1 Sameela 26 - ጌሻ ማፃፋ

ዳዊቲ ዛርድካ ሳኦላ ዎና አግስ

¹ ዚፋ አሳይ ሳኦላኮ ግብአ ብድ፥ “ዳዊቲ ያስሞና ስንን ደእያ ሀክላ ዙማን ቆሰትስ?” ያግዶሶና።

² ሳኦል፥ እስራኤለታፐ ዶረትዳ ሄ ሙኩሉ አስ ኤክድ፥ ዳዊታ ኮያናዉ ዚፋ መላ ቢታ ብስ።

³ ሳኦል ያስሞና ስንን ደእያ ሀክላ ዙማ ቦላ ደእያ ኦግያ ማታን ዱንካንስ፤ ሽን ዳዊቲ ሄ መላ ቢታን ኡትስ። ሳኦል እያ ካልድ ይዳይሳ ዳዊቲ ኤርዳ ዎደ፥

⁴ ዎችያ አስ የድድ፥ ሳኦል ቱማ ሄ በሳ ጋክዳይሳ ሻክድ ኤርስ።

⁵ ዳዊቲ ደንድድ፥ ሳኦል ዱንካንዳ በሳ ብድ ሳኦልነ ቶራ ሞጮናይ ኔራ ናአይ አበኔር ዝንእዳ በሳ በእስ። ሳኦል ዱንካንዳ ጉታን ኦላንቾት እያ ዩሹዋ ተቅን እ ስክስ።

⁶ ዳዊቲ ህተ አድያ አብመለከነ ፃሩያ ናኣ እዮኣባ እሻ አብሳያ፥ “ሳኦል ዱንካንዳ በሳ ታራ ባናይ ኦኔ?” ያግድ ኦይችስ። አብሳይ፥ “ታኒ ኔራ ባና” ያግስ።

⁷ ሄሳ ግሾ፥ ዳዊቲነ አብሳይ ሄ ቃማ ኦላንቾታኮ ያ ዎደ ሳኦል ባ ሁጰ ሶን ቶራ ኤስድ፥ ዱንካንያ ግዶን ዝንእዳይሳ ደምዶሶና። አበኔርነ ኦላንቾት እያ ዩሹዋን ዝንእዶሶና።

⁸ አብሳይ፥ “ፆሳይ ነ ሞርክያ ሀች ነ ኩሸን አድ እሚስ፤ ታኒ ቶራን እያ እስ ቶሆ ሳአራ ኦይዳ ጫዳና፤ እያ ዛራ ጫዳናዉ ኮሸና” ያግስ።

⁹ ሽን ዳዊቲ አብሳያኮ፥ “ኔኒ እያ ዎፓ፤ ጎዳይ ትይዳ ካዋ ቦላ ባ ኩሽያ ደንያ ኦናካ ጎዳይ ሴራና።

¹⁰ ደኦ ጎዳይ ኤርያ መላ፥ ፆሳይ እያ ዎና፤ እ ባ ጋላሳን ዎይኮ ኦላን ሀይቃና።

¹¹ ጎዳይ ትይዳ ካዋ ቦላ ታ ኩሽያ ደንናዳ ታና ጎዳይ ተቆ። አነ እያ ሁጰ ሶን ደእያ ቶራነ ሃ ኦይክያ ሚሽያ ኤክድ ቦስ” ያግስ።

¹² ዳዊቲ ሳኦላ ሁጰ ሶን ደእያ ቶራነ ሃ ኦይክያ ሚሽያ ኤክን፥ ኤንቲ ብዶሶና። ኤንታ ኦንካ በእቤና ዎይኮ ኦንካ ኤርቤና ዎይኮ ኦንካ ባርክቤና። ጎዳይ ኤንታ ቦላ ዎልቃማ ስኮ የድዳ ግሾ ኡባይ ስኮ ሀይቅ አግዶሶና።

¹³ ዳዊቲ ሄፍን ፕንድ፥ ኤንታፈ ሃክድ ሀራ ደረ ቦላ ከይድ ኤቅስ።

¹⁴ ዳዊቲ ሳኦላ ኦላንቾታነ ኔራ ናኣ አበኔራ ፄግድ፥ “አበኔራ፥ ታኒ ፄግያ ዎደ ስእኪ?” ያግድ ዋስስ። አበኔር፥ “ቃላ ቁ ኦ ፄግድ ካዋ ስኮ ድገይ ኦኔ?” ያግስ።

¹⁵ ዳዊቲ፥ “ኔኒ ዎዛናማ አስ ግድኪ? እስራኤለ ግዶን ነ መላ አስ ኦኔ? ያትን፥ ካዋ፥ ነ ጎዳ አይስ ናግኪ? እስ አስ ካዋ፥ ነ ጎዳ ዎናዉ ብስ።

¹⁶ ነ ኦዳባይ ሎኦ ግደና። ደኦ ጎዳይ ኤርያ መላ፥ ነነ ነ ኦላንቾት ፆሳይ ትይዳ ህንተ ጎዳ ናግቦና ግሾ ህንተ ሀይቃናዉ በሴስ። ካዋ ቶራይነ እያ ሁጰ ሶን ደእያ ሃ ኦይክያ ሚሸይ አዉን ደእያኮ በአ” ያግስ።

¹⁷ ዳዊታ ቃላ ግደይሳ ሳኦል ኤርድ፥ “ታ ናአዉ ዳዊታ፥ ሄስ ነ ቃሌ?” ያግስ። ዳዊትቲ፥ “ኤ፥ ታ ጎዳዉ፥ ካዋዉ፥ ሄስ ታ ቃላ።

¹⁸ ታ ጎዳዉ፥ ታና ነ አይልያ ኔኒ አይስ ካላይ? ታኒ አይ ኦድና? ታ ባላይ አይቤ?

¹⁹ ታ ጎዳዉ፥ ካዋዉ፥ ኔኒ ነ አይልያ ቃላ ስአና መላ ታ ነና ዎሳይስ። ጎዳይ ነና ታ ቦላ ደንዳባ ግድኮ፥ እ ያርሾ ኤኮ። ሽን አስ ነና ደንዳባ ግድኮ፥ ‘ባዳ ሀራ ፆሳታ ጎይና’ ያግዶሶና። ጎዳ ቢታን ታዉ ደእያ ላታፐ ኤንቲ ታና ጎድዳ ግሾ ኤንቲ ጎዳ ስንን ባደትዳባ ግዶ!

²⁰ ሀእ ጎዳ ስንፈ ሃክድ፥ አላጋ ቢታን ደእያ ኡራ ሱ ጉሶፋ። እስ አስ ኩራቾ ሻንካታናዉ ደረ ቦላ ከየይሳዳ፥ እስራኤለ ካዎይ ካስቶለ ኮያናዉ ከይስ” ያግስ።

²¹ ሳኦል፥ “ታኒ ነና ቆሀስ። ታ ናአዉ፥ ዳዊታ፥ ሃ ስማ! ሀች ነ ታ ሸምፕዉ ሀይቆፐ አሽዳ ግሾ ታኒ ነና ዛራዳ ገንከ። ቱማ ታኒ ኤያባ ሀናስ፤ ግታ ባላ ባላስ” ያግስ።

²² ዳዊቲ ዛሪድ፥ “ካዋዉ፥ ነ ቶራይ ሀይስሽ፥ ነ አሳፐ እስ አስ ይድ ኤኮ።

²³ እስ እስ አሳስ እያ ፅሎተ መላነ እያ አማነተ መላ ጎዳይ ጋተ ቃንፄስ። ሀች ጎዳይ ነና ታ ኩሸን አድ እሚስ፤ ሽን ጎዳይ ትይዳ ካዋ ቦላ ታኒ ታ ኩሽያ ዎናዉ ኮያብከ።

²⁴ ሀች ነ ሸምፑዋ ታ አሽዳይሳዳ ጎዳይ ታና መቶ ኡባፈ አሽድ ቦንቾ” ያግስ።

²⁵ ሳኦል፥ “ታ ናአዉ፥ ዳዊታ፥ ኔኒ አንጀታ። ኔኒ ግታባ ኦና፤ ነዉ እንጀታና” ያግስ። ዳዊቲ ባ ኦግያ ብስ፤ ሳኦልካ ባ ሶ ስምስ።