1 Sameela 25 - ጌሻ ማፃፋ

ዳዊታ ፥ ናባላነ አብግያ

¹ ሳሜል ሀይቅን፥ እስራኤለ አሳ ኡባይ ሺቅድ፥ እያዉ ዬክዶሶና፤ ራማ ካታማን እያ ሞግዶሶና። ሄሳፈ ጉየ፥ ዳዊቲ ማኦና መላ ቢታ ብስ።

² ማኦና መላ ቢታን፥ ቃርመሎሳን ሻሎይ ደእያ እስ ዱረ አደይ ደኤስ። እያዉ እስ ሙኩሉ ዴሻትነ ሄ ሙኩሉ ዶርሳት ደኦሶና። እ ኤንታ እክስያ ቃርመሎሳን ሜዴስ።

³ ሄ አድያ ሱንይ ናባላ፥ እ ካለባ ያራ፤ እያ ማቸ ሱንይ አብግያ። እያ አኬካንቾነ ማላ ሎኦ ማጫስ፥ ሽን እ አዝናይ ዎዛን ባይና ኢታ አስ።

⁴ ዳዊቲ መላ ቢታን ደእሸ፥ ናባል ዶርሳ እክሰ ሜደይሳ ስእስ።

⁵ ዳዊቲ ታሙ ፓንታ ሀይሳዳ ያግድ ኪትስ፤ “ናባላኮ ቃርመሎሳ ብድ፥ ታ ሱንን እያ ሳሮተ።

⁶ ‘ነ ባረይ አዱቆ! ሳሮይ ነዉነ ነ ሶ አሳስ ግዶ፤ ነዉ ደእያ ኡባስ ሳሮይ ግዶ!

⁷ ነ ዶርሳ እክሰ ሜደይሳ ታኒ ስአስ፤ ነ ዶርሳ ሄመይሳት ኑራ ደእዳ ዎደ ኑኒ ኤንታ ገንቦኮ፤ ኤንቲ ቃርመሎሳን ደእዳ ዎደ ኡባን ኤንታባፐ አይብካ ፓጭቤና።

⁸ ሄሳ ኔኒ ነ አይለታ ኦይችኮ ኤንቲ ነዉ ኦዳና። ኑኒ ሀች ግብራ ጋላስ ኔኮ ይዳ ግሾ፥ ታ ፓንታስ ሀያና ኬሀ። ነ ኩሸን ደእያባፐ ነ አይለታስነ ነ ናኣ ዳዊታስ ሀያና እማ’ ያግተ” ያግድ ኪትስ።

⁹ ዳዊታ አሳት ናባላኮ ጋክድ፥ ዳዊታ ሱንነ ኪታ እያዉ ኦድድ፥ እ ጋናባ ናግሸ ያን ኡትዶሶና።

¹⁰ ናባል፥ “ዳዊቲ ኦኔ? እሰየ ናአይ ኦኔ? ሀ ዎድያን ዳሮ አይለት ባንታ ጎዳታፐ ባቃቶሶና።

¹¹ ታ ካ፥ ታ ሃነ ታ ዶርሳታ ሜደይሳታስ ሹከትዳ አሹዋ ኤካዳ፥ ጉዬይ ኤረቶና አሳስ አይስ እሞ?” ያግስ።

¹² ዳዊቲ አሳት ጉየ ስም ብድ ናባል ግዳባ ኡባ ዳዊታስ ኦድዶሶና።

¹³ ዳዊቲ፥ “ህንተ ማሻ ዳንጭተ” ያግን፥ ኡባይ ባንታ ማሻ ዳንጭዶሶና፤ ዳዊቲካ ባ ማሻ ዳንጭስ። ዳዊቲ ኦይዱ ፄቱ ግድያ አሳታራ ደንድድ ብስ፤ ናምኡ ፄቱ አሳይ ኤንታባ ናግድ አትስ።

¹⁴ ናባላ አይለታፐ እሶይ ናባላ ማቸ አብግያኮ ሀይሳዳ ያግስ፤ “ዳዊቲ መላ ቢታን ደእሸ ኑ ጎዳ ሳሮ ጋናዉ አሰ ኪትስ፥ ሽን እ ኤንታ ጫይድ የድስ።

¹⁵ ግዶሽን፥ ሀ አሳት ኑስ ዳሮ ሎኦ፤ ኤንቲ ኑና ገንቦኮና፤ ኑኒ ኤንታራ ባዞን ፔእዳ ዎደ ኡባን ኑባፐ አይኮይካ ፓጭቤና።

¹⁶ ኑኒ ኑ ዶርሳ ዉድያ ኤንታ ማታን ሄምያ ዎደ፥ ቃማነ ጋላስ ኤንቲ ኑስ ድርስ ግድዶሶና።

¹⁷ ኑ ጎዳ ቦላነ እያ ሶ አሳ ቦላ ኢታባይ ጋካና ሀንያ ግሾ፥ ሀያና ሀ ኦዳ ዋታነኮ ቆፓ። ኑ ጎዳይ አሳ ዞረ ስኦና ኢታ አስ ግድያ ግሾ፥ ኦንካ እያ ሃሳይሳናዉ ዳንዳኤና” ያግስ።

¹⁸ አብግያ ኤሶን ናምኡ ፄቱ ኡይ፥ ናምኡ ኦጎሮ ዎይነ ኡሹ፥ እቻሹ ጫጨትዳ ዶርሳታ፥ እሻታሙ ክሎ ግራመ ጫጨትዳ ትያ፥ እስ ፄቱ ኡከትዳ ዎይነ ሞርኤነ ናምኡ ፄቱ ባላሰ ኑካ ኤካዳ ሀረታ ቦላ ጫናሱ።

¹⁹ ባ አይለታኮ፥ “ህንተ ስንትድ ቢተ፤ ታ ህንተና ካላና” ያጋሱ፤ ሽን ባ አዝና ናባላስ አይኮካ ኦዳቡኩ።

²⁰ ባ ሀርያ ቶጋዳ ዙማ ሎቡዋ ዱገ ዎያ ዎደ ዳዊቲነ እያ አሳይ ይሸ ኢራ ጋሄትዶሶና።

²¹ ዳዊቲ፥ “እያባፐ አይኮይካ ፓጮና መላ ታኒ ሀ አድያ ሻሉዋ ናግዳይ ጮ መላ፤ ታኒ ኦዳ ሎኦ ኦሱዋስ እ ታዉ ኢታ ኩሸ ዛርስ።

²² ዎንቶ ዎንታ ጋካናዉ፥ እያባ ግድዳ አደታፐ እሱዋ ታ ፓፃ አግኮ፥ ፆሲ ታና ፕርዶ” ያግስ።

²³ አብግያ ዳዊታ በእዳ ዎደ ሀርያፐ ኤሶታ ዎዳ፥ ዳዊታ ስንን ጉፋናዳ ዝጋሱ።

²⁴ እያ ቶሁዋ ቦላ ኩንዳዳ፥ “ታ ጎዳዉ፥ ታ ባላይ ታ ቦላ ግዶ! ታ እስባ ኦዳና፤ ታ ነ አይልያ ግያባ ስአ።

²⁵ ሀ ዎዛን ባይና አደይ፥ ናባል ግያባ ስኦፓ፤ እ ባ ሱንዳ ኤያ። ታ ጎዳዉ፥ ነ ኪትዳ አሳታ ታ ነ አይልያ በአብከ።

²⁶ ደኦ ጎዳይ ኤርያ መላ፥ ነ ሸምፖይ ኤርን፥ ነ ሱ ጉሶናዳነ ሀሎ ከዮናዳ ነና ተቅዳይ ጎዳ። ነ ሞርከትነ ነና ቆሀናዉ ኮየይሳት ናባላዳ ሀኖ።

²⁷ ሀ እሞታይ ታኒ ነ አይልያ ነዉ፥ ታ ጎዳስ ኤህዳይስ ነና ካልያ አሳታስ እመቶ።

²⁸ ታ ጎዳዉ፥ ነ አይለ ናጋራ አቶ ያጋ! ኔኒ ጎዳ ኦላ ኦለትያ ግሾ፥ ጎዳይ ነናነ ነ ሼሻ ካዎያና። ነ ደኦ ላይ ኡባን ኢታተ ነ ቦላ በንቶፎ።

²⁹ አይ አስካ ነና ዎናዉ ኮይኮ፥ እስ አስ ባ አልኦ ሻሉዋ ናገይሳዳ ጎዳይ፥ ነ ፆሳይ ነና ሳሮ ናጋና። ሽን ያምባርሻን ሹቹ ሆለይሳዳ እ ነ ሞርከታ ሆላና።

³⁰ ጎዳይ፥ ታ ጎዳስ ኦናዉ ቃላ ገልዳ ኬሀተ ኡባ ኦያ ዎደነ እስራኤለ ቦላ ካዎያ ዎደ፥

³¹ ታ ጎዳይ አዛንያ ጋሶይ ዎይኮ ቂሮያባይ ባዋ። ጋሶይ ባይና ሱ ጉስዳባይ ዎይኮ ሀሎ ከይዳባይ ባይና ግሾ ነ ዎዛናይ ዳጋመና። ጎዳይ ነዉ ሎኦባ ኦዳ ዎደ ታና ነ አይልዉ ዶጎፓ” ያጋሱ።

³² ዳዊቲ አብግያኮ፥ “ታራ ጋሄታና መላ ሀች ነና ኪትዳ ጎዳይ፥ እስራኤለ ፆሳይ ጋላተቶ።

³³ ታኒ አሳ ሱ ጉሶናዳነ ሀሎ ከዮናዳ ነ ሎኦ ቆፋይ ታና ተቅዳ ግሾ ኔኒ አንጀታ።

³⁴ ታ ነና ቆሆናዳ ተቅዳ ደኦ ጎዳይ፥ እስራኤለ ፆሳይ ኤርያ መላ ነ ታራ ጋሄታናዉ ኤለሳዳ ዮናኮ፥ ሳእ ዎንታና ጋካናዉ ናባላ አሳፐ እስ አደይካ ፓፃ አተና” ያግስ።

³⁵ አብግያ እያዉ ኤህዳ እሞታ እ ኩሸፐ ዳዊቲ ኤክድ፥ “ነ ሶ ሳሮ ባ፤ ታኒ ነ ግዳባ ስአስ፤ ነ ኦይሻካ ኤካስ” ያግስ።

³⁶ አብግያ ስማዳ ናባላኮ ያ ዎደ፥ ካዎ ሶን ጊግያ ግብራ መላ ግብራ ሙዝሸ ሶን ኡትስ። ናባል ዳሮ ማትድ፥ ባ ዎዛናን ኡፋይትያ ግሾ ሳእ ዎንታና ጋካናዉ አብግያ እያዉ አይኮካ ኦዳቡኩ።

³⁷ ዎንታ ናባላ ማይ ስምዳፐ ጉየ፥ እያ ማችያ ሀንዳባ ኡባ እያዉ ኦዳሱ፤ ናባላ ዎዛናይ ዎን፥ እ ዳቡርስ።

³⁸ ታሙ ጋላሳፐ ጉዬ ጎዳይ ናባላ ሾጭን፥ እ ሀይቅስ።

³⁹ ናባል ሀይቅዳይሳ ዳዊቲ ስእዳ ዎደ፥ “ጎዳይ ጋላተቶ! ናባል ታና ጫይዳይሳ ሀሎ ጎዳይ ከስስ። ታኒ እያ አይለይ ኢታባ ኦና መላ ታና ተቅስ። ናባል ኦዳ ኢታባ ጎዳይ እያ ቦላ ዛርስ” ያግስ። ሄሳፈ ጉየ፥ ዳዊቲ አብግያ ኤካናዉ ኮይድ ኪታ የድስ።

⁴⁰ ዳዊታ አይለት ቃርመሎሳን ደእያ አብግያኮ ብድ፥ “ዳዊቲ ነና ማቻናዉ ዶስዳ ግሾ ኑኒ ነና ኤካናዉ ይዳ” ያግዶሶና።

⁴¹ አብግያ ጉፋና ዝጋዳ፥ “ታኒ ነ አይልያ ነዉ ኪተታናዉነ ነ አይለታ ቶሁዋ ሜጫናዉ ጊገታ ኡታስ” ያጋሱ።

⁴² አብግያ ኤለሳ ደንዳዳ ባ ሀርያ ቶጋሱ፥ እያ ባ እቻሹ ማጫ አይለታራነ ዳዊታ ኪትዳ ኣሳራ ባዳ ዳዊታ ገላሱ።

⁴³ ዳዊቲ ካሰ እዝራኤለ ማጫስዉ አክናሆሞ ኤክድ ደኤስ፤ ኤንቲ ናምአይ እያ ማቸታ።

⁴⁴ ሳኦል ዳዊታ ማችዉ፥ ባ ናእዉ መልኮሎ ጋልማ አድያ ሌሳ ናኣ ፋልፃስ እሚስ።