1 Sameela 19 - ጌሻ ማፃፋ

ሳኦል ዳዊታ ዎናዉ ኮይስ

¹ ዳዊታ ዎና መላ ሳኦል ባ ናኣ ዮናታናስነ ባ ኦሳንቾታስ ኦድስ። ሽን ሳኦላ ናአይ ዮናታን ዳዊታ ዳሮ ዶሴስ።

² ሄሳ ግሾ፥ ዮናታን ዳዊታኮ፥ “ታ አዋይ ሳኦል ነና ዎናዉ ኮይያ ግሾ ዎንቶ ዎንታ ነና ናጋ፤ እስ በሳን ቆሰታዳ ደኣሻ።

³ ታኒ ታ አዋራ ባዳ፥ ኔኒ ቆሰትዳ ጋድያን ኤቃና፤ ታኒ ነባ እያዉ ኦዳዳ፥ እያፐ ስእያባ ነዉ ኦዳና” ያግድ ኪትስ።

⁴ ዮናታን ዳዊታ ናሽድ፥ ባ አዋ ሳኦላኮ ሀይሳዳ ያግስ፤ “ካዎይ ባ አይልያ ዳዊታ ቆህድ ናጋራ ኦፎ፤ እ ነና ቆህቤና፤ እ ኦዳባይ ነና ዳሮ ጎእስ።

⁵ እ ፍልስፄመ አድያ ዎዳ ዎደ ባ ሸምፑዋስ ቃትቤና። ጎዳይ እስራኤለ ኡባስ ግታ ፆኖ እሚስ፤ ሄሳ በአዳ ነካ ኡፋይታዳሳ። ያትን፥ ኔኒ ጌሻ አስ ቆሀናዉ አይስ ቆፓይ? ጋሶይ ባይና ዳዊታ ዎናዉ አይስ ኮያይ?” ያግስ።

⁶ ሳኦል ዮናታን ኦድዳባ ስእድ፥ “ደኦ ፆሲ ኤርያ መላ፥ ታኒ ዳዊታ ዎከ” ያግድ ጫቅስ።

⁷ ዮናታን ዳዊታ ፄግድ ኤንቲ ኦደትዳባ ኡባ እያዉ ኦድስ። ያትድ ዳዊታ ሳኦላኮ ኤህን ዳዊቲ ካሰይሳዳ ሳኦላራ ደእስ።

⁸ ፍልስፄመታራ ዛሪድ ሀራ ኦል ደንድስ፤ ዳዊቲ ከይድ ፍልስፄመታራ ኦለትድ፥ ኤንታ ግታ ሾቹ ሾጭን፥ ኤንቲ እያ ስንፈ ባቃትዶሶና።

⁹ ሄሳፈ ስምን፥ ሳኦል ቶራ ኦይክድ ባ ሶን ኡትዳሽን፥ ኢታ አያን ጎዳፐ ኪተትድ እያ ኦይክስ። ያትን፥ ዳዊቲ ዲ ዲፅሽን፥

¹⁰ ሳኦል ዳዊታ ጎዳራ ጋድ ስካናዉ ቶራ ፆንግስ፤ ሽን ዳዊቲ እያፐ ደሽ ግድ አትን፥ ቶራይ ጎዳን ቶከትስ። ሄ ቃማ ዳዊቲ ከስ ኤክድ ባቃትስ።

¹¹ ዳዊታ ኬን ናግድ ዎንታ ዎና መላ ሳኦል አሰ ኪትስ። ዳዊታ ማችያ መልኮላ፥ “ሀች ቃማ ኔኒ ነ ሸምፑዋ አሾና እፅኮ፥ ዎንቶ ሀይቃሳ” ያጋዳ ዳዊታስ ኦዳሱ።

¹² ምልኮላ ዳዊታ ማስኮተራ ከስን፥ ዳዊቲ ከስ ኤክድ ባቃትስ።

¹³ ሄሳፈ ጉየ መልኮላ ኤቃ ምስለ ኤካዳ አርሳን ዝንእሳሱ፤ ሁጰሶን ዴሻ እክሰ ዎዳ አፍላ ማይዛሱ።

¹⁴ ዳዊታ ኦይክድ ኤሀና መላ ሳኦል አሰ ኪትን ምልኮላ፥ “ዳዊቲ ሳከትስ” ያጋሱ።

¹⁵ ዳዊታ በአና መላ ሳኦል ሄ አሳታ ጉየ ኪትድ፥ “ታኒ ዳዊታ ዎና መላ እያ አልጋራ ቶክድ ኤክ ዪተ” ያግስ።

¹⁶ ሽን አሳት ሶ ገልያ ዎደ ኤቃ ምስለይ አርሳን ዝንእዳይሳነ እያ ሁጰሶን ዴሻ እክሰይ ደኤይሳ ደምዶሶና።

¹⁷ ሳኦል መልኮሎ፥ “ኔኒ አይስ ሀይሳዳ ኦዳ ታና ጭማዲ? ታ ሞርከይ ከስ ኤካና መላ አይስ ኦዲ?” ያግስ። ምልኮላ ዛራዳ፥ “እ ታኮ፥ ‘ታና ከሳዳ የዳ፤ እፅኮ ታ ነና ዎና’ ያግስ” ያጋሱ።

¹⁸ ዳዊቲ ከስ ኤክድ ራማን ደእያ ሳሜላኮ ብድ ሳኦል ባና ኦዳ ኡባ እያዉ ኦድስ። ዳዊትነ ሳሜል ናዮታ ብድ ያን ኡትዶሶና።

¹⁹ ሳኦል ዳዊቲ ራማን ደእያ ናዮታን ደኤይሳ ስእስ።

²⁰ ዳዊታ ኦይክድ ኤሀና መላ አሰ ያ ኪትስ። ሽን ናበ ጩጋይ ሳሜላ ካለዋን ትንብተ ኦድሽን በእዳ ዎደ ሳኦል የድዳ አሳታ ቦላ ፆሳ አያናይ ዎን፥ ኤንትካ ትንብተ ኦድዶሶና።

²¹ ሳኦል ሄሳ ስእዳ ዎደ ሀራ አስ የድስ፤ ኤንትካ ቃስ ትንብተ ኦድዶሶና። ሳኦል ሄን አሰ የድን ኤንትካ ትንብተ ኦድዶሶና።

²² ዉርሰን፥ ሳኦል ባ ሁጰን ራማ ብድ፥ ሴኩን ደእያ ግታ ኦላ ጋክድ፥ “ሳሜልነ ዳዊቲ አዉን ደኦና?” ያግድ ኦይችስ። ኤንቲ፥ “ህንን ራማን ደእያ ናዮታን ደኦሶና” ያግድ ዛርዶሶና።

²³ ሄሳ ግሾ፥ ሳኦል ራማን ደእያ ናዮታ ብስ፤ ቃስ ፆሳ አያናይ እያ ቦላካ ዎን፥ ራማን ደእያ ናዮታ ጋካናዉ ትንብተ ኦድሸ ብስ።

²⁴ እ ባ ማኡዋ ቃርድ፥ ሳሜላ ስንን ትንብተ ኦድስ፤ ጋላስነ ቃማ ኩመ ካሎ ዝንእስ። አሳይ፥ “ሳኦልካ ናበታፐ እሱዋ ግድደየ” ገይስ ሄሳሳ።