1 Sameela 28 - ጌሻ ማፃፋ

ሳኦላነ ሞይትለ ፄግያ ማጫስዉ

¹ ሄ ዎደ ፍልስፄመ አሳት እስራኤለታ ኦላናዉ ባንታ ኦላንቾታ ሺሽዶሶና። አንኩስ ዳዊታኮ፥ “ነነ ነ አሳት ታራ ኦላስ ባናይሳ ቱማ ኤራ ኡታ” ያግስ።

² ዳዊቲ፥ “ሄሳ ግድኮ፥ ታ ነ አይለይ ኦናባ ነ በአና” ያግስ። አንኩስ፥ “ዳሮ ሎኦ፤ ታኒ ነና ታ ደኦ ላይ ኡባን ታና ናገይሳ ኦና” ያግስ።

³ ሀይሳፈ ካሰ ሳሜል ሀይቅን፥ እስራኤለ አሳ ኡባይ እያዉ ዬክድ፥ እያ ካታማን ራማን እያ ሞግዶሶና። ሳኦል ሞይትለ ፄገይሳታነ ማሮታ እስራኤለ ቢታፈ የደድ ከስስ።

⁴ ፍልስፄመ ኦላንቾት ሺቅድ፥ ሱኔማ ካታማን ዱንካንዶሶና፤ ሳኦል እስራኤለ አሳ ኡባ ሺሽድ፥ ግልቦአ ዙማን ዱንካንስ።

⁵ ሳኦል ፍልስፄመ ኦላንቾታ በእድ ያይስ፤ እያ ዎዛናይ ዳሮ ዳጋምስ።

⁶ ሄሳ ግሾ፥ አይ ኦነኮ ጎዳ ኦይችስ፤ ሽን ጎዳይ አሙሆን ዎይኮ ኡሪመን ዎይኮ ናበታ ባጋራ እያዉ ኦድቤና።

⁷ ሄሳፈ ጉየ፥ ሳኦል ባ አይለታ፥ “ሞይትለ ፄግያ ማሮ ታዉ ኮይተ፤ ታኒ ኢኮ ባዳ እዮ ኦይቻና” ያግድ ኪትስ። ሳኦላ አይለት፥ “ሞይትለ ፄግያ እስ ማሮይ ኤንዶራን ደአኡሱ” ያግዶሶና።

⁸ ያግን ሳኦል ባና ኤርሶና መላ ሀራ ማኦ ማእድ፥ ናምኡ አሳታ ኤክድ፥ ቃማ ሄ ማሬኮ ብድ፥ ማጫስዉ፥ “ሀያና፥ ታዉ እስ ሞይትለ ፄጋርክ፤ ታኒ ሱን ኦድያ አሳ ታዉ ደንርክ” ያግስ።

⁹ ያግን ማጫስያ፥ “ሞይትለ ፄገይሳታነ ማሮታ እስራኤለ ቢታፈ ሳኦል ዋት የደ ከስዳኮ፥ ቱማ ኔኒ ኤራሳ። ታና ዎሳናዉ ኔኒ ታዉ አይስ ፅሄ የጋይ?” ያጋሱ።

¹⁰ ያግን ሳኦል ማጫስዉ፥ “ደኦ ፆሳይ ኤርያ መላ፥ ኔኒ ሀይሳ ግሾ ሴረታካ” ያግድ ጎዳን ጫቅስ።

¹¹ ማጫስያ፥ “ታኒ ነዉ ኦና ደን?” ያጋዳ ኦይቻሱ። ሳኦል፥ “ሳሜላ ታዉ ደን” ያግስ።

¹² ማጫስያ ሳሜላ በአዳ፥ ዋሶ ጎቻዳ፥ ሳኦላኮ፥ “ኔኒ ታና አይስ ጭማዲ? ኔኒ ሳኦላ ግድክ!” ያጋሱ።

¹³ ካዎይ፥ “ያዮፋ! ነዉ አይበ በንተይ?” ያግስ። ማጫስያ፥ “እስ ሞይትለይ ቢታ ግዶፈ ከይሽን በአስ” ያጋሱ።

¹⁴ ሳኦል ማጫስዉ፥ “እ አይ ዳኒ?” ያግስ። ማጫስያ፥ “ካባ ማእዳ እስ ጭማ አደይ ከይስ” ያጋሱ። ሳኦል ሄ አደይ ሳሜላ ግደይሳ ኤርድ፥ እያ ስንን ሳአን ጉፋንስ።

¹⁵ ሳሜል ሳኦላኮ፥ “ታና ደንዳ አይስ ዋይሳይ?” ያግስ። ሳኦል፥ “ታኒ ዳሮ ኡንኤታስ፤ ፍልስፄመ አሳት ታና ኦሎሶና፤ ፆሳይ ታፐ ሻከትስ፤ ናበታ ባጋራ ዎይኮ አሙሆን እ ታኒ ኦይችያባ ኦደና። ሄሳ ግሾ፥ ታኒ ኦናባ ነ ታዉ ኦዳና መላ ነና ፄጋስ” ያግስ።

¹⁶ ሳሜል፥ “ጎዳይ ሻከትድ ነዉ ሞርከ ግድኮ ታና አይስ ዞረ ኦይቻይ?

¹⁷ ጎዳይ ታ ባጋራ ካሰት ኦድዳባ ኦስ፤ ጎዳይ ካዎተ ኔፐ ኤክድ፥ ነ ሾሩዋ ዳዊታስ እሚስ።

¹⁸ ኔኒ ጎዳስ ኪተታቦና ግሾነ እያ ኤፅያ እያ ሸንያ አማለቃ ቦላ ፖላቦና ግሾ ጎዳይ ሀች ሀይሳ ነ ቦላ ኤህስ።

¹⁹ ነናነ እስራኤለ፥ ጎዳይ ፍልስፄመታስ አድ እማና፤ ነነ ነ አደ ናይት ዎንቶ ታናን ጋሄታና፤ ጎዳይ እስራኤለ ኦላንቾታ ፍልስፄመታስ አድ እማና” ያግስ።

²⁰ ሳኦል ሳሜላ ኦዳ ስእድ ያይዳ ግሾ ዳቡርድ፥ ባና ዶግድ ሳአን ኩንድስ። ሳኦል ቃማነ ጋላስ ካ ምቦና ግሾ እያዉ ዎልቅ እፅስ።

²¹ ሄ ማጫስያ ሳኦላኮ ያዳ፥ እ ዳሮ ኮኮረይሳ በአዳ፥ “ታኒ ነ አይልያ ነዉ ኪተታስ፤ ኔኒ ታና ኦይችዳባ ታ ሸምፑዋ ዶጋዳ ኦስ።

²² ሀእ ታኒ ነ አይልያ ግያባ ሀያና ስአ፤ ኔኒ ማዳ ጋሽታዳ ነ ኦግያ ባና መላ ታኒ ነዉ ጉ ካ ጊግሳስ” ያጋሱ።

²³ ሳኦል፥ “ሚከ” ያግስ። ሽን እያ አሳት ሄ ማጫሴራ ግድድ እያ ዎስዶሶና፤ ኤንታ ዎሳ ስእስ፤ ቢታፈ ደንድድ ሂፃን ኡትስ።

²⁴ ሄ ማጫስያ ባ ሶን ደእያ አንቃራ ማራ ሹካሱ፤ ለ ኤካ ሙኑቃዳ፥ ኡይ ኡካሱ።

²⁵ ያታዳ ካ ሳኦላስነ እያ አሳታስ አን፥ ኤንቲ ምዶሶና። ሄ ቃማ ደንድድ ብዶሶና።