1 Sameela 24 - ጌሻ ማፃፋ

ዳዊቲ ሳኦላ ዎና አግስ

¹ ሳኦል ፍልስፄመታ ኦልድ ስምዳፐ ጉየ፥ ዳዊቲ ኤንጋዳ ባዙዋን ደኤስ ገይሳ ስእስ።

² ሳኦል እስራኤለ ግዶፈ ዶረትዳ ሄ ሙኩሉ አሳ ኤክድ፥ ዳዊታነ እያ አሳ ኮያናዉ፥ “ባዞ ዴሻታ ዛላ” ጌተትያ በሳ ማታ ብስ።

³ ሳኦል ኦግያ ዶናን ዶርሳ ግርብያ ማታን ደእያ ጎንጎሉዋ ግዶ ገልድ ሼአናዉ ኡትስ። ዳዊቲነ እያ አሳይ ጎንጎሉዋስ ጉየ ባጋራ ሺቅድ ኡትዶሶና።

⁴ ዳዊታ አሳይ፥ “ ‘ሄኮ፥ ታኒ ነ ሞርክያ ነ ኩሸን አ እማና፤ ኔኒ እያ ቦላ ኮይዳባ ኦና’ ያግድ ጎዳይ ነዉ ኦድዳ ጋላሳይ ሀች” ያግዶሶና። ዳዊቲ ሳኦላ ኤርሶና ሺቅድ ሳኦላ ማኡዋ ማጫራፐ ቃንፅ ኤክስ።

⁵ ዳዊቲ ሳኦላ ማኡዋ ማጫራ ቃንፅዳ ግሾ እያ ዎዛናይ ቂሮትስ።

⁶ ዳዊቲ ባ አሳኮ፥ “ጎዳይ ትይዳ ካዋ፥ ታ ጎዳ ቦላ ታኒ ሄሳ ኦናይስ ዎይኮ እያ ቦላ ታ ኩሽያ ደንናይስ ታፐ ሃኮ፤ ጎዳይ ትይድ እያ ካዎስ” ያግስ።

⁷ ዳዊቲ ሀይሳዳ ግድ፥ ሳኦላ ባ አሳን ቦሽሶና ድግስ። ሳኦል ጎንጎሉዋ ግዶፈ ከይድ ባ ኦግያ ብስ።

⁸ ሳኦል ብዳፐ ጉየ፥ ዳዊቲ ጎንጎሉዋ ግዶፈ ከይድ፥ “ታ ጎዳዉ፥ ካዋዉ” ያግድ ሳኦላ ፄግን፥ ሳኦል ጉየ ስሚድ ፄልስ። ዳዊቲ ሳአን ጉፋንድ ሳኦላስ ዝግስ።

⁹ ዳዊቲ ሳኦላኮ፥ “ዳዊቲ ነና ቆሀናዉ ኮዬስ” ግያ አሳ ኔኒ አይስ ስአይ?

¹⁰ ሀች ሀ ጎንጎሉዋን ጎዳይ ነና ታዉ አድ እምዳይሳ ኔኒ ነ አይፈን በአዳሳ። ታኒ ነና ዎና መላ ጉ አሳት ታና ደንዶሶና። ሽን፥ “እ፥ ጎዳይ ትይድ ካዎዳይሳ ግድያ ግሾ ታኒ ታ ጎዳ ቦላ ታ ኩሽያ ደንከ” ያጋዳ ነና አጋስ።

¹¹ ታ አዋዉ፥ ታ ኩሸን ደእያ ነ ማኡዋ ማጫራ ሀይሳ ፄላ። ነ ማኡዋ ማጫራፐ ቃንፃ ኤካስ፥ ሽን ነና ዎብከ። ታኒ ነና ቆሆናይሳነ ነ ቦላ ማካሎናይሳ አኬካ፤ ታኒ ነና ቆሀብከ፥ ሽን ኔኒ ታና ዎናዉ ሻንካታሳ።

¹² ነባነ ታባ ጎዳይ ፕርዶ፤ ጎዳይ ኔኒ ታና ቆህዳይሳ ሃሉዋ ከሶ፥ ሽን ታኒ ነ ቦላ ታ ኩሽያ ደንከ።

¹³ “ኢታ ኦይሳታፐ ኢት ከዬስ” ግያ በን ሌምሶይ ደኤስ። ሄሳ ግሾ፥ ታኒ ነና ኩሸንካ ቦችከ።

¹⁴ “እስራኤለ ካዎይ ኦደ ቦላ ደንዲ? ኦና ኦይካናዉ ካሊ? ሀይቅዳ ካና ዎይኮ ካስቶለ ጎድዬ?

¹⁵ ጎዳይ ኑ ቦላ ዳናቶ፤ ነባነ ታባ እ ፕርዶ፤ ታ ግሾ እ ሞተቶ፤ ነ ኩሸፐ ታና እ አሾ” ያግስ።

¹⁶ ዳዊቲ ሃሳያ ዉርስዳ ዎደ ሳኦል ዳዊታኮ፥ “ታ ናአ ዳዊታ፥ ሄስ ነ ቃሌ?” ያግድ ሳኦል ባ ቃላ ቁ ኦድ ዬክስ።

¹⁷ “ኔኒ ታፐ አዳ ፅሎ፤ ታኒ ነዉ ኢታባ ኦን፥ ኔኒ ታዉ ሎኦባ ኦዳሳ።

¹⁸ ጎዳይ ታና ሀች ነዉ አድ እምን ኔኒ ታና ዎቦና ግሾ ኔኒ ታዉ ሎኦባ ኦዳ በሳዳሳ።

¹⁹ አስ ባ ሞርከ ደምድ ቆሆና የድዬ? ኔኒ ታዉ ሀች ኦዳ ኬሀተ ግሾ፥ ጎዳይ ነና አንጆ።

²⁰ ኔኒ እስራኤሌ ካዎ ግዳናይሳነ እስራኤለ ካዎተይ ነ ማታ ጋርሳን ኤቃናይሳ ታ ኤራይስ።

²¹ ህዛ ታ ኮቻ ይሶና መላነ ታ ሱን ታ አዋ ሶ አሳ ግዶፈ ቁቾና መላ ጎዳ ሱንን ታዉ ጫቃ” ያግስ።

²² ዳዊቲ ሳኦላስ ጫቅስ። ሄሳፈ ጉየ፥ ሳኦል ባ ሶ ስሚድ ብስ፤ ዳዊቲነ እያ አሳይ ባንታ ሚፃ ብዶሶና።