1 Kawota 2 - ጌሻ ማፃፋ

ዳዊቲ ሶሎሞነ ዞርስ

¹ ዳዊታስ ሀይቅያ ዎደይ ማትን፥ ባ ናኣ ሶሎሞነ ሀይሳዳ ያግድ ኪትስ፤

² “ታ ሀይቅያ ዎደይ ማትስ። ሄሳ ግሾ፥ ምና፤ አሰ ግዳ።

³ ጎዳይ ነ ፆሳይ ኪትዳባ ናጋ፤ እያ ኦግያን ሄመታ፤ ሙሰ ማፃፋን ፃፈትዳ እያ አዋጁዋ፥ እያ ኪታ፥ እያ ህግያነ እያ ዎጋ ናጋ። ሄሳ ነ ኦኮ፥ ነ ኦያባ ኡባይነ ነ ብያ በሳ ኡባይ ነዉ እንጀታና።

⁴ ጎዳይ፥ ‘ነ ኮቻት ባንታ ደኡዋን ናገትድ ደእኮ፥ ኤንቲ ታ ስንን ባንታ ኩመ ዎዛናፐነ ባንታ ኩመ ሸምፑዋፈ አማነትድ ሄመትኮ፥ እስራኤለ አራታን ኡትያ አስ ነዉ የና’ ” ያግዳ ኡፋይሳ ቃላ ታዉ ፖላና።

⁵ ጉጅድካ፥ “ፃሩያ ናአይ እዮኣብ እስራኤለ ናምኡ ቶራ ሞጮናታ ኔራ ናኣ አበኔራነ የተራ ናኣ አማሳ ዎድ፥ እ ኦዳባ ነ ኤራሳ። ሄስካ፥ ኦል ባይናሽን ሳሮ ዎደ ኤንታ ዎድ፥ ሄ ሱን ባ ፄሳ ሳቅያነ ባ ቶሁዋ ጫማ ትይስ።

⁶ ነ እያ ነ ጭንጫተዳ ኦ፤ እ ጬግድ ሳሮ ሀይቃናዳ ኦፋ።

⁷ “ሽን ታኒ ነ እሻ አበሰሎመፐ ባቃትያ ዎደ ኤንቲ ታዉ ምየ ግድዳ ግሾ፥ ጋላዳ ቢታን ደእያ ባርዝለ ናይታስ ኬሀባ ኦ፤ ኤንቲ ነ ጋይታፐ ምያ አሳራ ሞ።

⁸ “ታኒ ማሀናይማ ካታማ ብዳ ዎደ ታና ኢታ ባደ ባድዳ ብንያመ ቢታን ብራቅማ ካታማፐ ይዳ ጌራ ናኣ ሳም ኔራ ደኤይሳ ቆፓ። እ ታራ ጋሄታናዉ ዮርዳኖሰ ሻፋ ይዳ ዎደ፥ ‘ታ ነና ዎከ’ ጋዳ ጎዳን እያዉ ጫቃስ።

⁹ ሽን ሀእ ኔኒ እያ ፅሎ አሳዳ ታይቦፓ። ነ ጭንጫ አስ ግድያ ግሾ አይ ኦነኮ ኤራሳ። ነ ሄ ጭማ አድያ ሱራ ሞጋ” ያግስ።

¹⁰ ዳዊቲ ሀይቅድ፥ ባ ማይዛታን ጋሄትስ፤ ባ ካታማን ሞገትስ።

¹¹ ዳዊቲ እስራኤለ ቦላ ኦይታሙ ላይ ካዎትስ፤ ከብሮናን ላፑን ላይ፥ የሩሳላመን ሀስታማነ ሄ ላይ ካዎትስ።

¹² ሶሎሞነይ ባ አዋ ዳዊታ አራታን ኡትስ፤ እያ ካዎተይ ዳሮ ምንስ።

ሶሎሞነ አራታይ ምንስ

¹³ ሃግታ ናአይ አዶንያስ፥ ሶሎሞነ አየ በርሳብኮ ብን በርሳባ፥ “ነ ታኮ ሳሮ ያዲ?” ያጋዳ እያ ኦይቻሱ። እ፥ “ኤ፤ ሳሮ ያስ” ያግድ ዛርስ።

¹⁴ ጉጅድካ፥ “ታኒ ነና ኦይችያባይ ደኤስ” ያግስ። እያ፥ “ኦይቻ” ያጋሱ።

¹⁵ አዶንያስ፥ “ካዎታናዉ በሰይ ታና ግደይሳነ እስራኤለ አሳ ኡባይ ታና ባንታዉ ካዎዳ ፄለይሳ ኔኒ፥ ነ ሁጰን ኤራሳ። ሽን ሀኖይ ፆሳፈ ግድዳ ግሾ ኦዳይ ላመትን ካዎተይ ታ እሻኮ ዩይስ።

¹⁶ ሀእ ታኒ ነና እስባ ኦይቻና። ሀያና ታና ዬላዮፓ” ያግስ። እያ፥ “ኦይቻ” ያጋሱ።

¹⁷ እ፥ “ካዎይ ሶሎሞነይ ነና እፃስ ጌና፤ ሄሳ ግሾ፥ ሱናማ ማጫስዉ አብሶ ታዉ ማቾ ኦዳ ኤካና መላ ሀያና ታዉ እያ ኦይቻርክ” ያግስ።

¹⁸ በርሳባ፥ “ዳሮ ሎኦ፤ ታ ሄሳ ካዋስ ኦዳና” ያጋሱ።

¹⁹ ሄሳ ግሾ፥ በርሳበይ አዶንያሳ ኪታ ኦዳናዉ ሶሎሞነኮ ገልን፥ ካዎይ ደንድ ኤቅድ፥ እዉ ዝግስ። ባ አራታን ኡትስ፤ ባ አየስ ሀራ አራታ ኤህስድ፥ ባፐ ኡሻቻ ባጋን ኡትስስ።

²⁰ በርሳባ፥ “ታ ነና እስ ጉባ ኦይችያባይ ደኤስ፤ ሀያና ታና ዬላዮፓ” ያጋሱ። ካዎይ ዛሪድ፥ “ታ አየ፥ ኦይቻ። ታ ነና ዬላይከ” ያግስ።

²¹ እያ፥ “ሱናማ ማጫስዉ አብሶ ነ እሻይ አዶንያስ ማቾ ኦድ ኤካናዉ ኮይያ ግሾ እያዉ እማርክ” ያጋሱ።

²² ካዎይ ሶሎሞነይ ዛሪድ፥ “ሱናማ ማጫስዉ አብሶ ነ አዶንያስ አይስ ኦይቻይ? እ ታ ባይራ ግደኔ? ኔኒ እያዉ ካዎተ አይስ ኦይችኪ? ቃስ ካህንያ አብያታርነ ፃሩያ ናአይ እዮኣብ እያራ ደኦሶና ግዶኮና?”

²³ ካዎይ ሶሎሞነይ ጎዳን ጫቅድ፥ “አዶንያስ ሀይሳ ኦይችዳ ግሾ ታኒ እያ ዎና እፅኮ፥ ጎዳይ ታና ፕርዶ!

²⁴ ታና፥ ታ አዋ ዳዊቲ አራታን ኡትስድ፥ ታ ካዎተ ምን ኤስድ፥ ታ ኮቻታስ ባ ቃላ ፖልዳ ጎዳይ ኤርያ መላ፥ አዶንያስ ሀች ሀይቃና!” ያግስ።

²⁵ ካዎይ ሶሎሞነይ ዮዳሄ ናአ ባናያ ኪትን፥ እ ብድ አዶንያሳ ሾጭድ ዎስ።

²⁶ ሄሳፈ ጉየ፥ ካዎይ ሶሎሞነይ፥ ካህንያ አብያታራኮ፥ “ኔኒ ነ ቢታ አናቶታ ባ። ኔኒ ሀይቃናዉ በሳሳ፥ ሽን ታ ነና ዎከ። ኔኒ ታ አዋ ዳዊቲ ስንን ኡባ ሃርያ ጎዳ ታቦትያ ቶካዳሳ፤ ቃስ ታ አዋ መቱዋ ኡባ እያራ ኤካዳሳ” ያግስ።

²⁷ ሶሎሞነይ፥ አብያታር ጎዳ ካህነ ግድዳ በሳፈ ድግድ፥ ጎዳይ ሴሎን ኤለ ሶ አሳስ ኦድዳ ቃላ ፖልስ።

²⁸ አበሰሎመ እፅድ፥ አዶንያሳ ማድዳ እዮኣባ ሀ ኦዳይ ጋክን፥ ባቃትድ ጎዳ ዱንካንያኮ ብድ፥ ያርሾ በሳ ካጨታ ኦይክስ።

²⁹ እዮኣብ ባቃትድ ጎዳ ዱንካንያኮ ብድ፥ ያርሾ በሳ ማታን ደኤይሳ ካዋ ሶሎሞነይ ስእዳ ዎደ፥ ዮዳሄ ናኣ ባናያ፥ “ባዳ እያ ዎ” ግድ ኪትስ።

³⁰ ባናይ ጎዳ ዱንካንያ ግዶ ገልድ እዮኣባኮ፥ “ካዎይ ነና ሀ በሳፈ ከያ ጌስ” ያግስ። ሽን እ ዛሪድ፥ “ከይከ! ታ ሀይሳን ሀይቃና” ያግስ። ባናይ፥ ብድ እዮኣብ ግዳይሳ ካዋስ ኦድስ።

³¹ ካዎይ፥ “እ ግዳይሳዳ እያ ኦ፤ እያ ዎዳ ሞጋ! እዮኣብ ፅሎ አሳ ሱ ጉስዳ ዳፋፐ ታናነ ታ አዋ ሶ አሳ ጌሻሳ።

³² እ ጉስዳ ሱ አጩዋ ጎዳይ እያዉ ቃንፃና። እ፥ ታ አዋ ዳዊቲ ኤሮናሽን፥ ባፐ ፅሎ ግድዳ ናምኡ አሳታ ማሻን ዎስ። እስራኤለ ቶራ ሞጮናይ፥ ኔራ ናአይ አበኔርነ ይሁዳ ቶራ ሞጮናይ የተራ ናአይ አማስ፥ ሱረ አስ ሽን ዎስ።

³³ እዮኣብ ሀ አሳታ ዎዳ ግሾ፥ ኤንታ ሱ አጮይ መርናዉ እዮኣባ ቦላነ እያ ኮቻ ቦላ ዎ። ዳዊቲ ቦላነ እያ ሶ አሳ ቦላ፥ እያ ኮቻ ቦላነ እያ አራታ ቦላ መርናዉ ጎዳ ሳሮይ ግዶ” ያግስ።

³⁴ ሄሳ ግሾ፥ ዮዳሄ ናአይ ባናይ ከይድ፥ እዮኣባ ሾጭድ ዎን፥ እ መላ ቢታን ደእያ ባ ጋደን ሞገትስ።

³⁵ ካዎይ ዮዳሄ ናኣ ባናያ እዮኣባ በሳን ቶራ ሞጮና ኦድ ሹምስ፤ ቃስ አብያታራ በሳን ካህንያ ሳዶቃ ሹምስ።

³⁶ ሄሳፈ ጉየ፥ ካዎይ ሶሎሞነይ ሳማ ፄግድ፥ “ነዉ የሩሳላመን ኬ ኬፃዳ፥ ያን ደአ፤ ሀራ ሶ አዉካ ቦፓ።

³⁷ ነ ካታማፐ ከያዳ፥ ቀድሮና ዛንጋራ ፕንዳ ጋላስ ሀይቃናይሳ ኤራ። ነ ሱ ጎመይ ነና ኦይካና” ያግስ።

³⁸ ሳሚ ዛሪድ፥ “ኔኒ ገይስ ሎኦ፤ ታኒ ነ አይለይ ነ ታ ጎዳይ ካዎይ ግዳይሳዳ ኦና” ያግስ። ሳም የሩሳላመን ዳሮ ዎደ ደእስ።

³⁹ ሽን ሄ ላይፈ ጉየ፥ ሳማ አይለታፐ ናምአት ማእካ ናኣ፥ ጋተ ካዋ አንኩሳኮ ብድ፥ “ነ አይለት ጋተን ደኦሶና” ግድ ሳማስ ኦድዶሶና።

⁴⁰ እ ባ ሀርያ ኮርድ፥ ባ አይለታ ኮያናዉ አንኩሳኮ ጋተ ብድ፥ ያፐ ባ አይለታ ዛሪድ ኤህስ።

⁴¹ ሳሚ የሩሳላመፐ ጋተ ብድ ስምዳይሳ ሶሎሞነይ ስእዳ ዎደ፥

⁴² ሳማ ፄግድ፥ “ኔኒ የሩሳላመፐ ሀራ ሶ ብዳ ዎደ ሀይቃናይሳ ኤራ” ጋዳ ታ ነና ጎዳን ጫቅሳብክና? ሄ ዎደ ኔኒ፥ “ነ ገይስ ሎኦ፤ ኤሮ፥ ታ ኪተታና” ጋዳሳ።

⁴³ ያትን፥ “ጎዳን ጫቅዳ ጫቁዋነ ታ ኪታ አይስ ናጋብኪ?

⁴⁴ ታ አዋ ዳዊታ ቦላ ነ ኦዳ ኢታ ኦሶ ኡባ ነ ዎዛናይ ኤሬስ። ነ ኦዳ ኢታ ኦሱዋ ጎዳይ ነዉ ዛራና።

⁴⁵ ሽን ካዎይ ሶሎሞነይ አንጀታና፤ ዳዊታ አራታይ ጎዳ ስንን መርናዉ ሳሮ ዳና” ያግስ።

⁴⁶ ካዎይ፥ ዮዳሄ ናኣ ባናያ ኪትን፥ እ ብድ፥ ሳም ሾጭድ ዎስ። ያትን፥ ካዎተይ ሶሎሞነ ኩሸን ምንድ አትስ።