1 Kawota 1 - ጌሻ ማፃፋ

አዶንያስ ካዎታናዉ ኮይስ

¹ ካዎይ ዳዊቲ ዳሮ ጭምድ ዎደ ሱግስ። እያ አይለት ማኦ እያ ቦላ ዶርንካ እያ ሆኦና እፅስ።

² ሄሳ ግሾ፥ እያ ሞርናት፥ “ካዋ ማታን ዳና መላነ እያ ሄማና መላ እስ ጌላኦ ኑ ነዉ ኮያና። ኑ ጎዳ ካዋ ሆኤናዉ እያ ማታን ዝንአናዉ ዳንዳአዉሱ” ያግዶሶና።

³ ኤንቲ እስራኤለ ቢታ ኡባን ኮይድ አብሳ ጌተትያ እስ ማላ ሎኦ ጌላኦ ሱናማ ካታማፐ ደምድ፥ ካዋስ ኤህዶሶና።

⁴ ሄ ጌላእያ ዳሮ ማላ ሎኦ። እያ ካዋ ሄማሱነ እያዉ ኦሱ፤ ሽን ካዎይ ኢራ አቅ ኤረና።

⁵ ሃግታ ናአይ አዶንያስ፥ “ታ ካዎታናዉ ኮያይስ” ያግድ ደንድስ፤ ፓራ ጋረታ፥ ፓራታነ ባ ስንን ዎፅያ እሻታሙ አሳታ ጊግስስ።

⁶ እያ አዋይ፥ “ነ ሀይሳ አይስ ኦይ?” ግድ እያ ኦይች ኤረና። አዶንያስ ዳሮ ማላ ሎኦ፤ እ አበሰሎመ ካልድ የለትስ።

⁷ አዶንያስ ፃሩያ ናኣ እዮአባራነ ካህንያ አብያታራራ ዞረትን፥ ኤንቲ እያ ማዳናዉ ጊግዶሶና።

⁸ ሽን ካህንያ ሳዶቅ፥ ዮዳሄ ናአይ ባናይ፥ ናብያ ናታን፥ ሳም፥ ረስምነ ዳዊቲ ናገይሳት አዶንያሳራ ዶኮና።

⁹ እስ ጋላስ አዶንያስ ኤንሮጌላ ፑልቱዋ ማታን ዞሄለታ ዛላ ጌተትያ በሳን ዶርሳታ፥ መሄታነ ማራታ ያርሽስ። ካዎ ናይታ ባ እሻታ ኡባነ ካዋስ ኦያ ይሁዳ አሳታ ኡባ ባ ያርሾ በሳ ፄግስ።

¹⁰ ሽን ናበይ ናታና፥ ባናያ፥ ካዋ ናገይሳታነ ባ እሻ ሶሎሞነ ፄግቤና።

¹¹ ሄሳፈ ጉየ፥ ናታን ሶሎሞነ አይዉ በርሳበኮ ብድ፥ “ኑ ጎዳይ፥ ዳዊቲ ኤሮና ደእሽን፥ ሃግታ ናአይ አዶንያስ ካዎትዳይሳ ነ ስአብኪ?

¹² ነ ነ ሸምፑዋነ ነ ናኣ ሶሎሞነ ሸምፑዋ ዋታዳ አሻነኮ ታ ነና ዞራይስ።

¹³ ካዋ ዳዊታኮ ገላዳ፥ ‘ታ ጎዳዉ፥ ካዋዉ ቱማ፥ ታፐ ጉየ ነ ናአይ ሶሎሞነይ ካዎታና፤ እ ታ አራታን ኡታና’ ያጋዳ ታዉ ነ አይሌስ ጫቃብኪ? ያትን፥ አዶንያስ ዋንድ ካዎትዴ?

¹⁴ ኔኒ ካዉዋራ ሃሳይሽን ታ ገላዳ፥ ነ ኦዳይ ቱማ ግደይሳ ኦዳና” ያግስ።

¹⁵ በርሳባ ካዋ ሃሳይሳናዉ እ ደእያ ኬ ገላሱ፤ ሱናማፐ ይዳ አብሳ ካዋ ሄማዉሱ።

¹⁶ በርሳባ ካዋ ስንን ቦንቾን ሶምኡዋ ሳአ ጋዳ ዝጋሱ። ካዎይ፥ “አይ ኮያዲ?” ያግድ ኦይችስ።

¹⁷ እያ፥ “ታ ጎዳዉ፥ ታዉ ነ አይሌስ፥ ‘ታፐ ጉየ ነ ናአይ ሶሎሞነይ ካዎታና፤ እ ታ አራታን ኡታና’ ጋዳ ጎዳን፥ ነ ፆሳን፥ ታዉ ጫቃዳሳ።

¹⁸ ሄኮ፥ ሀእ አዶንያስ ካዎትስ፤ ነ ታ ጎዳይ፥ ካዎይ ሄሳ ኤራካ።

¹⁹ እ ዳሮ መሄታ፥ ማራታነ ዶርሳታ ያርሽድ፥ ካዋ ናይታ ኡባ፥ ካህንያ አብያታራነ ቶራ ሞጮና እዮኣባ ፄግስ፤ ሽን ነ አይልያ ሶሎሞነ ፄግቤና።

²⁰ ታ ጎዳዉ ካዋዉ፥ ታ ጎዳፐ ካዉዋፐ ጉየ ኦን ነ አራታን ኡታኔኮ ኤራናዉ እስራኤለ አሳ ኡባ አይፈይ ነና ፄሌስ።

²¹ ሄስ ሀኖና እፅኮ ታ ጎዳይ ካዎይ ሀይቅድ ባ ማይዛታን ጋሄትያ ዎደ ታነ ታ ናአይ ሶሎሞነይ ዳፋባ ኦዳ አሳዳ ታይበታና” ያጋሱ።

²² በርሳባ ቡሮ ካዉዋራ ሃሳይሽን፥ ናበይ ናታን ካዎ ኬ ጋክስ።

²³ ናበይ ይዳይሳ አሳይ ካዋስ ኦድዶሶና። ናታን ካዋ ስን አድ፥ ባ ሶምኡዋ ሳአ ጋድ ዝግስ።

²⁴ ናታን፥ “ታ ጎዳዉ ካዋዉ፥ ኔፐ ጉየ አዶንያስ ካዎታናይሳነ ነ አራታን ኡታናይሳ ኦዳዲ?

²⁵ ሀች እ ዳሮ መሄታ፥ ማራታነ ዶርሳታ ያርሽድ፥ ካዋ ናይታ ኡባ፥ ቶራ ሞጮናታነ ካህንያ አብያታራ ፄግስ። ኤንቲ ሀእ እያራ ምሸነ ኡይሸ፥ ‘ካዎይ አዶንያስ ብራታ ቱስ ግዶ’ ያግሸ ደኦሶና።

²⁶ ሽን ታና ነ አይልያ፥ ካህንያ ሳዶቃ፥ ዮዳሄ ናኣ ባናያነ ነ አይልያ ሶሎሞነ ፄግቤና።

²⁷ ሀይስ ታ ጎዳ ካዉዋፐ ጉየ እያ አራታን ኦን ኡታኔኮ ባ አይለታ ኤርሶና ደእሸ ታ ጎዳይ ካዎይ ኦዳባዬ?” ያግስ።

ዳዊቲ ሶሎሞነ ካዎስ

²⁸ ካዎይ ዳዊቲ፥ “በርሳቦ ታዉ ፄግተ” ያግን ካዎይ ደእያ በሳ ገላዳ እያ ስንን ኤቃሱ።

²⁹ ሄ ዎደ ካዎይ፥ “ታና መቶ ኡባፈ አሽዳ ጎዳይ ኤርያ መላ።

³⁰ ጎዳን፥ እስራኤለ ፆሳን ታ ነዉ ጫቅዳ ጫቁዋ ቱማ ሀች ፖላና፤ ታፐ ጉየ ነ ናአይ ሶሎሞነይ ካዎታና፤ ታ አራታን፥ እ ታ በሳን ኡታና” ያግድ ጫቅስ።

³¹ በርሳባ ካዋ ስንን ባ ሶምኡዋ ሳአ ጋዳ ዝጋዳ፥ “ታ ጎዳይ፥ ካዎይ ዳዊቲ መርናዉ ካዎቶ!” ያጋሱ።

³² ሄሳፈ ጉየ ካዎይ ዳዊቲ፥ “ታዉ ካህንያ ሳዶቃ፥ ናብያ ናታናነ ዮዳሄ ናኣ ባናያ ፄግተ” ያግን፥ ኤንቲ ገልድ፥ ካዋ ስንን ኤቅዶሶና።

³³ ካዎይ “ታ አይለታ ህንተራ ኤክድ ብድ፥ ታ ናኣ ሶሎሞነ ታ ቶግያ ባቁሉዋ ቶግስድ፥ ግዮነ ፑልቱዋኮ ኤፍተ።

³⁴ ያን ካህንያ ሳዶቅነ ናብያ ናታን እያ ትይድ እስራኤለ ቦላ ካዎዮ። ሞይዘ ፑንሸ፥ ህንተ ቃላ ቁ ኦድ፥ ‘ካዎይ ሶሎሞነይ ብራታ ቱሱ ግዶ’ ያግተ።

³⁵ ህንተ እያ አጃብድ እያራ ቢተ፤ እ ታ አራታን ኡትድ፥ ታ በሳን ካዎቶ። ታኒ እስራኤለነ ይሁዳ ሃርያ አስ ኦዳ እያ ሹማስ” ያግስ።

³⁶ ዮዳሄ ናኣ ባናይ ዛሪድ፥ “አምንእ! ጎዳይ፥ ታ ጎዳ ካዋ ፆሳይ ሄሳ ፖሎ!

³⁷ ጎዳይ ታ ጎዳራ ካዉዋራ ግድዳይሳዳ ሶሎሞነራ ግዶ፤ እያ አራታ ታ ጎዳ ካዋ ዳዊቲ አራታፐ አድ ግታዮ” ያግስ።

³⁸ ሄሳ ግሾ፥ ካህነይ ሳዶቅ፥ ናበይ ናታን፥ ዮዳሄ ናአይ ባናይነ ካዋ ናገይሳት ሶሎሞነ ካዎይ ዳዊቲ ቶግያ ባቁሉዋ ቶግስድ፥ ግዮነ ኤፍዶሶና።

³⁹ ካህነይ ሳዶቅ ጌሻ ዱንካንያፐ ዛይተ ካጨን ትግ ኤክድ፥ ሶሎሞነ ትይድ ካዎስ። ኤንቲ ሞይዘ ፑንን፥ አሳ ኡባይ ባ ቃላ ቁ ኦድ፥ “ካዎይ ሶሎሞነይ መርናዉ ካዎቶ!” ያግዶሶና።

⁴⁰ አሳ ኡባይ እያ ካልድ ብዶሶና፤ ኤንቲ ቢት ቃፃና ጋካናዉ ሱሱልኤ ፑንሸነ ዱርሸ ዳሮ ኡፋይትዶሶና።

⁴¹ አዶንያስነ እያራ ደእያ እማት ግብራ ምድ ዉርስሸ ሄሳ ስእዶሶና። እዮኣብ ሞይዘ ፑኖ ስእድ፥ “ሀ ካታማን ስኤትያ ዎጫማ ግርሳይ አይቤ?” ያግድ ኦይችስ።

⁴² እ ቡሮ ኦደትሽን፥ ካህንያ አብያታራ ናአይ ዮናታን ጋክ ዎስ። አዶንያስ፥ “አነ ሃ ገላ። ነ መላ ሎኦ አስ ሎኦ ዎረ ኤሆና አገና” ያግስ።

⁴³ ዮናታን፥ “አካይ፥ ታኒ ሎኦ ዎረ ኤሀብከ! ኑ ጎዳይ ካዎይ ዳዊቲ ሶሎሞነ ካዎስ።

⁴⁴ እያ አጃባና መላ ካዎይ ካህንያ ሳዶቃ፥ ናብያ ናታና፥ ዮዳሄ ናኣ ባናያነ ካዋ ናገይሳታ እያራ የድስ፤ ኤንቲ ካዎይ ቶግያ ባቁሉዋ እያ ቶግስዶሶና።

⁴⁵ ካህነይ ሳዶቅነ ናበይ ናታን፥ ግዮነ ፑልቱዋ ማታን እያ ትይድ ካዎዶሶና፤ ኤንቲ እልልሸነ ዱርሸ ብዶሶና፤ ካታማን ስኤትያ ግርሳይ ሄሳ።

⁴⁶ ሶሎሞነይ አራታን ኡትስ።

⁴⁷ ሄሳ ቦላካ፥ ካዋ ሞርናት ኑ ጎዳ ካዋ ዳዊታኮ ሺቅድ፥ ‘ነ ፆሳይ ሶሎሞነ ሱን ነይሳፈ አድ ከሶ፤ እያ አራታ ነይሳፈ አድ ግታዮ!’ ያግድ አንጅዶሶና። ካዎይ ባ አልጋን ደእሸ ሆክድ ፆሳ ጎይንስ።

⁴⁸ ጉጅድካ፥ ‘ታ በሳን ካዎድ፥ ታ አራታን ኡትስድ፥ ታና ሀች ታ አይፈን በሲያ ጎዳይ፥ እስራኤለ ፆሳይ ጋላተቶ!’ ” ያግስ።

⁴⁹ አዶንያሳ እማት ኡባይ ሄሳ ስእዳ ዎደ ዳጋምድ፥ ላለትዶሶና።

⁵⁰ አዶንያስ ሶሎሞነ ያይድ፥ ያርሾ በሳ ካጨታ ኦይክድ ዎስስ።

⁵¹ አሳይ ሶሎሞነ፥ “አዶንያስ ካዋ ሶሎሞነ ያይድ፥ ያርሾ በሳ ካጨታ ኦይክድ፥ ‘ካዎይ ሶሎሞነይ ታና ባ አይልያ ማሻን ዎከ ግድ ሀች ታዉ ጫቆ’ ” ያጌስ ግድ ኦድዶሶና።

⁵² ሶሎሞነይ ዛሪድ፥ “እ ባ ሀኑዋ ሎይኮ፥ ሀር አቶሽን እያ ሁጰ ብናናፐ እሶይካ ቦሸተና፤ ሽን እያን ኢታተ በንትኮ እ ሀይቃና” ያግስ።

⁵³ ካዎይ ሶሎሞነይ፥ አዶንያሳ ያርሾ በሳፈ ኤሀና መላ አሰ ኪትስ። አዶንያስ ይድ፥ ሶሎሞነስ ዝግስ፤ ሶሎሞነይ እያኮ፥ “ነ ሶ ባ” ያግስ።