1 ጰፅሮሳ 4 - ጌሻ ማፃፋ

ፆሳስ አማነታ

¹ ሄሳ ግሾ፥ ክርስቶስ ባ አሹዋን ኑስ ዋየትዳ ግሾ ህንተካ ሄ ቆፋን ህንተና ዳንጭስድ ምንድ ኤቅተ። ክርስቶሳ ግሾ ግድ ባ አሹዋን ዋየ ኤክዳ ኡራይ ናጋራ ኦከ ግድ ቃንፅዳ አስ።

² ሄ ኡራይ ባ አትዳ ላይን ፆሳ ሸነ ኦናዉ ኮዬስፐ አትሽን፥ ኢታ አሾ አሞን ዴና።

³ ካሰ ህንተ አማኖና አሳይ ደእዳይሳዳ ደእደታ። ህንተ ኢታ አሞን፥ ላይማተን፥ ማን፥ ቱናተ ደንያ የን፥ ፖክያ ኤቃ ጎይኖን ካሰ ደእዳ ዱሳይ ግዳና።

⁴ አማኖና አሳራ ህንተ ሾር ባይና ኦሱዋ ኦና ግሾ ማላለትድ ህንተና ጫዮሶና።

⁵ ሽን ኤንቲ ፓፃታ ቦላነ ሀይቅዳ አሳ ቦላ ፕርዳናዉ ደእያ ፆሳስ ዛሮ እማና።

⁶ ሀይቅዳ አሳስ ዎንገላይ ሳባከትዳይ ሀይሳ ግሾሳ። ኤንቲ አሳ ባንታ አሹዋን ፕርደታና ቃስ ባንታ አያናን ፆሳ ደኦን ዳና።

⁷ ህዛ፥ ኡባባስ ዉርሰይ ማታትስ። ሄሳ ግሾ፥ ዎሳናዉ ዳንዳኤታና መላ ዎፑ ግዳ ዎዛን ደኦ፤ ማራራ ደእተ።

⁸ ሲቆይ ዳሮ ናጋራ ካምያ ግሾ፥ ኡባፈ አድ እሶይ እሱዋራ ዎዛናፐ ሲቀትተ።

⁹ ዙዙሞና እሶይ እሱዋ እማተን ሞክተ።

¹⁰ ህንተ ፆሳፈ ዱማ ዱማ አ ኬሀተ እሞታ ኤክዳይሳዳ ህንተ እሶይ እሶይ ሄ እሙዋ በሲያዳ ኦይክድ እሶይ እሱዋ ሀጋዝተ።

¹¹ የሱስ ክርስቶሳ ባጋራ ኡባባን ፆሳይ ጋላተታና መላ ኦንካ ኦድያባ ግድኮ ፆሳፈ ቃላ ኤክዳዳ ኦዶ። ቃስ ኦንካ ማድያባ ግድኮ ፆሳይ እያዉ እምያ ዎልቃዳ ማዶ። ቦንቾይነ ዎልቅ መርናፐ መርና ጋካናዉ እያዉ ግዶ። አምንእ።

አማኖ ጋሶን ጋክያ ዋየ

¹² ታ እሻቶ፥ ህንተ ታማዳ ፁግያ ዋየ ፓጭያ ግዶራ አያ ዎደ ኦራባይ ሀንዳዳ ማላለቶፍተ።

¹³ ሽን እያ ቦንቾይ ቆንጭያ ዎደ ህንተ ኡፋይሳይ ግታ ግዳና መላ ክርስቶሳ ዋይያ ህንተ ኤከይሳን ኡፋይትተ።

¹⁴ ክርስቶሳ ሱን ግሾ አስ ህንተና ጫይያ ዎደ፥ ፆሳ ቦንቾ አያናይ ህንተ ቦላ ሸምፕያ ግሾ ህንተ አንጀትዳይሳታ።

¹⁵ ህንተፈ ዋየ ኤክያ ኦንካ ሸምፖ ዎዳዳ ዎይኮ ካይሶትዳዳ ዎይኮ ኢታ ኦዳዳ ዎይኮ ገልሶናባን ገልዳዳ ሀንድ ዋየቶፎ።

¹⁶ ግዶሽን፥ ክርስታነ ግድያ ግሾ ዋየትኮ ክርስቶሳ ሱን ግሾ ፆሳ ጋላቶፐ አትሽን፥ ዬላቶፖ።

¹⁷ ፕርድ ፆሳ አሳ ቦላ ዶምያ ዎደይ ጋክስ። ህዛ፥ ሄ ፕርዳይ ኮይሮ ኑ ቦላ ዶምያባ ግድኮ፥ ፆሳ ዎንገላስ ኪተቶና አሳ ዉርሰይ አይ ግዳኔ?

¹⁸ ፅሎይ ኡንአን አትያባ ግድኮ፥ ማካላንቾይነ ናጋራንቾይ ያትን ዋናኔ?

¹⁹ ሄሳ ግሾ፥ ፆሳ ሸነዳ ዋየ ኤከይሳት ባንታ ሸምፑዋ ባንታና መዳ፥ አማንያ ፆሳስ ሀዳራ እምሸ ሎኦባ ኦ።