1 Sameela 16 - ጌሻ ማፃፋ

ዳዊቲ ካዎተስ ትየትስ

¹ ጎዳይ ሳሜላኮ፥ “እስራኤለ ቦላ እ ካዎ ግዶና መላ ታኒ እፅዳ ሳኦላስ ኔኒ አዉደ ጋካናዉ ዬካይ? አነ ካጨን ዛይተ ኩንዳ ቤተለመ አድያ እሰየኮ ባ፤ ካዎ ግዳና መላ ታኒ እያ ናይታ ግዶፈ እሱዋ ዶራ ዎስ” ያግስ።

² ሳሜል፥ “ታኒ ዋናዳ ቦ? ሳኦል ስእድ ታና ዎና” ያግስ። ጎዳይ፥ “እስ ኡስ ኤካ ባዳ፥ ‘ታኒ ጎዳስ ያርሻናዉ ያስ’ ያጋ።

³ እሰየካ ያርሾስ ፄጋ። ነ ኦናባ ታ ነና በሳና፤ ታ ነና በሰይሳ ትያ” ያግስ።

⁴ ሳሜል ጎዳይ ኦድዳይሳ ኦስ፤ ቤተለመ ብድ ካታማ ጭማታራ ጋሄትዳ ዎደ ኤንቲ ኮኮርሸ እያኮ ይድ፥ “ነ ሳሮ ያዲ?” ያግድ ኦይችዶሶና።

⁵ ሳሜል፥ “ኤ፥ ሳሮ ያስ፤ ታ ጎዳስ ያርሻናዉ ያስ፤ ህንተካ ጌይድ ታራ ያርሾስ የተ” ያግስ። ቃስ እሰየነ እያ ናይታ ጌሽድ ኤንታ ያርሾስ ፄግስ።

⁶ ኤንቲ ያ ጋክያ ዎደ ሳሜል እሰየ ናኣ ኤልያባ በእድ፥ “ቱማ እያ ስንን ኤቅዳ፥ ጎዳይ ትያ ኡራይ ሀይሳ” ያግድ ቆፕስ።

⁷ ሽን ጎዳይ ሳሜላ፥ “እያ ማላ ዎይኮ እያ አዱሳተ ፄሎፋ፤ ታኒ እያ ካስ። ታኒ ጎዳይ አስ በኤይሳዳ በእከ፤ አስ ሶምኦ በኤስ፥ ሽን ጎዳይ ዎዛና በኤስ” ያግስ።

⁸ እሰየይ አብናዳበ ፄግድ፥ ሳሜላ ስን አን፥ ሳሜል፥ “ጎዳይ ሀይሳካ ዶርቤና” ያግስ።

⁹ እሰየይ ሳማ አን፥ ሳሜል፥ “ጎዳይ ሀይሳካ ዶርቤና” ያግስ።

¹⁰ ሄሳዳ ኦድ፥ እሰየይ ባ ናይታ ላፑናታ ሳሜላ ስን አስ፤ ሽን ሳሜል እሰየኮ፥ “ጎዳይ ሀይሳታ ዶርቤና” ያግስ።

¹¹ ሳሜል፥ “ነዉ ደእያ አደ ናይት ሀይሳታ ፃላሌ?” ያግድ እሰየ ኦይችስ። እሰየይ፥ “ኡባፈ ካሎ ናአይ አትስ፤ ሽን እ ዶርሰ ሄማናዉ ብስ” ያግስ። ሳሜል፥ “ኪታዳ እያ ኤህሳ፤ እ ያና ጋካናዉ ኑ ማናዉ ኡቶኮ” ያግስ።

¹² እሰየይ ኪትድ ናኣ ኤህስስ፤ ሄ ናአይ አርሰ፤ አይፈይ ሎኦነ ማላ ሎኦ ናአ። ጎዳይ ሳሜላ፥ “ታ ዶርዳይ ሀይሳ ግድያ ግሾ ደንዳ ኤቃዳ ትያ” ያግስ።

¹³ ሳሜል ካጨን ኩምዳ ዛይተ ኤክድ፥ እያ እሻታ ስንን ዳዊታ ትይስ። ሄ ጋላሳፐ ዶምድ፥ ጎዳ አያናይ ዳዊታ ቦላ ዎልቃን ዎስ። ሄሳፈ ጉየ፥ ሳሜል ደንድድ፥ ራማ ብስ።

ዳዊቲ ሳኦላ ጋን

¹⁴ ጎዳ አያናይ ሳኦላፐ ሻከትን ጎዳፐ ኪተትዳ ኢታ አያናይ ሳኦላ ዋይሴስ።

¹⁵ ሳኦላ አይለት፥ “ፆሳፈ ኪተትዳ ኢታ አያናይ ነና ዋይሴስ።

¹⁶ ኑኒ ዲ ዲፅያ አስ ኮይድ ኤሀና መላ ኑ ጎዳይ ባ አይለታ ኪቶ። ፆሳፈ ኪተትዳ ኢታ አያናይ ነና ኦይክያ ዎደ ሄ ኡራይ ዲ ዲፅኮ ነዉ ሎኦ ግዳና” ያግዶሶና።

¹⁷ ሳኦል ባ አይለታ፥ “ዲ ዲፅያ አስ ኮይድ ታዉ ኤህተ” ያግስ።

¹⁸ አይለታፐ እሶይ፥ “ቤተለመን እሰየስ ዲ ዲፅያ እስ ናእ ደኤስ። ሄ ናአይ ፃላነ ቶራንቾ። እ ማላ ሎኦነ ጭንጫ፤ ጎዳይ እያራ ደኤስ” ያግስ።

¹⁹ ሳኦል እሰየኮ ኪትድ፥ “ዶርሰ ሄምያ ነ ናኣ ዳዊታ ታዉ የዳ” ያግስ።

²⁰ እሰየይ ኡይነ ኦጎሮ ዎይነ ኡሹ ሀረን ጫንድ፥ እስ ኮለ ጎሽስድ ባ ናኣ ዳዊታራ ሳኦላስ የድስ።

²¹ ዳዊቲ ሳኦላኮ ይድ ኦሶ ዶምስ። ሳኦል ዳዊታ ዳሮ ዶስስ፤ ዳዊቲ ሳኦላስ ኦላ ሚሸ ቶከይሳ ግድስ።

²² ሳኦል፥ “ዳዊቲ ታዉ ኦሸ ታ ማታን ጋምኦ፤ ታኒ እያ ዶሳስ” ያግድ እሰየኮ ኪትስ።

²³ ሄሳፈ ስምን፥ ፆሳፈ ኪተትዳ ኢታ አያናይ ሳኦላ ኦይክያ ዎደ ኡባን ዳዊቲ ዲ ኤክድ ዲፄስ። እ ዲፅያ ዎደ ኢታ አያናይ ሳኦላ የዴስነ እያዉ ሎኤስ።