1 Sameela 27 - ጌሻ ማፃፋ

ዳዊቲ ፍልስፄመ ባቃትስ

¹ ዳዊቲ ባ ዎዛናን፥ “እስ ጋላስ ታኒ ሳኦላ ኩሸን ዳፋታና፤ ታኒ ፍልስፄመ ቢታ ባቃታናፐ አትሽን፥ ሀራባይ ታዉ ሎኤና። ያንኮ፥ ሳኦል እስራኤለ ቢታ ኡባን ታና ኮየይሳ አጋና፤ ታኒ እያ ኩሸፐ ከሳ ኤካና” ያግድ ቆፕስ።

² ሄሳ ግሾ፥ ዳዊቲነ እያራ ደእያ ኡሱፑን ፄቱ አሳት ደንድድ፥ ጋተ ካዋ ማኦካ ናኣ አንኩሳኮ ብዶሶና።

³ ዳዊቲነ እያ አሳይ አንኩሳራ ጋተን ኡትዶሶና። አሳ ኡባይ ባ ሶ አሳ አሳ ኤክድ ብስ፤ ዳዊቲካ ባ ማቸታ፥ እዝራኤለ አክናሆሞነ ናባላ አምእዉ፥ ቃርመሎሳ ማጫስዉ፥ አብግያ ኤክድ ብስ።

⁴ ዳዊቲ ጋተ ባቃትስ ገይሳ ስእድ፥ ሳኦል ዛሪድ እያ ኮየይሳ አግስ።

⁵ ዳዊቲ ካዋ አንኩሳኮ፥ “ኔኒ ታናን ኡፋይትኮ፥ ታኒ ያን ዳና መላ ነ ካዎተን ደእያ ካታማታፐ እሱዋ ታዉ እማ። ታኒ ነ አይለይ ካዎይ ደእያ ካታማን ኔራ አይስ ኡታኔ?” ያግስ።

⁶ ሄ ጋላስ አንኩስ ፅቅላጋ ካታማ ዳዊታስ እሚስ፤ ሀች ጋካናዉ ፅቅላጋ ካታማይ ይሁዳ ካዎታባ ግድድ አትስ።

⁷ ዳዊቲ ፍልስፄመ ቢታን እስ ላይነ ኦይዱ አጌና ደእስ።

⁸ ዳዊቲነ እያ አሳት ፑደ ከይድ፥ ጌሹረታ፥ ጋርዘታነ አማለቃታ ኦሎሶና። በንፐ ዶምድ፥ ሄ አሳት ሹራፐ ብድ ግብፀ ጋካናዉ ደእያ ቢታን ደእዶሶና።

⁹ ዳዊቲ ሄ ቢታ ኦልያ ዎደ ኡባን ሄ ቢታን ደእያ ማጫ ግድን፥ አደ ግድን፥ ፓፃ አግቤና። ዶርሰነ መሄ፥ ሀረነ ግማለ ማኦ ድኤስ፤ ያትድ አንኩሳኮ ስሜስ።

¹⁰ አንኩስ፥ “ሀች አዉን ኦልደቲ?” ግድ ዳዊታ ኦይቼስ። ዳዊቲ፥ “ይሁዳ ዱገሀ ባጋ ዎይኮ ይራማኤላ ዱገሀ ባጋ ዎይኮ ቄና ዱገሀ ባጋ ኦልዳ” ያጌስ።

¹¹ ኤንታፈ እስ አስ ጋተ ብድ፥ “ዳዊቲ ሀይሳ ኦስ” ግድ ኦዶና መላ ዳዊቲነ እያ አሳት ማጫ አደ አሾና ዎዶሶና። ዳዊቲ ፍልስፄመ ቢታን ደእዳ ዎደ ኡባን ሀይሳዳ ኦስ።

¹² አንኩስ ዳዊታን አማነትድ፥ “ዳዊቲ ባ አሳን፥ እስራኤለን ዳሮ እፀትስ፤ ሄሳ ግሾ፥ እ ታዉ መርናዉ አይለ ግዳና” ያግድ ቆፕስ።