1 Sameela 17 - ጌሻ ማፃፋ

ዳዊታነ ጎልያዳ

¹ ፍልስፄመት ባንታ ኦላንቾታ ይሁዳን ደእያ ሶኮ ጌተትያ በሳን ኦላስ ሺሽዶሶና። ኤንቲ ሶኮፐነ አዜቃፐ ግዶን ደእያ ኤፌስ-ዳምማ ጌተትያ በሳን ሺቅድ ኡትዶሶና።

² ሳኦልነ እስራኤለት ኤላ ዛንጋራን ሺቅድ፥ ፍልስፄመታራ ኦለታናዉ ከይዶሶና።

³ ፍልስፄመ ኦላንቾት እስ ባጋ ዙማ ቦላ ሳልፕን፥ እስራኤለት ሀንኮ ባጋ ዙማን ሳልፕዶሶና፤ ዛንጋራይ ኤንታዉ ግዶን ደኤስ።

⁴ ጋተ ካታማን ደእያ ጎልያዳ ጌተትያ እስ ቶራ ቃራ አደይ ፍልስፄመት ዱንካንዳ ጉታፐ ከይስ፤ እያ ጌሳይ ኡሱፑን ዋነ ታካ።

⁵ እ እሻታማነ ላፑን ክሎ ግራመ ዴፅያ ናሰ ብራታ ፁሩረ ማእስ፤ ቃስ ናሰ ብራታ ባርኔፃ ባ ሁጰን ዎስ።

⁶ ናሰ ብራታ ጋምባለ ባ ቶሆን አስ፤ ባ ሀሽያን ናሰ ብራታ ቶራ ቶክስ።

⁷ እያ ቶራ ቶማይ ዋንዳራሸ መላ ኦርደ፤ እያ ቶራ አይፈይ ላፑን ክሎ ግራመ ዴፄስ፤ እያ ጎንዳልያ ቶክያ እስ አደይ እያ ስንን ሄመቴስ።

⁸ ጎልያድ ኤቅድ ባ ቃላ ቁ ኦድ፥ “እስራኤለ ኦላንቾታ ቦላ ሀይሳዳ ያግድ ጋይሬስ፤ ህንተ ዋናና ግድ ኦላስ ከይደቲ? ታኒ ፍልስፄመ አስ፤ ህንተ ቃስ ሳኦላ አይለታ ግደከቲ? አነ ህንተ ግዶፈ እስ አስ ዶርተ፤ ሄ አደይ ታኮ ዱገ ዎ።

⁹ ሄ አደይ ታራ ኦለትድ ታና ዎኮ፥ ኑኒ ህንተ አይለ ግዳና፤ ሽን ታኒ እያ ፆናዳ ዎኮ ህንተ ኑ አይለ ግዳናነ ኑስ ሃረታና” ያግስ።

¹⁰ ቃስካ ሄ ፍልስፄመ አደይ፥ “ታኒ ሀች እስራኤለ ኦላንቾታ ማንዳይስ፤ ታዉ እስ አስ እምተ፤ አነ ናምአይ ኦለታና” ያግስ።

¹¹ ሳኦልነ እስራኤለት ፍልስፄመ አድያ ቃላ ስእድ ዳጋምዶሶና፥ ዳሮ ያይዶሶና።

¹² ዳዊቲ ይሁዳ ቢታን ቤተለመን ደእያ ኤፍራታ አድያ እሰየ ናአ። እሰየስ ሆስፑን አደ ናይት ደኦሶና፤ ሳኦላ ካዎተ ላይን እሰየይ ዳሮ ላይ ደእዳ ጭማ።

¹³ እሰየ ሄ ባይራ አደ ናይት ሳኦላ ካልድ ኦላ ብዶሶና። ኤንታ ሱንይ:- ባይራይ ኤልያባ፤ ካሎይ አምናዳበ፤ ሄንይ ሳማ።

¹⁴ ዳዊቲ ናይታ ኡባፈ ካሎ፤ ባይራ ሄ ናይት ሳኦላ ካልዶሶና።

¹⁵ ሽን ዳዊቲ ባ አዋ ዶርሳታ ሄማናዉ ሳኦላ ማታፐ ቤተለመ ስመረቴስ።

¹⁶ ሄ ፍልስፄመ አደይ ኦይታሙ ጋላስ ዎንታነ ኦማርስ ይድ እስራኤለታ ማንዴስ።

¹⁷ እስ ጋላስ እሰየይ ባ ናኣ ዳዊታ ሀይሳዳ ያግስ፤ “ሀ ጫጨትዳ ትያፐ ላታሙ ክሎ ግራመነ ሀ ታሙ ኡይታ ኤካዳ ነ እሻታስ ኤፋዳ ነ እሻት ዱንካንዳ ጉታ ኤለ ጋ።

¹⁸ ሀ ታሙ ኑካ ፕላ ኤንታ ሻላቃስ ኤፋ፤ ነ እሻት ዋን ደእያኮ በአዳ፥ ኤንቲ ሳሮ ደኤይሳስ ማላታ ኤንታፈ ኤካዳ ያ።

¹⁹ ካዎይ ሳኦል፥ ነ እሻትነ እስራኤለ አሳ ኡባይ ፍልስፄመታራ ኦለትሸ ኤላ ዛንጋራን ደኦሶና” ያግስ።

²⁰ ዳዊቲ ጉራ ደንድድ ዶርሳታ ሀራ አስ ሄንድ፥ እሰየይ ኪትዳባ ጫን ኤክድ ብስ። እስራኤለ ኦላንቾት ባንታ ቃላ ቁ ኦድ ጋይርሸ ኦላስ ከይሽን ዳዊቲ ጋክስ።

²¹ እስራኤለትነ ፍልስፄመት እሶይ እሱዋኮ ስሚድ ሳልፕዶሶና።

²² ዳዊቲ ባ ኤህዳባ ሽንቀ ናገይሳ ኩሸን ዎድ፥ ኦላ ሳልፕያ ግዶ ዎፅ ብድ፥ ባ እሻታ ሳሮስ።

²³ ዳዊቲ ባ እሻታራ ሃሳይሽን፥ ጋተፐ ይዳ ቶራ ቃራይ፥ ፍልስፄመ ጎልያድ ባ ሳልፕያፈ ጋፃ ከይድ ካሰይሳዳ እስራኤለታ ማንድሽን ዳዊቲ ስእስ።

²⁴ እስራኤለ አሳ ኡባይ ሄ አድያ በእዳ ዎደ ዳሮ ያይድ ባቃትዶሶና።

²⁵ እስራኤለ አሳይ እሶይ እሱዋኮ፥ “ሀ ከይያ አድያ በእደቲ? እ ቱማ እስራኤለ ማንዳናዉ ከይስ። ሀ አድያ ዎያ ኡራስ ካዎይ ሳኦል ዳሮ ሻሎ እማና፤ ባ ናእዉካ እያዉ እማና፤ እያ አዋ ኬ አሳይ እስራኤለን ካዎ ጊራ ጊረና” ያግዶሶና።

²⁶ ዳዊቲ ባ ማታን ኤቅዳ አሳ፥ “ሀ ፍልስፄመ አድያ ዎድ፥ ሀ ዬላ እስራኤለፐ ደንያ ኡራስ አይበ ኦሰታናይ? ሀ ቃፃረትቦና ፍልስፄመይ ደኦ ፆሳ ኦላንቾታ ማንደይ እ ኦኔ?” ያግድ ኦይችስ።

²⁷ ኤንቲ፥ “ሀ አድያ ዎያ ኡራስ ሀይስ ሀይስ ኦሰታና” ያግድ ካሰይሳዳ ዛርዶሶና።

²⁸ ዳዊቲ አሳራ ኦደተይሳ እያ ባይራ እሻይ ኤልያብ ስእድ፥ ዳዊታ ቦላ ሸነ ኤፅስ። “ኔኒ ሀ በሳ አይስ ያዲ? ሄ ጉ ዶርሳታ ባዞን ኦደስ የጋዲ? ነ ኦቶሩዋነ ነ ዎዛና ኢታተ ታ ኤራይስ፤ ኔኒ ኦላ በአናዉ ያዳሳ” ያግስ።

²⁹ ዳዊቲ፥ “ታኒ ሀእ አይ ኦድና? ሀር አቶሽን ኦደታናዉካ ዳንዳእክና?” ያግስ።

³⁰ ዳዊቲ ባ እሻ አግድ፥ ሀራ አሳኮ ስሚድ፥ ካሰይሳዳ ኦይችን አሳይ እያዉ ካሰይሳዳ ዛርዶሶና።

³¹ ዳዊቲ ኦድዳይሳ ስእዳ አሳይ ሳኦላስ ኦድን፥ ሳኦል ዳዊታ ፄግስስ።

³² ዳዊቲ ሳኦላኮ፥ “ሀ አድያ ጋሶን ኦደ ዎዛንካ ትልኦፎ፤ ታኒ ነ አይለይ ባዳ፥ ሀ ፍልስፄመ አድያራ ኦለታና” ያግስ።

³³ ሳኦል ዳዊታኮ፥ “ኔኒ ናአ፤ እ ባ ናአተፈ ዶምድ ኦላ ሜዘትድ ድጭዳ ግሾ፥ ሀ ፍልስፄመ አድያራ ኔኒ ኦለታናዉ ዳንዳአካ” ያግስ።

³⁴ ሽን ዳዊቲ፥ “ታኒ፥ ነ አይለይ ታ አዋ ዶርሳታ ሄምያ ዎደ ጋሞይ ዎይኮ ጋርማፌለይ ከይድ ዶርሰ ኦይክያ ዎደ፥

³⁵ እያ ካላ ባዳ እያ ዶናፐ ዎ ኤካይስ። ታኮ ስምያ ዎደ ቆያ ጩላዳ ዎይስ።

³⁶ ታኒ ነ አይለይ ጋሞነ ጋርማፌለ ዎስ፤ ሀ ቃፃረትቦና ፍልስፄመ አደይ ደኦ ፆሳ ኦላንቾታ ጉዳ ግሾ እ ኤንታፈ እሱዋዳ ሀናና።

³⁷ ጋሞፈነ ጋርማፌለፐ ታና አሽዳ ጎዳይ፥ ሀ ፍልስፄመ አድያ ኩሸፐ ታና አሻና” ያግስ። ሳኦል ዳዊታኮ፥ “ባ፥ ጎዳይ ኔራ ግዶ” ያግስ።

³⁸ ሳኦል ባ ማኡዋ ዳዊታ ማይዝስ፤ ዳዊታ ሁጰን ናሰ ብራታ ባርኔፃ ዎስ፤ ናሰ ብራታ ፁሩርያ ዳዊታ ማይዝስ።

³⁹ ዳዊቲ ባ ኦላ ማኡዋ ቦላ ማሻ ዳንጭድ ሄመትድ በእስ። ሽን ሄሳ መላ ማኦ ማእድ ኤሮና ግሾ ሄመታናዉ ዳንዳእቤና። ሄሳ ግሾ፥ ዳዊቲ ሳኦላኮ፥ “ታኒ ሀይሳ መላ ማኦ ማአዳ ሜዘታቦና ግሾ ሀይሳራ ባናዉ ዳንዳእከ” ያግድ ኦላ ማኡዋ ቃርስ።

⁴⁰ ዳዊቲ ባ ሄን ፃምአ ኦይክድ፥ ሻፋፐ እቻሹ ሙሉሙቀ ሹቹ ዶር ኤክድ፥ ባ ሄን ቃርፂታን የግድ፥ ባ ያምባርሻ ኦይክድ፥ ጎልያዳኮ ሺቅስ።

⁴¹ ጎልያድ ባ ጎንዳልያ ቶክያ አድያራ እስፈ ሄመትሸ ዳዊታኮ ማትስ።

⁴² እ ዳዊታ ትሽ ኦ ፄልድ፥ ዳዊቲ አርሰ፥ ማላ ሎኦነ ናአ ግደይሳ በእድ ካስ።

⁴³ እ ዳዊታኮ፥ “ኔኒ ፃምአ ኦይካዳ ታኮ ያናዉ ታና ካና ጋዲ?” ያግስ። ባ ፆሳታ ሱንን ዳዊታ ባድስ።

⁴⁴ ካልድ ዳዊታኮ፥ “ሃያ፤ ታኒ ነ አሹዋ ሳሎ ካፎታስነ ሳአ ዶአታስ እማና” ያግስ።

⁴⁵ ዳዊቲ፥ “ኔኒ ማሻ፥ ቶራነ ጉምባ ኦይካዳ ታኮ ያሳ፤ ሽን ታኒ ኡባፈ ዎልቃማ ጎዳ ሱንን፥ ኔኒ ጉዳ እስራኤለ ኦላንቾታ ፆሳ ሱንን ነ ቦላ ያይስ።

⁴⁶ ሀች ጎዳይ ነና ታ ኩሸን አድ እማና፤ ታኒ ነና ሾጫና፤ ነ ቆያ ሙጫ ሆላና። ፍልስፄመ ኦላንቾታ አሀ ሳሎ ካፎታስነ ሳአ ዶአታስ ሀች እማና። ሄ ዎደ እስራኤለን ፆሲ ደኤይሳ ሳአን ደእያ አሳ ኡባይ ኤራና።

⁴⁷ ጎዳይ ባ አሳ አሻናዉ ቶራ ዎይኮ ማሸ ኮዮናይሳ ሀይሳን ሺቅዳ አሳ ኡባይ ኤራና። ኦላይ ጎዳባ ግድያ ግሾ፥ እ ህንተና ኡባ ኑ ኩሸን አድ እማና” ያግስ።

⁴⁸ ፍልስፄመ አደይ ደንድድ፥ ዳዊታራ ኦላ ጋሄታናዉ ሺቅዳ ዎደ ዳዊቲ እያራ ጋሄታናዉ ኦላ ደምባ ዎፅድ ብስ።

⁴⁹ ዳዊቲ ባ ቃርፂታን ኩሸ የድድ፥ እስ ሹቹ ኤክ ያምባርድ፥ ፍልስፄመ አድያ ሶምኡዋን ጫድስ። ሹቻይ እያ ሶምኡዋ ሉክድ ገልስ፤ ያትን፥ አደይ ባ ሶምኡዋራ ሳአን ኩንድስ።

⁵⁰ ዳዊቲ ፍልስፄመ አድያ ያምባርሻንነ ሹቻን ፆንስ። ዳዊቲ ባ ኩሸን ማሽ ባይና ፍልስፄመ አድያ ጫድድ ዎስ።

⁵¹ ዳዊቲ ዎፅ ብድ፥ እያ ቦላ ከይ ኤቅድ፥ እያ ዎድ፥ ፍልስፄመ አድያ ማሻ ሾሁዋፐ ሾድድ፥ እያ ቆያ ሙጭ የግስ። ፍልስፄመት ባንታ ቶራ ቃራይ ሀይቅዳይሳ በእዳ ዎደ ባቃትዶሶና።

⁵² እስራኤለ አሳይነ ይሁዳ አሳይ ደንድድ ገሬርሸ፥ ፍልስፄመታ ጋተነ ኤቅሮና ፐንገታ ጋካናዉ የደዶሶና። ፍልስፄመ አሳ አሀይ ጋተነ ኤቅሮና ጋካናዉ ሻእራይማ ኤፍያ ኦግያ ኡባን ኩንድስ።

⁵³ እስራኤለ አሳይ ፍልስፄመታ የደ ስሚድ፥ ኤንቲ ዱንካንዳ ጉታ ቦንቅዶሶና።

⁵⁴ ዳዊቲ ፍልስፄመ አድያ ሁጵያ የሩሳላመ ኤህስ፤ ሽን ፍልስፄመ አድያ ኦላ ሚሽያ ባ ዱንካንያ ግዶን ዎስ።

⁵⁵ ዳዊቲ ፍልስፄመ አድያራ ኦለታናዉ ብሽን፥ ሳኦል በእድ፥ ቶራ ሞጮና አበኔራ፥ “ሀ ናአይ ኦደ ናኤ?” ያግድ ኦይችስ። አበኔር ዛሪድ፥ “ካዋዉ፥ ቱማ ነ አሾ ታኒ እያ ኤርከ” ያግስ።

⁵⁶ ካዎይ ዛሪድ፥ “ሀ ናአይ ኦደ ናኤኮ አነ ኦይቻ” ያግስ።

⁵⁷ ዳዊቲ ፍልስፄመ አድያ ዎድ ስምዳ ዎደ አበኔር እያ ሳኦላ ስን ኤህስ። ሄ ዎደ ዳዊቲ ሙጭዳ ፍልስፄመ አድያ ሁጵያ ባ ኩሸን ኦይክድ ኡትስስ።

⁵⁸ ሳኦል፥ “ታ ናአዉ፥ ነ ኦደ ናኤ?” ያግድ ኦይችስ። ዳዊቲ ዛሪድ፥ “ታኒ ቤተለመን ደእያ ነ ኦሳንቹዋ፥ እሰየ ናአ” ያግስ።