1 Sameela 11 - ጌሻ ማፃፋ

ሳኦል አሞነታ ፆንስ

¹ እስ አጌናፐ ጉየ፥ አሞነ ካዎይ ናኦስ ደንድድ፥ ጋላዳን ደእያ ያበሳ ካታማ ተቅስ። ያበሳ አሳይ፥ “ኔኒ ኑራ ጫቃ፤ ኑኒ ነዉ ሃረታና” ያግዶሶና።

² ናኦስ፥ “ታኒ ህንተራ ጫቃናይ ህንተ ኡሻቻ አይፍያ ዎጫ ከሳዳ እስራኤለ ካዉሽዳፐ ጉየና” ያግስ።

³ ያበሳ ጭማት ናኦሳኮ፥ “እስራኤለ ቢታ ኡባ ኑኒ ኪታ የዳና መላ ላፑን ጋላስ ታካ፤ ኑና አሽያ አስ ይኮ ኑኒ ነዉ ኩሸ እማና” ያግዶሶና።

⁴ ኪተትዳ አሳይ ሳኦል ደእያ በሳ ግብአ ጋክድ ሀ ኦዳ አሳስ ኦድዶሶና፤ አሳ ኡባይ ባንታ ቃላ ቁ ኦድ ዬክዶሶና።

⁵ ሄ ዎደ ሳኦል ባ ቦራታ ላግድ ጎሻፈ ይሸ፥ “አሳይ ዋንዴ? አይስ ዬኮና?” ያግድ ኦይችስ። ኤንቲ ያበሳ አሳይ ግዳባ እያዉ ኦድዶሶና።

⁶ ሀ ቃላ ሳኦል ስእዳ ዎደ ፆሳ አያናይ እያ ቦላ ዎልቃን ዎስ፤ ሳኦል ሸነ ኤፅስ።

⁷ ሳኦል ዋፃ ቦራታ ሙፀረድ፥ “ሳኦላነ ሳሜላ ካልድ፥ ከዮና አሳ ቦራት ሀይሳዳ ሙፀታና” ያግድ ኪተትዳ አሳታ ቦላ እስራኤለ ቢታ ኡባ የድስ። ሄ ዎደ አሳ ኡባይ ጎዳስ ያይዶሶና፤ ኤንቲ እስ አሳዳ ሀንድ ከይዶሶና።

⁸ ሳኦል ቤዘቃን ኤንታ ሺሽድ ታይብዳ ዎደ እስራኤለ አሳይ ሄ ፄቱ ሙኩሉ፤ ይሁዳ አሳይ ሀስታሙ ሙኩሉ ግድስ።

⁹ ኪተትዳ አሳይ፥ “ብድ ያበሳ ጋላዳ አሳስ፥ ‘ዎንቶ ፃልቀይ ምችያ ዎደ ኑኒ ህንተና አሻና ያግድ ኦድተ’ ” ያግዶሶና። ኪተትዳ አሳይ ብድ፥ ያበሳ አሳስ ሄሳ ኦድን፥ ኤንቲ ዳሮ ኡፋይትዶሶና።

¹⁰ ያበሳ አሳይ አሞነታኮ፥ “ኑኒ ዎንቶ ህንተዉ ኩሸ እማና፤ ህንተ ኑ ቦላ ዶስዳባ ኦተ” ያግዶሶና።

¹¹ ዎንተ ጋላስ ሳኦል ባ አሳ ሄ ጩጋን ሻክስ። ኤንቲ ሳእ ዎንትያ ዎደ አሞነ አሳይ ዱንካንዳ ጉታ ገልድ፥ ፃልቀይ ምቻና ጋካናዉ አሞነታ ጎይርዶሶና። ጎይረተፈ አትዳይሳት ናምኡ አስ እስፈ ዶናዳ ባዉ ባዉ ባቃቲስ።

¹² እስራኤለ አሳይ ሳሜላኮ፥ “ሳኦል ኑ ቦላ ካዎታነ ያግዳ አሳት ኦናንቴ? ኤንቲ ኦነኮ ከስተ፤ ኑ ኤንታ ዎና” ያግስ።

¹³ ሽን ሳኦል፥ “ሀች ጎዳይ እስራኤለ አሽዳ ግሾ እስ አስካ ሀይቀና” ያግድ ዛርስ።

¹⁴ ሳሜል፥ “ሃይተ፤ ጋልጋላ ብድ፥ ያን ሳኦል ካዎ ግደይሳ ዛሪድ ኤርሶስ” ያግስ።

¹⁵ ሄሳ ግሾ፥ አሳ ኡባይ ጋልጋላ ብድ፥ ጎዳ ስንን ሳኦል ካዎ ግደይሳ ኤርስዶሶና። ያን እስፈተ ያርሾ ጎዳ ስንን ያርሽዶሶና። ሳኦልነ እስራኤለ አሳ ኡባይ ሄ በሳን ባኣለ ኡፋይሳን ቦንችዶሶና።