1 ቆሮንቶሳ 15 - ጌሻ ማፃፋ

ክርስቶስ ሀይቆፐ ደንዱዋ

¹ ታ እሻቶ፥ ታ ህንተዉ ማርካትዳ ዎንገላ ህንተ ኤክዳይሳነ ህንተ አማኖይ እያን ኤቅዳይሳ ህንተ አኬካና መላ ታኒ ኮያይስ።

² ታ ታማርስዳ ዎንገላ ምንድ ኦይክኮ ህንተ እያን አታና። ሄስ ሀኖና እፅኮ ህንተ አማኖይ ሀዳ ግዳና።

³ ታኒ ኤክዳ ኡባፈ አያ ኪታ ካሰታዳ ህንተዉ እማስ። ሄስካ፥ ጌሻ ማፃፋይ ገይሳዳ፥ ክርስቶስ ኑ ናጋራ ግሾ ሀይቅስ።

⁴ ሞገትስ፤ ጌሻ ማፃፋይ ገይሳዳ፥ ሄን ጋላሳን ሀይቆፐ ደንድስ።

⁵ ጰፅሮሳስ ቆንጭስ። ሄሳፈ ጉየ፥ ታማነ ናምኡ ሀዋረታስ ቆንጭስ።

⁶ ሄሳፈ ጉየ፥ እቻሹ ፄታፐ ዳርያ አሳስ እስቶሆ ቆንጭስ። ኤንታፈ ዳርያ ባጋይ ሀእ ጋካናዉ ፓፃ ደኦሶና፥ ሽን ጉት ሀይቅዶሶና።

⁷ ሄሳፈ ጉየ፥ ያይቆባስ ቆንጭስ፤ ጉየፐ ባ ሀዋረታ ኡባስ ቆንጭስ።

⁸ ቃስ ዉርሰን አዉጫያ መላ ግድዳ ታዉ ቆንጭስ።

⁹ ታኒ የሱሳ ሀዋረታ ኡባፈ ላፋ። ታኒ ፆሳ ዎሳ ኬ ጎድዳ ግሾ የሱሳ ሀዋረ ጌተታዳ ፄገታናዉ በሶናይሳ።

¹⁰ ሽን ፆሳ አ ኬሀተን ታ ሀእ ግድዳይሳ ግዳስ፤ እ ታዉ እምዳ አ ኬሀተይ መላ አትቤና። ታኒ ሀንኮ ሀዋረታፐ አዳ ዳቡራስ። ሽን ታራ ደእያ ፆሳ አ ኬሀተይ ኦስፐ አትሽን፥ ታና ግድከ።

¹¹ ህዛ፥ ታና ግድን ኤንቲ፥ ኑ ኡባይ ታማርሰይ ሄሳ፤ ህንተካ ሄ ኪታ አማንደታ።

ሀይቅዳ አስ ሀይቆፐ ደንዶ

¹² ክርስቶስ ሀይቆፐ ደንድዳይሳ ኑ ሳባክያ ዎደ ህንተፈ እሶት እሶት ያትን፥ ዎይግድ፥ “ሀይቆፐ ደንዶይ ባዋ” ያጎና?

¹³ ሀይቆፐ ደንዶይ ባይናባ ግድኮ ክርስቶስ ሀይቆፐ ደንድቤና ጉሱ።

¹⁴ ክርስቶስ ሀይቆፐ ደንድቦናባ ግድኮ ኑ ትምርተይ ቃስ ህንተ አማኖይካ ሀዳ።

¹⁵ ሀይቆፐ ደንዶይ ባይናሽን፥ ኑኒ ፆሳይ፥ “ክርስቶሳ ሀይቆፐ ደንስ” ያግድ ሳባክሸ ፆሳ ዎርዳንቾ ማርካታ ግድዳ ጉሱ።

¹⁶ ሀይቅዳ አሳይ ሀይቆፐ ደንድቦናባ ግድኮ ህዛ፥ ክርስቶስ ሀይቆፐ ደንድቤና።

¹⁷ ክርስቶስ ሀይቆፐ ደንዶናባ ግድኮ፥ ህንተ አማኖይ ሀዳ፤ ቃስ ህንተ ሀእ ጋካናዉ ህንተ ናጋራን ደኤታ።

¹⁸ ህዛ፥ ክርስቶሳ አማንድ ሀይቅዳይሳትካ ይዶሶና ጉሱ።

¹⁹ ኑኒ ሀ አላምያ ደኡዋ ፃላላስ ክርስቶሳን ኡፋይስ ኦዳባ ግድኮ፥ ሀ ሳአን ደእያ አሳ ኡባፈ ኑባይ አዳ ይባታ።

²⁰ ሽን ክርስቶስ ሀይቅዳይሳታስ ሀይቆፐ ደንዶን ባይራ ግድድ ቱማ ደንድስ።

²¹ ሀይቆይ እስ አሳ ባጋራ ሀ አላምያ ይዳይሳዳ ሀይቆፐ ደንዶይ እስ አሳ ባጋራ ይስ።

²² አዳመ ባጋራ አሳ ኡባይ ሀይቅዳይሳዳ ክርስቶሳ ባጋራ አሳ ኡባይ ደኦን ዳና።

²³ ሽን እሶይ እሶይ ባ ማራን ማራን ደንዳና። ክርስቶስ ኡባፈ ካሰትድ ደንድስ፤ ሄሳፈ ጉየ፥ ክርስቶሳይሳት እ ያ ዎደ ደንዳና።

²⁴ ሄሳፈ ጉየ፥ ክርስቶስ ሀላቃተ፥ ማታነ ዎልቃ ኡባ ይስድ፥ ካዎተ ፆሳ አዋስ እምያ ዎደ ዎድያ ዉርሰይ ያና።

²⁵ ፆሳይ እያ ሞርከታ ኡባ እያ ቶሁዋፐ ጋርሳን ዎና ጋካናዉ ክርስቶስ ሃራናዉ በሴስ።

²⁶ ዉርሰን እ ይሳናዉ ደእያ ሞርከይ ሀይቆ።

²⁷ ጌሻ ማፃፋን፥ “ፆሳይ ኡባባ እያ ማታፐ ጋርሳን ሃርስስ” ጌተትድ ፃፈትስ። ሽን ኡባ እያ ማታፐ ጋርሳን ሃርስስ ገይስ፥ ኡባባ እያ ማታፐ ጋርሳን ሃርስዳ ፆሳ ጉጀና።

²⁸ ኡባባይ ክርስቶሳ ማታፐ ጋርሳን ሃረትዳፐ ጉየ ክርስቶስ ቃስ ባ ሁጰን ኡባባ ባዉ ሃርስዳ ፆሳስ ሃረታና። ሄ ዎደ ፆሳይ ባ ፃላላ ኡባ ሃራና።

²⁹ ሀይቅዳይሳት ደንዶናባ ግድኮ ኤንታ ግሾ ፃማቀትያ አሳስ አይባ ዎይ ደኢ? ሀይቅዳይሳት ደንዶናባ ግድኮ ያትን፥ አይስ፥ አሳይ ሀይቅዳይሳታ ግሾ ፃማቀቶና?

³⁰ ያትን፥ ኑኒ አይስ ኡባ ዎደ ኑናተ መቶስ አድ እሞና?

³¹ ታ እሻቶ፥ ታ ጋላስ ጋላስ ሀይቆስ አዳ እመታይስ። ሄስካ፥ ጎዳ ክርስቶስ የሱሳን ደእያ ደኡዋ እስፈተን ህንተናን ጬቅያ ግሾሳ።

³² አሳ ቆፋ ግድኮ፥ ታኒ ኤፈሶናን ዶአራ ቡተትዳይስ ታና አይ ማዲ? ሀይቅዳይሳት ሀይቆፐ ደንዶናባ ግድኮ፥ “ዎንቶ ኑ ሀይቅያ ግሾ ሀች ማና ኡያና” ግያ አሳ መላ ግዶስ።

³³ ጭመቶፍተ! ኢታ ላገተ ሎኦ አማለ ኢሴስ።

³⁴ ህንተ አኬካኮ ስምተ። ናጋራ ኦፍተ። ህንተፈ እስ እስ አሳይ ፆሳ ኤሮኮና። ታኒ ህንተና ዬላያናዉ ሄሳ ጋይስ።

ደንዶ አሳተ

³⁵ እስ አስ፥ “ሀይቅዳ አሳይ ዋንድ ደንዳኔ? ኤንቲ አይ መላ አሳተራ ያኔ?” ያጎና አገና።

³⁶ ነኖ ኤያዉ፥ ኔኒ ቢታን ዘርያ ዘረይ ሀይቆና ዶለና።

³⁷ ኔኒ ዘረይ ግስተ ግድን ዎይኮ ሀራ ካ ቆሞ አይፈ ፃላላ ዘራሳፐ አትሽን፥ ዶልዳ ዶላ ግደና።

³⁸ ሽን ፆሳይ ዘረስ ባ ዶስዳ መላ መተ እሜስ። ዱማ ዱማ ዘረስ ዱማ ዱማ አሳተ እሜስ።

³⁹ መተ ኡባ አሾይ እሶ ግደና። ሽን አሳ አሾይ እሱዋ፤ መሄ አሾይ ዱማ፤ ካፎታ አሾይ ዱማ፤ ቃስ ሞሎ አሾይ ዱማ።

⁴⁰ ሳሎ አሳተ ደኤስ፤ ቃስ ሳአ አሳተ ደኤስ። ሽን ሳሎ አሳተ ቦንቾይ ዱማ፤ ቃስ ሳአ አሳተ ቦንቾይ ዱማ።

⁴¹ አዋ ቦንቾይ ዱማ፤ አጌና ቦንቾይ ዱማ፤ ፆልንቶታ ቦንቾይ ዱማ፤ እስ ፆልንቶይ ሀንኮ ፆልንቱዋፈ ቦንቾን ዱማቴስ።

⁴² ሀይቅዳይሳት ሀይቆፐ ደንድያ ዎደ ሄሳዳ ሀናና። ሀይቅያ አሳተይ ዘረቴስ፤ ሀይቆና አሳተ ግድድ ደንዴስ።

⁴³ ቶሸን ዘረትድ፥ ቦንቾን ደንዳና፤ ዳቡራን ዘረትድ፥ ዎልቃን ደንዳና።

⁴⁴ መተ አሳተይ ዘረትድ፥ አያና አሳተ ግድድ ደንዳና። መታ አሳተ ደእኮ፥ አያና አሳተ ደኤስ።

⁴⁵ ሄሳዳካ፥ ጌሻ ማፃፋን፥ “ኮይሮ አደይ፥ አዳመይ፥ ፓፃ ደእያ አሰ ግድድ መትስ” ያጌስ። ሽን ዉርሰ አዳመይ፥ ክርስቶስ፥ ደኦ እምያ አያና ግድስ።

⁴⁶ ሽን መታ አስ ኮይሮ ይን፥ ጉየፐ አያና አስ ይስፐ አትሽን፥ አያና አስ ኮይሮ ይቤና።

⁴⁷ ኮይሮ አዳመይ ቢታፈ መትዳ ቢታ አስ፤ ናምአን አዳመይ ሳሎፐ ይዳ ሳሎ አስ።

⁴⁸ ቢታፈ መትዳይሳት ቢታፈ መትዳይሳ ዳኖሶና። ሳሎይሳት ሳሎፐ ይዳይሳ ዳኖሶና።

⁴⁹ ኑኒ ቢታፈ መትዳ አድያ ዳነይሳ መላ ሳሎፐ ይዳ አድያ ዳናና።

⁵⁰ ታ እሻቶ፥ ታ ገይስ ሄሳ፤ ሀእ ኑ ማእዳ አሳተይ ፆሳ ካዎተ ላታናዉ ዳንዳኤና። ዎቅያ አሳተይ ዎቆና አሳተ ላተና።

⁵¹ ታ ህንተዉ እስ ፁራ ኦዳና። ኑ ኡባይ ሀይቆኮ፥ ሽን ዉርሰን ኡባይ ላመታና።

⁵² ሞይዘይ ፑነትያ ዎደ፥ አይፈይ ቅጵ ፄላናዉ ሀሳዮና ላመታና። ሀይቅዳ አሳይ ዎቆና አስ ግድድ ደንዳና፤ ኑካ ላመታና።

⁵³ ሀይስ ዎቀይስ ዎቆናይሳ፥ ሀይስ ሀይቀይስ ሀይቆናይሳ ማአናዉ በሴስ።

⁵⁴ ሀይስ ዎቀይስ ዎቆናይሳ፥ ቃስ ሀይስ ሀይቀይስ ሀይቆናይሳ ማእያ ዎደ፥ ጌሻ ማፃፋን፥ “ሀይቆይ ፆኖን ምተትስ” ግያ ቃላይ ፖለታና።

⁵⁵ ሄሳዳካ፥ “ሀይቆ፥ ነ ፆኖይ አዉን ደኢ? ሀይቆ፥ ነ ቆህያ ዎልቃይ አዉን ደኢ?” ግዳ ቃላይ ፖለታና።

⁵⁶ ሀይቆይ ዱክያ ዎልቃይ ናጋራ፤ ቃስ ናጋራ ዎልቃይ ህገ።

⁵⁷ ሽን ኑ ጎዳ የሱስ ክርስቶሳ ባጋራ ኑስ ፆኖ እምያ ፆሳ ጋላት ጋኮ።

⁵⁸ ሄሳ ግሾ፥ ታ ሲቆ እሻቶ፥ ቃፆና ምንድ ኤቅተ። ጎዳ ኦሱዋን ህንተ ዳቡረይስ ጮ ግዶናይሳ ኤርድ ኡባ ዎደ ጎዳ ኦሱዋ አዛሎና ኦተ።