Yohanna 9 - Nouveau Testament en Guidar

Zezu ambəl gənək ɗəf məwan daŋgar

¹ Adan Zezu atoŋ kəla təki maɓɓani, awlak ɗəf muwan daŋgar.

² Gewleɗ nan assohonənka: Mərbə zəga, vi mi muwa ɗəffəŋ daŋgar di? Vi mambray nan sa? Walla vi mambray net migilni?

³ Zezu azlanəka: Vi mambray nani ɓa, vi mambray net migilni ɓa bo, məwan daŋgar ɓa. Agəɗ vasna vi sembe na Maŋgəlva dərbə gən azani.

⁴ Adan kapayi tagay, say məɗɗa səm wəzeɗe na ɗəf də slənwa. Dəfəɗ go'oy, pay nan ɗəf tay dədawɓap wəɗɗa wəza ɓa.

⁵ Pay nəsaw a duniya, əntə təki babar nani.

⁶ Dərɓaga Zezu apel wənnəska. Atəfək mefɗe afuŋgu alɓanək dələv dənɗaŋ suɗike, akipik aka hara daŋgar naka, amna:

⁷ Dokkuɗa a pe'e məs adawyaŋ na Silowama. Va wənah məs məyan na masləŋ. Daŋgar ambatək adaka, aɗak harani, amilke, tayula.

⁸ Adan megeŋgiɗin dit ɗii məzulanən daŋgla zəga aba tive, aɓɗaŋ na: Ɗəffəŋki dədawsan aba tive wəŋgla zəga nak ɓa sa?

⁹ Ɗii meɓɓet aɓɗaŋ na: Ndəni. Ɗii meɓɓet aɓɗaŋ na: Awwo, ndəni ɓa, amma ɗəffi dəgil va ndəni. Amma ndən sən kiyən amna: Əntə.

¹⁰ Assohonənka: Mbarmbari horok akol di?

¹¹ Azlansitike: Ɗəf məs adawyaŋ na Zezu dəlaɓ dələv suɗike akip arawa, anah su na: Dokkuɗa a pe'e na Silowama. Nəmbat adaka, nəɗaka, haraw akolko.

¹² Assohonənka: Aŋgay ɗəf nan asan di? Azlansitike: Nəsən ɓa.

Farisiyenɗe* assohonənək daŋgar

¹³ Akanənək daŋgar nak azet Farisiyenɗe.

¹⁴ Vi pay məs Zezu allaɓ dələv akip ara daŋgar, haran akolu, dəpas pay naffeti*.

¹⁵ Vini, Farisiyenɗe assohonən daŋgar: Mbarmbari agəɗ di, kədawla kakaŋ di? Azlansitike, dələv akip suɗike arawa, nəɗa, haraw akolu.

¹⁶ Ɗii meɓɓet səret Farisiyenɗe aɓɗaŋ na: Məgəɗ zəga vaska dəde səza Maŋgəlva ɓa, vi dərma wənna pay naffet ɓa. Amma ɗii meɓɓet aɓɗaŋ na: Mbarmbari ɗəf adawɓap wəɗɗa zemvit sokeneɗ ves va məs mambrayi di? Agayaŋgək awalaŋ ziti.

¹⁷ Farisiyenɗe assohonənək daŋgar əmpa: Kəmna akol sukuk horoko, nok mbar kənah akan kandi? Amna: Ɗəf van məs kleŋgiyi.

¹⁸ Amma ɗii gugiriɗ net Yahudiyenɗe dəŋgereŋ wətaf wənna daŋgar na, daŋgaryi laŋka haran akoluk kakaŋ ɓa. Ayeninik migilni.

¹⁹ Assohotinke: Ɗəffəŋ wətukumi sa? ya mbari adawla kakaŋ di?

²⁰ Migilin azlanənka: Məsənka wətəmi, məwan daŋgari bo.

²¹ Amma məsən va haran akol ɓa, məsən ɗəffan dəkolsən ɓa'a. Məssohoni, nan bo metiŋgini, wazlansən kiyən.

²² Migilin anəhaŋ vas na vi tahəŋ wəgeslne'eŋ, sit ɗii gugiriɗ net Yahudiyenɗe. Vi ɗii gugiriɗ net Yahudiyenɗe aslereŋgək na, an ɗəf asənək na Zezuwi Messiya* wagil gənən sədəv gəla nawpel wənneti.

²³ Vini migilin anahaŋ na: Metiŋgini wazlansən kini.

²⁴ Farisiyenɗe ayanənək daŋgar ma sula'ən, apsənən na Maŋgəlva tayəpprəm suko anah goŋga. Nam məsənək ɗəffəŋka məs mambrayi.

²⁵ Azlanəka: Naw na, wanəsən ɓa an məs mambrayi walla tay də mambray ɓa. Amma an məs nəsən harana: Daŋgar nan laŋka, kakaŋ əntatə ula.

²⁶ Assohonənka: Mi agəɗ suk di? Mbarmbari akol suk horok di?

²⁷ Azlanəka: Nənah sukuməka daga farə, amma kəpprəmən maw ɓa. Vi mi kəŋglaŋ wəpprəmən əmpa'a di? Walla nokum bo mokum aka wəkpaŋ gewleɗ nan sa?

²⁸ Aranənənka: Aɓɗaŋ na: Əstə gawla nani, nam gewleɗ na Moyis mənani.

²⁹ Məsənək na Maŋgəlva apel sənək Moyis amma nan na məsən təki ade ɓa.

³⁰ Azlansitike: Aye, sokene. Kəsəŋgən təki ade ɓa, ya yas akol suwək harawa.

³¹ Məsənəka Maŋgəlva azlansəna məs mambray ɓa, amma tay zlansit məzu gakdakənəni, məzəsbanən wəŋgla nani.

³² Daga wətəŋ na duniya, ɗəf tay dəpprəm ɗaah na ɗəf akoluk hara ɗəf məwan daŋgar ɓa.

³³ Va ɗəffəŋ səza Maŋgəlva ade ɓa aɓap na wəɗɗa zəga ko suɗike ɓa.

³⁴ Apsənən na: Istatə adəv mambray daga muwoko, mokaka wərban səm zəga sa? Agil gənənək sədəv gəla nawpel wənnet Yahudiyenɗe.

Daŋgar na makra ɗəffa

³⁵ Adan Zezu apprəm na agil gənənka, a akayanəka, assohonəka: Kətafək Wətən Ɗəf* sa?

³⁶ Azlanəka: Mərbə zəga, anah suwa naway di? Vi nətaf gəni.

³⁷ Zezu apsən na: Istatə ulani, ndən dədawpel suk kakaŋka.

³⁸ Amna: Ɗəfdaya, nətafəka. Akdukuk takpran aba Zezu.

³⁹ Yaŋ Zezu amna: Nəde a duniyaŋ na vi kaɗɗa kitayi, vi deŋgerɗe dulaŋ gəni, məs heret bo dətippeŋ gəni.

⁴⁰ Yaŋ Farisiyenɗe məs na maŋgavan apprəmən vaska, assohonənka: Nam bo deŋgerɗe mənan sa?

⁴¹ Zezu apsit na: Va deŋgerɗe kənanaŋ ɓa, asna munokum tat də mambray ɓa. Amma munokum tatə nahaŋ na: Mənam tatə ula. Vini mambray nokum tay.