1 Sameela 10 - ጌሻ ማፃፋ

¹ ሄ ዎደ ሳሜል ትግያባራ ዛይተ ኤክድ፥ ሳኦላ ሁጰን ትይስ። ሳኦላ ዬርድ፥ ሀይሳዳ ያግስ፤ “ባ አሳ እስራኤለ ካለና መላ ጎዳይ ነና ትይስ።

² ኔኒ ሀች ታፐ ሻከታዳ ብያ ዎደ ራሄል ዱፉዋ ማታን ብንያመ ዛዋን ደእያ ፃልፃሀ ጌተትያ በሳን ናምኡ አሳታራ ጋሄታና። ኤንቲ ነና፥ ‘ነ ኮያናዉ ብዳ ሀረት በንትዶሶና፤ ሀእ ነ አዋይ ሀረታ ቆፐይሳ አግድ፥ ታ ናአይ ዋንደሻ?’ ያግድ ነዉ ህርጌስ” ያግድ ኦዳና።

³ ኔኒ ሄ በሳፈ ደንዳዳ፥ ታቦረ ግታ ም ጋካናዉ ባና። ፆሳኮ ቤተለ ብያ ሄ አሳት ያን ኔራ ጋሄታና። ኤንታፈ እሶይ ሄ ዴሻ ማር ቶክስ፤ ናምአንይ ሄ ኡይ ቶክስ፤ ሄንይ ኦጎሮ ኩም ዎይነ ቶክስ።

⁴ ኤንቲ ነና ሳሮና፤ ነዉ ናምኡ ኡይ እማና፤ ነ ኤንታ ኩሸፐ ሄ ኡይ ኤካናዉ ኮሼስ።

⁵ “ሄሳፈ ጉየ፥ ኔኒ ፍልስፄመ ኦላንቾታ ጩጋይ ደእያ ፆሳ ደርያ ግብአ ባና። ኔኒ ሄ ካታማ ጋክያ ዎደ ዲራ ካራቦራ፥ ሱሱልኤነ ዛየ ፑንድ ካእሸነ ትንብተ ኦድሸ፥ ጎይኖ በሳፈ ዎያ ናበ ጩጋራ ጋሄታና።

⁶ ጎዳ አያናይ ነ ቦላ ዎልቃን ዎና፤ ኔኒ ኤንታራ ትንብተ ኦዳና፤ ኔኒ ላመታዳ ሀራ አስ ግዳና።

⁷ ሀ ማላት ፖለትያ ዎደ ፆሳይ ኔራ ደእያ ግሾ ነ ኦናዉ ዳንዳእያባ ኡባ ኦ።

⁸ “ኔኒ ታፐ ስንታዳ ጋልጋላ ዎ። ታኒ ፁሳ ያርሾነ ሳሮተ ያርሾ ያርሻናዉ ኔኮ ባና። ታ ኔኮ ባዳ ነ ኦናባ ኦዳና ጋካናዉ ላፑን ጋላስ ጋምአ” ያግስ።

ሳኦል ካዎትስ

⁹ ሳኦል ሳሜላፐ ሻከትዳ ዎደ ፆሳይ ሳኦላ ዎዛና ላምስ፤ ሳሜል ኦድዳ ማላት ኡባይ ሄ ጋላስ ሀንዶሶና።

¹⁰ ሳኦልነ እያ አይለይ ግብአ ጋክያ ዎደ ናበ ጩጋይ እያራ ጋሄትስ። ፆሳ አያናይ እያ ቦላ ዎልቃራ ዎን እ ኤንታ ግዶን ትንብተ ኦደትስ።

¹¹ ሳኦላ ካሰ ኤርያ ኡባይ እ ናበታራ ትንብተ ኦደተይሳ በእዳ ዎደ፥ “ቂሳ ናአይ ዋንዴ? ሳኦል ናበ ያሬ?” ያግዶሶና።

¹² ሄ በሳን ደእያ እስ ኡራይ፥ “ኑ ኤንታ አዋይ ኦነኮ ኤርዉ?” ያግድ ኦይችስ። ሄሳ ግሾ፥ “ሳኦል ናበ ኮቼ?” ገይስ ሀይሰ ግድስ።

¹³ ሳኦል ትንብተ ኦደይሳ ዉርስዳፐ ጉየ ጎይኖ ዙማ ቦላ ከይስ።

¹⁴ ሳኦላ አዋ እሻይ ሳኦላነ እያ አይልያ፥ “አዉ ብደቲ?” ያግስ። ሳኦል፥ “ሀረታ ኮያናዉ ብዳ፤ ሀረት በንቶና እፅን ሳሜላ ኦይቻናዉ ብዳ” ያግስ።

¹⁵ ሳኦላ አዋ እሻይ፥ “ሀያና ሳሜል ነዉ ግዳባ ታዉ ኦዳርኪ” ያግስ።

¹⁶ ሳኦል፥ “ሀረት በንትዳይሳ ናበይ ሳሜል ኑስ ጌሽድ ኦድስ” ያግስ። ሽን “ነ ካዎ ግዳና” ግድ ሳሜል እያዉ ኦድዳይሳ ባ አዋ እሻስ ኦድቤና።

¹⁷ ሄሳፈ ጉየ፥ ሳሜል ምፅጳን እስራኤለ አሳ ጎዳ ስንን ሺሽስ።

¹⁸ ኤንታ፥ “ጎዳይ፥ እስራኤለ ፆሳይ ሀይሳዳ ያጌስ፤ ‘ታኒ እስራኤለ ግብፀፈ ከሳስ፤ ግብፀ አሳ ኩሸፐነ ህንተና ኡንኤያ ካዎተታ ኡባ ኩሸፐ አሻስ።’

¹⁹ ሽን ሀች ህንተና ህንተ መቱዋፐነ ዋያፐ አሽያ ታና ህንተ ፆሳ እፅደታ። ‘አካይ፥ ኑስ ካዎ ካዎ’ ያግደታ። ሄሳ ግሾ፥ ሀእ ህንተ፥ ህንተ ኮቻን ኮቻን ግድድ ጎዳ ስን ሺቅተ” ያግስ።

²⁰ ሳሜል እስራኤለ ዛረ ሺሽን፥ ብንያመ ኮቻይ ዶረትስ።

²¹ ብንያመ ኮቻ ሺሽን፥ ማፅራ ኮቻይ ዶረትስ። ዉርሰን ቂሳ ናአይ ሳኦል ዶረትስ፤ ኤንቲ እያ ኮይዶሶና፥ ሽን እ በንትቤና።

²² ሄሳ ግሾ ኤንቲ፥ “አደይ ሀ በሳ ይዴ?” ያግድ ጎዳ ኦይችዶሶና። ጎዳይ፥ “ኤ፥ ሳኦል ሚሸ ግዶን ቆሰትድ ኡትስ” ያግስ።

²³ ኤንቲ ዎፅ ብድ፥ ቆሰትዳ በሳፈ ከስ ኤህዶሶና። አሳ ግዶን እ ኤቅያ ዎደ አስ ኡባይ እያ ሀሸፐ ጋርሳራ አትያ አዱሳ አስ።

²⁴ ሳሜል አሳኮ፥ “ጎዳይ ዶርዳ አድያ በእቴ? እያ ዳንያ አስ ሀ አሳ ግዶን ኦንካ ባዋ” ያግስ። አሳ ኡባይ ባንታ ቃላ ቁ ኦድ፥ “ካዎይ ብራታ ቱስ ግዶ” ያግስ።

²⁵ ሄሳፈ ጉየ፥ ሳሜል ካዎተ ዎጋ አሳስ ኦድስ፤ ፃ ማፃፋን ሄ ዎጋ ፃፍድ ጎዳ ስንን ዎስ። ያትድ ሳሜል አሳ ኡባ ባ ሶ ሶ ሞይዝስ።

²⁶ ሳኦል ባ ሶ ግብአ ብስ፤ ፆሳይ ኤንታ ዎዛና ቦችዳ ምኖ አሳት ሳኦላራ ብዶሶና።

²⁷ ሽን እስ እስ ፓና አሳት፥ “ሀ አደይ ኑና ዋትድ አሻኔ?” ያግዶሶና። ኤንቲ እያ ካድ፥ እያዉ አይ እሞታካ እምቦኮና። ሽን ሳኦል ስእ ግስ።