1 ተሰሎንቀ 3 - ጌሻ ማፃፋ

¹ ሄሳ ግሾ፥ ኑስ ገንጫናዉ ዳንዳኤቶና እፅን፥ አቴና ካታማን ኑርካ አታናዉ ቆፋ ቃችዳ።

² ህንተና ዞራናዳነ አማኖን ህንተና ምንናዳ ኑራ እስፈ ፆሳስ ኦይሳነ ክርስቶሳ ዎንገላ ኦድያ ኑ እሻ ፅሞትዮሳ ህንተኮ ኪትዳ።

³ ህንተና ጋክዳ ጎዳን ህንተፈ ኦንካ ጉየ ስሞፎ። ሄ ጎዳይ ኑስ ፆሳ ሸነ ግደይሳ ህንተ፥ ህንተ ሁጰን ኤሬታ።

⁴ ኑ ህንተራ ደእያ ዎደ ጎድ ጋካናይሳ ህንተዉ ኮይሮትድ ኦድዳ። ህንተ ኤረይሳ መላ ሄሳዳ ሀንስ።

⁵ ሄሳ ግሾ፥ ታዉ ገንጫናዉ ዳንዳኤቶና እፅን፥ “ኦን ኤር ፃላሄይ ኤንታ ፓጭድ ኑ ዳቡራ መላ አሾና አገና” ጋዳ ህንተ አማኑዋባ ኤራናዉ ፅሞትዮሳ ህንተኮ ኪታስ።

⁶ ሀእ ፅሞትዮስ ህንተ ማታፐ ይድ፥ ህንተ አማኑዋባነ ህንተ ሲቁዋባ ሎኦ ዎረ ኑስ ኦድስ። ቃስ ህንተ ኡባ ዎደ ኑስ ሎኦ ቆፐይሳነ ኑኒ ህንተና በአናዉ ላሞተይሳዳ ህንተካ ኑና በአናዉ ላሞተይሳ እ ኑስ ኦድስ።

⁷ ታ እሻቶ፥ ኑና ጋክያ ዋያንነ ኑ መቶ ኡባን ህንተ አማኑዋ ግሾ ህንተናን ምነትዳ።

⁸ ህንተ ጎዳን ምንድ ደእኮ ኑካ ደኦን ደኦስ።

⁹ ህዛ፥ ኑኒ ህንተ ጋሶን ደምዳ ኡፋይሳስ ፆሳ ዋት ጋላትኖ?

¹⁰ ኑኒ ህንተና በአናዉነ ህንተ አማኑዋን ፓጭዳባ ኩንናዉ ቃማነ ጋላስ ኑ ኩመ ዎዛናን ፆሳ ዎሶስ።

¹¹ ፆሳይ ኑ አዋይ ባ ሁጰንነ ኑ ጎዳይ የሱስ ክርስቶሲ ኑ ህንተኮ ባና ኦግያ ጊግሶ።

¹² ኑ ህንተና ዳሮ ዶሰይሳዳ ጎዳይ ህንተ እሶይ እሱዋ ሲቅያ ሲቆነ አሰ ኡባ ሲቅያ ሲቆ ህንተዉ ዳርሶነ ጉጆ።

¹³ ኑ ጎዳይ የሱስ ክርስቶሲ ባ ጌሻታራ ያ ዎደ ፆሳ፥ ኑ አዋ ስንን ህንተ ዎዛናይ ጌሽነ ቦረይ ባይናይሳ ኦድ እ ህንተና ምንና።