1 Sameela 20 - ጌሻ ማፃፋ

ዮናታን ዳዊታ ማድስ

¹ ዳዊቲ ራማን ደእያ ናዮታፐ ባቃትድ፥ ዮናታናኮ ብድ፥ “ታኒ አይ ኦድና? ታ ባላይ አይቤ? ነ አዋይ ታና ዎናዉ ኮየይ ታኒ እያ አይ ቆህኔ?” ያግድ ኦይችስ።

² ዮናታን፥ “ሄስ ኔፐ ሃኮ፤ ኔኒ ሀይቃካ። ጉባ ግድን፥ ግታባ ግድን፥ ታ አዋይ ታፐ ቆስድ አይኮካ ኦና። ታ አዋይ ታፐ አይስ ሄሳ ቆስዴ? ሄስ ሀነና” ያግድ ዛርስ።

³ ሽን ዳዊቲ፥ “ነ ታና ዶሰይሳ ነ አዋይ ሎይ ኤሬስ። እ ባ ዎዛናን፥ ዮናታን ሀ ኦዳ ኤሮፖ፤ እ ኤርኮ አዛናና” ያግስ። ሽን፥ “ደኦ ፆሲ ኤርያ መላ፥ ነ ሸምፖይ ኤሮ፤ ታፐነ ሀይቆፐ ግዶን እስ ታንጎ ፃላል አትስ” ያግድ ጫቅስ።

⁴ ዮናታን፥ “ኔኒ ኦ ግዳባ አይባካ ታኒ ነዉ ኦና” ያግስ።

⁵ ዳዊቲ ዛሪድ፥ “ዎንቶ አጌና ፄሮ ባኣለ ቦንችያ ጋላስ፤ ታኒ ካዉዋራ ካ ማናዉ ኮሼስ። ሽን ዎንት ፔእን ኦማርስ ጋካናዉ ታኒ ጋደን ቆሰታና።

⁶ ነ አዋይ ታና ኮይኮ፥ ኔኒ፥ ‘ዳዊቲ ባ አሳራ ላይ ያርሾ ያርሽያ ዎደ ግድያ ግሾ ባ ሶ ቤተለመ ባናዉ ታና ኦይችድ ብስ’ ያጋ።

⁷ እ፥ ‘ያኮ ሎኦ’ ጊኮ፥ ታዉ ነ አይልያስ ሳሮ፤ ሽን እ ሀንቀትኮ፥ እ ታና ቆሀናዉ ባ ዎዛናን ቆፕዳይሳ ሄሳን ኤራ።

⁸ ሽን ኔኒ ታዉ ነ አይልያስ ሎኦባ ኦ፤ ኔኒ ታራ ነ አይልያራ ጎዳ ስንን ጫቃዳሳ። ታኒ ባላ ግድኮ፥ ታና ነ ዎ፤ ነ አዋስ ታና አዳ እሞፋ” ያግስ።

⁹ ዮናታን፥ “ሄስ ኔፐ ሃኮ፤ ታ አዋይ ነና ቆሀናዉ ቆፕዳባ ታ ኤርዳኮ፥ ነዉ ኦድክና?” ያግስ።

¹⁰ ዳዊቲ “ነ አዋይ ነዉ ኢታ ዛሮ ዛርኮ፥ ታዉ ኦዳናይ ኦኔ?” ያግድ ኦይችስ።

¹¹ ዮናታን፥ “ሃያ፤ ጋደ ቦስ” ያግን፥ ናምአይ ጋደ ብዶሶና።

¹² ዮናታን ዳዊታኮ፥ “ጎዳይ እስራኤለ ፆሳይ ኤሮ፥ ታኒ ዎንት ፔእን ታ አዋይ ነባ ግያባ ስአዳ ነዉ እ ቆፕያ ቆፋይ ሎኦ ግድኮ ታኒ ኪታዳ ነና ኤርሳና።

¹³ ሽን ታ አዋይ ነና ቆሀናዉ ኮያባ ግድኮ፥ ሄሳ ታኒ ነና ኤርሶናነ ኔኒ ሳሮን ከሳ ኤካና መላ ኦና እፅኮ፥ ጎዳይ ታና ፕርዶ፤ ጎዳይ ታ አዋራ ግድዳይሳዳ ኔራ ግዶ።

¹⁴ ታ ደኦ ላይ ኡባን ታ ሀይቆና መላ ጎዳ ሲቁዋ ታና በሳ።

¹⁵ ጎዳይ ዳዊታ ሞርከታ ኡባ ቢታፈ ይስያ ዎደካ ነ ሲቁዋ ታ ሶ አሳስ በሳ” ያግስ።

¹⁶ ሄሳ ግሾ፥ ዮናታን፥ “ጎዳይ ዳዊታ ሞርከታ ፕርዶ” ያግድ ዳዊታ ሶ አሳራ ጫቅስ።

¹⁷ ዮናታን ዳዊታ ባ ሁጰዳ ዶስያ ግሾ፥ “ኔኒ ታና ቱማ ዶሰይሳ ቆንጭሳናዉ ታዉ አነ ናምአን ጫቃ” ያግስ።

¹⁸ ሄሳፈ ጉየ፥ ዮናታን፥ “ዎንቶ አጌና ፄሮ ባኣለ ቦንችያ ጋላስ፤ ኔኒ ኡትያ በሳይ መላ አትኮ ነ ባይናይስ ኤረታና።

¹⁹ ዎንት ፔእን ኦማርስ ባዳ፥ ሀ መቶይ ዶምዳ ጋላስ ኔኒ ቆሰትዳ በሳን፥ ኤፀላ ዛላፈ ጉየራ ቆሰታ።

²⁰ ታኒ እስባ ቦላ ፆንግያ አሳዳ ሀናዳ ሄ ዶንገ ቶራታ ሄ ዛላ ምየ የዳና።

²¹ ሄሳፈ ጉየ፥ ‘ባዳ ዶንገ ቶራታ ኮያ’ ያጋዳ እስ ናአ ኪታና። ታኒ እያኮ፥ ‘ዶንገ ቶራት ኔፐ ሀ ባጋራ ደኦሶና፤ ሃ ኤካዳ ያ’ ግያባ ግድኮ፥ ሃያ፤ ደኦ ጎዳይ ኤርያ መላ፥ ነዉ ሳእ ሳሮ፤ ነና አይኮይካ ቦቸና።

²² ሽን ታኒ ናኣኮ፥ ‘ዶንገ ቶራት ኔፐ ህን ባጋራ ደኦሶና’ ግያባ ግድኮ፥ ኔኒ አጋዳ ባ፤ ጎዳይ ነ ባና መላ ኮይያ ግሾ ባ።

²³ ኔራ ታራ ኦደትዳ ኦዳስ ጎዳይ ኑ ግዶን መርናዉ ማርካ” ያግስ።

²⁴ ሄሳ ግሾ፥ ዳዊቲ ጋደን ቆሰትስ። አጌና ፄሮ ባኣለ ቦንችያ ጋላስ ጋክዳ ዎደ ካዎይ ሳኦል ግብራ ቦላ ኡትስ።

²⁵ ካዎይ ባ ኡትያ በሳን ጎዳ ማታን ኡትስ፤ ዮናታን እያፐ ስን ባጋን፥ አበኔር ሳኦላ ማታን ኡትስ፤ ሽን ዳዊታ በሳይ መላ ደኤስ።

²⁶ ሳኦል ሄ ጋላስ አይኮካ ግቤና። ሳኦል ባ ዎዛናን፥ “ዳዊቲ ዎጋዳ ጌዮና መላ እስባይ እያ ጋክስ፤ እ ጌይቤና” ያግድ ቆፕስ።

²⁷ ሽን ዎንተ ጋላስ፥ አጌናይ ፄርን ናምአን ጋላስ ዳዊታ በሳይ መላ ደኤስ። ሳኦል ባ ናኣ ዮናታና ፄግድ፥ “እሰየ ናአይ ዝነካ ሀችካ ግብራ ማናዉ አይስ ይበኔ?” ያግድ ኦይችስ።

²⁸ ዮናታን፥ “ዳዊቲ ቤተለመ ባና ግድ ታና ምንድ ኦይችስ።

²⁹ እ ታኮ፥ ‘ኑ ሶ አሳይ ካታማን ያርሾ ያርሽያ ግሾነ ታ ያን በንታና መላ ታ እሻይ ታና ኪትዳ ግሾ ታና የዳርክ። ታ ነ ስንን ሳባ ደምዳባ ግድኮ ታኒ ታ እሻታ በአና መላ ታና የዳ’ ያግድ ኦይችስ። ካዋ ግብራፐ ማናዉ እ ዮናይ ሄሳ ግሾሳ” ያግድ ዛርስ።

³⁰ ሳኦል ዮናታና ቦላ ሸነ ኤፅ ከይድ፥ “ላ፥ ጌላነ ማካላንቾ ማጫሰ ናአዉ፥ ኔኒ ነዉ ካዉሸ፥ ነ አየስ ዬላ ኤሀናዉ እሰየ ናኣራ ላገተይሳ ታ ኤርክናዬ?

³¹ እሰየ ናአይ ሀ ሳአ ቦላ ደእዳ ፔሻን ነ ዎይኮ ነ ካዎተይ ኤቀና። ሀእ ኪታዳ ኤለ ኤህሳ፤ እ ሀይቃናዉ በሴስ” ያግስ።

³² ዮናታን ባ አዋ፥ “እ አይስ ሀይቂ? እ አይ ኢታባ ኦዴ?” ያግድ ኦይችስ።

³³ ሳኦል ዮናታና ዎናዉ ቶራ እያ ቦላ ፆንግስ። ሄሳ ግሾ፥ ዮናታን ባ አዋ ሳኦል፥ ዳዊታ ዎናዉ ቆፕዳይሳ ጌሽድ ኤርስ።

³⁴ ዮናታን ሸነትድ ግብራ ቦላፈ ደንድስ፤ ባ አዋይ፥ ዳዊታ ካዉሽዳ ግሾ ዮናታን አዛንድ፥ አጌና ፄሮ ባኣለ ቦንችያ ናምአን ጋላስ ካ ምቤና።

³⁵ ዮናታን ባራ እስ ናአ ኤክድ ዎንታ ጉራ ዳዊታራ ጋሄታናዉ ጋደ ብስ።

³⁶ ዮናታን፥ “ታኒ ዱክያ ዶንገ ቶራታ ዎፃ ባዳ ኤካዳ ያ” ያግስ። ናአይ ዎፅያ ዎደ እስ ዶንገ ቶራ ሄፍን ዱክስ።

³⁷ ናአይ ዮናታና ዶንገ ቶራይ ዎዳ በሳ ጋክያ ዎደ ዮናታን ናኣ ፄግድ፥ “ዶንገ ቶራይ ኔፐ ህን ባጋራ ደኤኔ?”

³⁸ ዮናታን ናኣ፥ “ኤለሳ፤ ባ፤ ኤቆፋ” ያግድ ባ ቃላ ቁ ኦድ ኦድስ። ናአይ ዶንገ ቶራ ማፅድ ባ ጎዳስ ኤህስ።

³⁹ ዮናታናፐነ ዳዊቲፐ አትሽን፥ ናአይ ሄ ፁራ ኤረና።

⁴⁰ ዮናታን ባ ኦላ ሚሽያ ናኣስ እምድ፥ “ሀይሳ ካታማ ኤካዳ ባ” ያግስ።

⁴¹ ናአይ ብዳፐ ጉየ፥ ዳዊቲ ሄ ዛላ ጉየፐ ከይድ ዮናታና ስንን ጉልባትድ፥ ባ ሶምኡዋ ሳአ ጋድ ሄ ቶሆ ዝግስ። ሄሳፈ ጉየ፥ እሶይ እሱዋራ ዬረትድ ዬክዶሶና፥ ሽን ዳዊቲ ዮናታናፐ አ ዬክስ።

⁴² ዮናታን፥ “ሳሮ ባ፤ ‘ነ ግዶንነ ታ ግዶን፥ ነ ኮቻ ግዶንነ ታ ኮቻ ግዶን፥ ጎዳይ መርናዉ ማርካ ግዶ’ ያግድ ኑ ናምአይ ጎዳ ሱንን ጫቅዳ” ያግስ። ሄሳፈ ጉየ፥ ዳዊቲ ደንድድ ብስ፤ ዮናታንካ ካታማ ጉየ ስምስ።