1 Sameela 21 - ጌሻ ማፃፋ

ዳዊቲ ሳኦላፐ ባቃትስ

¹ ዳዊቲ ካህንያ አብመለከኮ ኖባ ብስ። አብመለከይ ዳዊታራ ጋሄታናዉ ኮኮርሸ ይድ፥ “ኔኒ ነርካ ዋናዳ ያዲ? ኔራ አስ ዋንድ ባዌ?” ያግድ ኦይችስ።

² ዳዊቲ ካህንያ አብመለከ፥ “ካዎይ ታኮ፥ ‘ታኒ ነና ኪትዳ ኪታነ ታ ነዉ ኦድዳባ ኦንካ ኤሮፖ’ ያግድ ታና ኪትስ። ታ አሳት እስ በሳን ታራ ጋሄታና መላ ኦዳ ዎስ።

³ ሀእ ነ ኩሸን አይብ ደኢ? እቻሹ ኡይ ዎይኮ ነዉ ደእያባ ታዉ እማ” ያግስ።

⁴ ካህነይ ዛሪድ፥ “ጮ አስ ምያ ኡይ ታዉ ባዋ፤ ሽን ነ አሳት ባንታና ማጫሳፐ ናግዳባ ግድኮ፥ ኤንቲ ማናዉ ዳንዳእያ ጌሻ ኡይ ደኤስ” ያግስ።

⁵ ዳዊተይ ዛሪድ፥ “ቱማ ኑኒ ሀ ኪታ ኤክድ ከይዳፐ ዶምድ፥ ማጫሳፐ ናገትዳ፤ ሀር አቶሽን ሀራ ኪታካ ኤክድ ከይያ ዎደ ኤንቲ ባንታ ጌሻተ ናጎሶና። ሽን ሀች ዋንድ ጌያናዉ ኮሸኔ?” ያግስ።

⁶ ሄሳ ግሾ፥ ካህነይ ዳዊታስ ጌሻ ኡይ እሚስ። ካህንያስ ደእያ ኡይይ፥ ጎዳ ስንን ዎናዉ ሄ ጋላስ ሆኦ ኡይራ ላመትዳ ኡይፈ አትሽን፥ ሀር ባዋ።

⁷ ሳኦላ አይለታፐ እሶይ፥ እያ መህያ ሄመይሳታ ሀላቃይ፥ ዶይቃ ጌተትያ ኤዶመ አደይ፥ ሄ ጋላስ ጎዳ ስንን ናግሸ ደኤስ።

⁸ ዳዊቲ አብመለከኮ፥ “ቶር ዎይኮ ማሽ ነዉ ዳንዴሻ? ካዋ ኪታይ ኤሶያ ግሾ ታኒ ታ ማሻ ዎይኮ ሀራ ኦላ ሚሸ ኤሀብከ” ያግድ ኦይችስ።

⁹ አብመለከይ፥ “ኔኒ ኤላ ዛንጋራን ዎዳ ፍልስፄመ አድያ ጎልያዳ ማሻይ ሀይሳን ደኤስ፤ ጩርቃራ ፃፀትድ፥ ኤፉደ ማኡዋፐ ጉየ ባጋራ ደኤስ። ኔኒ ኮያባ ግድኮ እያ ኤካ፤ እያፐ አትሽን፥ ሀራ ማሽ ሀይሳን ባዋ” ያግስ። ዳዊቲ፥ “እያ መላ ማሽ ባዋ፤ እያ ታዉ ሀማ” ያግስ።

¹⁰ ሄ ጋላስ ዳዊቲ ሳኦላፐ ባቃትድ፥ ጋተ ካዋ አንኩሳኮ ብስ።

¹¹ ሽን አንኩሳ ሞርናት፥ “ሀይስ ዳዊቲ ባ ቢታን ካዎ ግደኔ? ማጫሳይ የፅሸነ ዱርሸ፥ ‘ሳኦል ሙኩሉ ዎስ፤ ዳዊቲ ታሙ ሙኩሉ ዎስ’ ያግድ ሳቢዳ አድያ ግደኔ?” ያግዶሶና።

¹² ዳዊቲ ኤንታ ሃሳያ ባ ዎዛናን ስእድ፥ ጋተ ካዋ አንኩሳ ዳሮ ያይስ።

¹³ ሄሳ ግሾ፥ ዳዊቲ ኤንታ ስንን ጎሹ ዳንስ። ኤንቲ እያ ኦይካና ሀንያ ዎደ ጎሻዳ ፐንገ እብ ቃጨ ኦይክስ፤ ቡቻራ ሳሶ ቆልስ።

¹⁴ አንኩስ ባ ኦሳንቾታኮ፥ “ሄኮ፥ ሀ አደይ ጎዬስ፤ ህንተ አይስ እያ ታኮ ኤህደቲ?

¹⁵ ሀ አደይ ታ ስንን ጎያናዳ ህንተ ኤህዳይ፥ ታ ማታን ሀር ጎየይ ይነዬ? ሀ አደይ ታ ሶ ገላናዉ በሲ?” ያግስ።