1 Sameela 14 - ጌሻ ማፃፋ

ዮናታን ፍልስፄመታ ኦልስ

¹ እስ ጋላስ ሳኦላ ናአይ ዮናታን ባ ኦላ ሚሽያ ቶክያ ፓንኮ ሀይሳዳ ያግስ፤ “ሃያ፤ ሄፍንን ደእያ ፍልስፄመት ዱንካንዳ ጉታ አነ ቦስ” ያግስ። ሽን ባ አዋስ ሄሳ ኦድቤና።

² ሄ ዎደ ሳኦል ግብአ ማታን ምግሮናን፥ ኦሮማነ ም ጋርሳን ደኤስ። እያራ ኡሱፑን ፄቱ አሳት ደኦሶና።

³ ሴሎን ጎዳ ካህነ ግድዳ ኤል ናአይ፥ ካህነይ ፍንሃስ የልዳ እካቦዳ እሻይ፥ አክፁባ ናአይ፥ አክይ ኤፉደ ማእድ፥ ኤንታ ግዶን ደኤስ። ዮናታን ኤንታ ግዶን ባይናይሳ ኦንካ ኤርቤና።

⁴ ዮናታን ፍልስፄመት ዱንካንዳ ጉታ ፕናናዉ ብያ ኦግያ ቦላ ኡሻቻ ባጋንነ ሀድርሳ ባጋን፥ እሶይ ቦፀፃ፥ ሀንኮይ ሳና ጌተትያ ናምኡ ፖፀትዳ ግታ ዛላት ደኦሶና።

⁵ ዛላታፐ እሶይ ፑደሀ ባጋን ምክማሳ ስንን ደእያ ዎደ፥ እሶይ ቃስ ዱገሀ ባጋን ግብአ ስንን ደኤስ።

⁶ ዮናታን ባ ኦላ ሚሽያ ቶክያ ፓንኮ፥ “ሃያ፤ ሀ ቃፃረትቦና አሳይ ዱንካንዳ ጉታ አነ ቦስ። ጎዳይ ኑ ግሾ ኦለቶና አገና፤ ዳሮ አሳን ግድን ጉ አሳን፥ አሻናይስ ጎዳ ፆነና” ያግስ።

⁷ እያ ኦላ ሚሽያ ቶከይስ፥ “ኔኒ ቆፕዳባ ኡባ ኦ፤ ጉየ ጎፓ፤ ታ ዎዛናይ ኔራ ደኤስ” ያግስ።

⁸ ዮናታን፥ “ያኮ ሃያ፤ ሄፍን ፕንድ አሳስ በንቶስ።

⁹ ኤንቲ፥ ‘ኑኒ ህንተኮ ያና ጋካናዉ ያን ናግተ’ ጊኮ፥ ኑኒ ደእያ በሳን ናጋናፐ አትሽን፥ ኤንታኮ ቦኮ።

¹⁰ ሽን ኤንቲ፥ ‘ኑኮ ሃ ዪተ’ ጊኮ፥ ኑኒ ኤንታኮ ከያና። ሄስ ጎዳይ ኤንታ ኑ ኩሸን አድ እምዳይሳስ ማላ ግዳና” ያግስ።

¹¹ ኤንቲ ናምአይ ከይድ ፍልስፄመታስ በንትዳ ዎደ ፍልስፄመት፥ “ሄኮ፥ እብራወት ባንታ ቆሰትዳ ኦላፈ ዙምድ ከዮሶና” ያግዶሶና።

¹² ፍልስፄመ ኦላንቾት፥ ዮናታናነ ኦላ ሚሽያ ቶከይሳ ፄግድ፥ “ሃ ኑኮ ከይተ፤ ኑኒ ህንተና እስባ በሳና” ያግዶሶና። ሄሳ ግሾ፥ ዮናታን ባ ኦላ ሚሽያ ቶከይሳኮ፥ “ታና ካላዳ ሀ ከያ። ጎዳይ ኤንታ እስራኤለ ኩሸን አድ እሚስ” ያግስ።

¹³ ዮናታን ባ ኦላ ሚሽያ ቶከይሳ ካለድ፥ ቶሆንነ ኩሸን ዙምድ ከይስ። ፍልስፄመታ ዮናታን ሾጭድ የግን፥ እያ ኦላ ሚሽያ ቶከይስ ካልድ ኤንታ ዎስ።

¹⁴ ሄ ኮይሮ ኦላን ዮናታንነ እያ ኦላ ሚሽያ ቶከይስ ባጋ ቦራ ሶ ጋደን ላታሙ ግድያ አስ ዎዶሶና።

¹⁵ ሄሳፈ ጉየ፥ ጉታንንን ጎሻን፥ ኦላስ ከይዳ አሳትነ ናጎን ደእያ ፍልስፄመት ዳጋምዶሶና። ቢት ቃፅስ፤ ሄ ዳጋማይ ፆሳፈ ኪተትስ።

¹⁶ ሳኦል ብንያመ ቢታን፥ ግብአን ዎዳ ዎችያ አሳት፥ ፍልስፄመ ኦላንቾት ያራ ሃራ ፕስክ ግድ ላለተይሳ በእዶሶና።

¹⁷ ያትን፥ ሳኦል ባራ ደእያ አሳኮ፥ “አነ ኦላንቾታ ሺሽድ ኑ ግዶፈ ኦን ብዳኮ በእተ” ያግስ። ኤንቲ ሺሽድ ታይብያ ዎደ ዮናታንነ እያ ኦላ ሚሽያ ቶከይስ ባይናይሳ በእዶሶና።

¹⁸ ሳኦል ካህንያ አክያ፥ “ፆሳ ታቦትያ ሃ ኤካዳ ያ” ያግስ። ሄ ዎደ ታቦተይ እስራኤለራ ደኤስ

¹⁹ ሳኦል ካህንያራ ሃሳይሽን፥ ፍልስፄመት ዱንካንዳ ጉታን ዎጫማይ ዳር ዳር ብስ። ሄሳ ግሾ፥ ሳኦል ካህንያ፥ “ታቦትያፐ ነ ኩሽያ ከሳ” ያግስ።

²⁰ ሄሳፈ ጉየ፥ ሳኦልነ እያ ኦላንቾት ሺቅድ ኦላ ብዶሶና። ፍልስፄመ አሳ ኡባይ ሀናና ባ ይድ፥ ባንታ ማሻን እሶይ እሱዋ ቡዶሶና።

²¹ ካሰ ፍልስፄመ አሳራ ዎላ ኦላ በሳ ብዳ እብራወት ኤንታ አግድ፥ ሳኦላራነ ዮናታናራ ደእያ እስራኤለ አሳራ ዋላከትዶሶና።

²² ደረይ ዳርያ ኤፍሬማ ቢታን ቆሰትዳ ሀራ እስራኤለትካ ፍልስፄመት ባቃተይሳ ስእዶሶና። ኤንትካ እስራኤለታራ ዋላከትድ የደ ኦይክዶሶና።

²³ ጎዳይ ሄ ጋላስ እስራኤለ አሳ አሽስ። ቤት-አዌናፐ ሄፍን ጋካናዉ ኦላይ ካንስ።

ዮናታና ኤሳ ሙሳ

²⁴ ሄ ጋላስ እስራኤለ አሳይ ኮሻን ላባንዶሶና። ሳኦል፥ “ሳእ ቃማናፐ ስን ታኒ ታ ሞርከታ ሀሎ ከዮና ደእሽን፥ ካ ምያ ኦንካ ባደትዳይሳ ግዶ” ያግድ አሳ ጫቅስድ ዎስ። ሄሳ ግሾ፥ ኦላንቾታፐ ካ ዶናኮ ሺሽዳ አስ ኦንካ ባዋ።

²⁵ ኦላንቾት ኡባይ ዎራ ግዶ ገልያ ዎደ ም ቦላ ኤስ ደኤስ።

²⁶ ኤንቲ ዎራ ግዶን ኤስ ፆከይሳ በእዶሶና፤ ሽን ጫቁዋ ያይዳ ግሾ፥ እስ አስካ ባ ኩሽያ ዶናኮ ሺሽበና።

²⁷ ሽን ዮናታን እያ አዋይ አሳራ ኦዳ ቃችዳይሳ ስእቤና። ሄሳ ግሾ፥ ባ ኩሸን ደእያ ፃምአ ፄራ እልሎ ኤሳን የድ ከስድ፥ ላጭን እያ አይፈይ ፄልስ።

²⁸ ሄሳፈ ጉየ፥ ኦላንቾታፐ እሶይ፥ “ነ አዋይ ኦላንቾታ ኡባ፥ ‘ሀች ካ ምያ አስ ባደትዳይሳ ግዶ’ ያግድ፥ ጫቅስድ ዎስ፤ አሳ ኡባይ ላባንዳይ ሄሳሳ” ያግስ።

²⁹ ዮናታን፥ “ታ አዋይ ቢታስ መቶ መስ። ታኒ ሀ ኤሳፈ ጉራ ላጭዳ አይ መላ ምንዳኮ በአ።

³⁰ አሳይ ባ ሞርከታፐ ድእዳ ካፈ ሀች ምዳባ ግድያኮ ሎኦሽን፤ ኤንቲ ዎና ፍልስፄመታ ታይቦይካ አይ መላ ዳራነሽን” ያግስ።

³¹ ሄ ጋላስ እስራኤለ አሳይ ምክማሳፐ ኤሎና ጋካናዉ ፍልስፄመታ ሾጭ ስሚድ ዳቡርዶሶና።

³² ኤንቲ ድእዳ ዶርሳታ፥ ሚዛታነ ማራታ ሹክድ ሱ ጉሶና ምዶሶና።

³³ እስ አስ ሳኦላኮ፥ “ሄኮ፥ አሳይ ሱራ ደእያ አሾ ምድ፥ ጎዳ ስንን ናጋራ ኦሶና” ያግስ። ሳኦል፥ “ህንተ ናጋራ ኦደታ፤ ግታ ሹቹ ጎንዶርስድ ኤለ ታኮ ሃ ሺሽተ” ያግስ።

³⁴ ሄሳፈ ጉየ፥ “አሳ ግዶ ብድ፥ ‘ህንተ እሶይ እሶይ ህንተ መሄታነ ዶርሳታ ታኮ ሃ ኤህተ፤ ሀይሳን ዎጋዳ ሹክድ ሚተ። ሱራ ደእያ አሾ ምድ፥ ጎዳ ስንን ናጋራ ኦፕተ’ ያጋ” ያግስ። ሄሳ ግሾ፥ ሄ ቃማ እሶይ እሶይ ባ ቦራ ኤህድ ያን ሹክዶሶና።

³⁵ ሳኦል ሄ በሳን ጎዳስ ያርሾ በሲ ግምብስ፤ ጎዳስ ያርሾ በሲ ግምብሽን ሀይስ እያዉ ኮይሮ።

³⁶ ሳኦል፥ “ሀች ቃማ ፍልስፄመታ ካል፥ ብድ ሳእ ዎንታና ጋካናዉ ኤንታባ ኡባ ቦንቆስ፤ ኤንታፈ እሱዋካ አሾና ዎኦስ” ያግስ። ኤንቲ፥ “ኤሮ፥ ነና ሎእዳባ ኦ” ያግድ ዛርዶሶና። ሽን ካህነይ፥ “አነ ፆሳ ሸነይ አይበኮ ኦይቾስ” ያግስ።

³⁷ ሄሳ ግሾ፥ ሳኦል፥ “ፍልስፄመ አሳ ካላዳ ቦ? ኔኒ ኤንታ እስራኤለ ኩሸን አዳ እማኔ?” ያግድ ፆሳ ኦይችስ። ሽን ሄ ጋላስ ፆሳይ እያዉ ዛሮ እምቤና።

³⁸ ሳኦል፥ “ካለይሳታ ፄግድ፥ ኡባይ ሃይተ፤ ሀች አይባ ናጋር ኦሰትዳኮ አነ ቆርድ ደሞስ።

³⁹ እስራኤለ አሽያ ደኦ ጎዳይ ኤርያ መላ። ታ ናአ ዮናታና ግድኮካ፥ ሀይቃናዉ በሴስ” ያግስ። ሽን አሳፐ እስ አስካ ዶና ፖግቤና።

⁴⁰ ሄሳፈ ጉየ፥ ሳኦል እስራኤለ አሳኮ፥ “ህንተ ኡባይ ያ ባጋን ኤቅተ፤ ታንነ ታ ናኣ ዮናታን ሀ ባጋን ኤቃና” ያግስ። አሳይ፥ “ኤሮ፥ ነና ሎእዳባ ኦ” ያግዶሶና።

⁴¹ ሄሳፈ ጉየ፥ ሳኦል፥ “ታዉ ልከ ዛሮ እማ” ያግድ ጎዳ እስራኤለ ፆሳ ዎስስ። ሳማይ ሳኦላ ቦላነ ዮናታና ቦላ ዎን አሳይ ጌይስ።

⁴² ቃስ ሳኦል፥ “ታ ቦላነ ታ ናኣ ዮናታና ቦላ ሳማ የግተ” ያግስ። ሳማይ ዮናታና ቦላ ዎስ።

⁴³ ሳኦል ዮናታና፥ “አነ ኔኒ ኦዳባ ኦዳ” ያግስ። ዮናታን፥ “ታኒ ጉ ኤሳ እልሎ ታ ፃምኣ ፄራን ቦቻዳ ላጫስ። ሄኮ ታኒ ሀይሳን ደአይስ፤ ሀይቆስ ጊገታስ” ያግስ።

⁴⁴ ሳኦል፥ “ዮናታና፥ ኔኒ ሀይቆና እፅኮ፥ ፆሲ ታና ፕርዶ” ያግስ።

⁴⁵ ሽን አሳይ ሳኦላኮ፥ “ዮናታን፥ እስራኤለስ ሄሳ መላ ግታ ፆኑዋ ኤህዳይስ ሀይቃኔ? ሄስ ፖሎ ሀነና! ደኦ ፆሲ ኤርያ መላ! እያ ሁጵያፐ እስ ብናንካ ቢታን ዎና። እ ሀች ሀይሳ ፆሳ ማዶን ኦስ” ያግዶሶና። ያትድ አሳይ ዮናታና አሽን፥ እ ሀይቆፐ አትስ።

⁴⁶ ሄሳፈ ጉየ፥ ሳኦል ፍልስፄመ አሳ የደይሳ አግን ኤንቲ ባንታ ቢታ ስምዶሶና።

⁴⁷ ሳኦል እስራኤለ ቦላ ካዎትዳፐ ጉየ፥ ኡባ ባጋራ ደእያ ባ ሞርከታ ኦልስ። ሄሳትካ፥ ሞአበታ፥ አሞነታ፥ ኤዶመታ፥ ሱባ ካዎታነ ፍልስፄመታ። ኦላናዉ ብዳ በሳ ኡባን ፆንስ።

⁴⁸ እ ምንድ ኦለትስ፤ አማለቃታ ፆንስ፤ እስራኤለ አሳ ቦንቀይሳታ ኩሸፐ አሽስ።

⁴⁹ ሳኦላ አደ ናይት ዮናታና፥ የሱዋነ ማልክሳ፤ እያዉ ባይራ ናኤ ሱንይ መራቦ፤ ካሎ ናኤ ሱንይ መልኮሎ።

⁵⁰ እያ ማችያ፥ አክማሳ ናእያ አክናሆሞ። እያ ቶራ ሞጮናይ እያ አዋ እሻ ኔራ ናኣ አበኔራ።

⁵¹ ሳኦላ አዋ ቂስነ አበኔራ አዋ ኔር አብኤላ ናይታ።

⁵² ሳኦል ደእዳ ላይ ኡባን ፍልስፄመታራ ሞርከተን ኦለትዳ መላ ደእስ። ምኖ አስ ዎይኮ ፃላ አስ ደምዳ ዎደ ኡባን እ ሄ ኡራ ባ ኦላንቾታን ጉጄስ።