’ ያጋ” ግድ፥ ኤል እያዉ ኦድን፥ ሳሜል ባ በሳ ብድ ዝንእስ።

¹⁰ ሄሳፈ ጉየ፥ ጎዳይ ይድ እያ ማታን ኤቅድ፥ ካሰይሳዳ፥ “ሳሜላ፥ ሳሜላ” ያግድ ፄግስ። ሳሜል፥ “ነ አይለይ ስኤስ፥ ኦዳ” ያግስ።

¹¹ ጎዳይ ሳሜላ፥ “ሄኮ፥ ታኒ አሳ ሀይስ ኢትያ እስባ እስራኤለ ቦላ ኦና ሀናይስ።

¹² ሄ ጋላስ ታኒ ኤል ሶ አሳ ቦላ ኦና ጋዳ ኦድዳ ኡባ ኮይሮፐ ዉርሰ ጋካናዉ ፖላና።

¹³ ኤል ኤርድ ሴሮና አግዳ እያ ናይታ ናጋራ ግሾ፥ ታኒ እያ ሶ አሳ ቦላ መርናዉ ፕርዳናይሳ እያዉ ካሰ ኦዳ ዎስ።

¹⁴ ሄሳ ግሾ፥ ‘ኤል ሶ አሳ ናጋራይ ያርሾንነ እሞን ፖሎ አቶ ጌተተና’ ያጋዳ ታኒ እያ ሶ አሳስ ካሰ ጫቃስ” ያግስ።

¹⁵ ሳሜል ዎንታና ጋካናዉ ስክስ፤ ዎንትን ደንድድ፥ ፆሳ ኬ ፐንግያ ዶይስ። ሳሜል ቆንጭዳባ ኤልስ ኦዳናዉ ያይስ።

¹⁶ ኤል፥ “ታ ናአዉ፥ ሳሜላ” ያግድ ፄግስ። ሳሜል፥ “ዬ” ግድ ኮይስ።

¹⁷ ኤል፥ “ጎዳይ ነዉ ኦድዳይ አይቤ? ታፐ አይኮካ ቆሶፓ፤ ኔኒ ፆሳይ ነዉ ኦድዳባፐ እስባካ ታፐ ቆስኮ፥ ፆሲ ነና ፕርዶ” ያግድ ኦይችስ።

¹⁸ ሳሜል አይኮካ ቆሶና ኡባ ኤልስ ኦድስ። ኤል፥ “እ ጎዳ፤ ባና ሎእዳባ ኦ” ያግስ።

¹⁹ ሳሜል ድጭሸ ብስ፤ ጎዳይ እያራ ደኤስ። ሳሜል ኦድዳባፐ እስ ቃልካ ሳአን ዎና።

²⁰ ዳነፐ በርሳበ ጋካናዉ፥ ሳሜል ቱማ ጎዳ ናበ ግደይሳ እስራኤለ አሳ ኡባይ ኤርስ።

²¹ ጎዳይ ሴሎን ቆንጬስ፤ ያን ባ ቃላን ባናተ ሳሜላስ ቆንጭሴስ።