Yohanna 5 - Nouveau Testament en Guidar

Zezu ambəl gənək məs gbəgba' məɗeŋgreŋ

¹ Dərɓagani Yahudiyenɗe aɗɗanənək wəzləra na Paska*, Zezu bo ambatək a Zerusalem.

² Adak amaŋgava walaŋ gəla metiŋ məs adawyaŋ na madamba net timeŋgiɗi, pe'e tay məsso'ən, genzekɗe tahəŋ sle kiyən tərwəslə. Iya na pe'e nan də ma net Ibrahiŋkoreɗ na Baytizata.

³ Məs gbəgbaɗe tahəŋ məvoŋgit ambet genzekɗe nek diiɗa: Deŋgerɗe vədelɗe dit məs gbəgbaɗe məɗeŋgreŋɗe. [Tahəŋ wəgenin iŋkile daɓlaŋ,

⁴ vi pay maɓɓani maslay na Ɗəfdaya tay pirken aret iŋkile a pe'e neki, də wəɓleti. Məs gbəgba' məs dətoŋ dabəŋ aret iŋkile net pak dərɓaga wəɓla neti, ambəlka səka gbəgba' nan ko awani di pakə.]

⁵ Adak na ɗəf tay məs gbəgba' dəgəɗ wəsva kaklaw hoku kiyən dədopoɗo.

⁶ Adan Zezu awla tay ɗuffo, asənək avoŋgək də gbəgba' nani, assohonəka: Mok tayaka wəmbəla sa?

⁷ Məs gbəgba' azlanəka: Mərbə zəga ɗəf tay natoŋgu aret iŋkile pay adaɓlaŋ ɓa. An əntatə wəgay wəmbata ɗəf maɓɓan toŋ kiyu dabəŋ aret iŋkile.

⁸ Zezu apsən na: Asili, agəm kukur noko doko.

⁹ Go'ləŋ ambəlka, agəmək kukur nani, ambatka. Amma pay nani pay naffeti*.

¹⁰ Vi ni Yahudiyenɗe anah sənən ɗəf məs dəmbəl naka: Dəpaŋ pay naffeti, ma henziŋ nam dəpan suk tive nawslan kukur nok pay naffet ɓa.

¹¹ Azlansitike: Ɗəf məs dəmbəl gu dənah suwa agəm kukur noko, doko.

¹² Yaŋ assohonəni: Naway dənah suk na agəm kukur noko, doko di?

¹³ Amma dəsən na naway dəmbəl gəni di ɓa, vi Zezu azarək səkəti nani ambatka, vi ɗii diiɗa tahəŋ adaka.

¹⁴ Dərɓaga aska Zezu arəhək adəv gəla metiŋ naw zuliya*, anah sənəka: Yaŋ, kakaŋ kəmbəlka, kədaɗɗa ɗaah mambray əmpa ɓa, vi an dədayki as adazan azok ɓa.

¹⁵ Ɗəffəŋ ambatka, anahsitik Yahudiyenɗe. Zezu dəmbəl gəni.

¹⁶ Vini Yahudiyenɗe atəŋgən wəkayan Zezu, vi ambəl gən ɗəf nan pay naffete*.

¹⁷ Amma azlanək na: Affu tay ɗa wəza ha faɗə, naw bo say nəgəɗ gəni.

¹⁸ Vi wən aski Yahudiyenɗe akayanən Zezu day vi kawbayən, vi agəɗ wəza pay naffeti kaaka ɓa, amma vi anah əmpa na Maŋgəlvayi Affəni, asla ki zən də Maŋgəlva.

Sembe na Wətən Maŋgəlva*

¹⁹ Vi aski Zezu anahsiti: Gesiŋ nədawnah sukum, Wətən agəɗ na ko mi sən kiyən ɓa, say an məs awəl ava Affən agəɗi. An məs Affən agəɗ pakə, ndəni Wətən bo adaɗɗa.

²⁰ Vi Affən aŋgluwək Wətən, tay wərbansən an adaɗɗa pakə. Warbet zigeɗ dekiyit es də metiŋ, vi Wətən dəɗɗe gəni. Vini akəgətaŋ akani.

²¹ Va Affən adawsil git ɗii məmtiti, asugit medereti, vaski bo Wətən adapsit zeŋgille sit ɗii en məs aŋgəl pakə.

²² Affən ataw na kita aka ɗəf ko taka ɓa, amma apsənək sembe sən Wətən nawtaw kita,

²³ vi ɗii dəgakdakanən gən Wətən va ada gakdakanən Affən məs dəsləna, ɗəf məs aw gakdakan Wətən ɓa, agakdakan na Affən məs dəslən ɓa.

²⁴ Gesiŋ nədawnah sukum: Ko naway dəpprəm wəpel nawa, dətaf ɗəf də slənwa, warəh wəkoh ha faɗə, kita armana ɓa. Atoŋguk ki wəmta, ha gap atəki wəkoho ha faɗə.

²⁵ Gesiŋ nədawnah sukum: Pay nan wade, agəɗək səkay kana, ha ɗii məmtit wapprəmən wəla Wətən Maŋgəlva*, ɗiiyen dəpprəmən pak wasoŋ medereti.

²⁶ Va Affən asan də sembe nasugit medereti, vaski apsən sembe sən Wətən nawsugit medereti.

²⁷ Apsənək sembe sən Wətən dətaw gən kita vi Wətən Ɗəffi*.

²⁸ Adawsan wənnagət azokum ɓa, vi pay wade, ɗii mimtit sədəv magamas wapprəmən wəlani, wagilyoŋ sədəv magamas neti.

²⁹ Məɗɗaŋ wəza mogon wasilyoŋ vi kawrəh zeŋgille məs nawsan ha faɗə. Amma məɗɗaŋ mambray wasilyoŋ vi kita.

Məɗɗaŋ saydawa aka Zezu

³⁰ Nəɓap na wəɗɗa ko mi sən kiyu ɓa. Intatə taw kita va Maŋgəlva aɗi suwa. Kita məs nədawtawəŋka, asləka, vi nəkay na wəɗɗa an məs nəŋgəl ɓa, amma an məs də slənu aŋgələ.

³¹ An nəgəɗək saydawa aka zuwa, saydawa nan asana gesiŋ ɓa.

³² Amma ɗəf tay naɗɗa saydawa akawa, nəsənək məs adaɗɗa akawəŋ gesiŋgi.

³³ Kəsliŋginik masləŋɗe aza Zaŋ, saydawa nan gesiŋgi.

³⁴ Maw taya ka saydawa na ɗəf ɓa, amma nəpel sukum wənna Zaŋ na vi dəbaah sukum gən nawkoh gukum.

³⁵ Zaŋ tay va pitirla məsɗani, tay kasaka, kənekenənək zukum də pitirla nan suɗike.

³⁶ Amma əntat də saydawa dayki Zaŋ də daya: Wəzeɗe məs Affu avayiŋki vi nəɗɗe gəni, ndəɗaŋgəŋ dədaɗaŋ saydawa akawa Affən də slənwa.

³⁷ Affu də slənu tayəɗɗa saydawa. Nokum kəpprəmən na ɗaah wəlan ɓa, kulanən na ɓa bo.

³⁸ Kərmanən wəpel nan amokrokum ɓa, vi kətafən an məs aslən ɓa.

³⁹ Munokum tatəŋɗetin ɗerewelɗe, munokum tat də wəɗum nawrəh zeŋgille məs nasa ha faɗ dəndən. Mbarakana ɗerewelɗe net wənnaw adawpeleŋ.

⁴⁰ Amma kəŋgereŋ wəzoŋ azaw kərəhaŋ gən zeŋgille an nasa ha faɗ ɓa.

⁴¹ Nəkay na gakdak səzet ɗii ɓa.

⁴² Amma nəsən kumko, kəŋgluwən Maŋgəlva ɓa.

⁴³ Nəɗɗak an Affu aɗi su naɗɗa amma kətafwən ɓa. An ɗəf maɓɓan adek də saydawa sən kiyən wakəŋgluwəni.

⁴⁴ Ko naway tay kay wəŋgla nani, amma kəkayaŋ na wəŋgla na Maŋgəlva ɓa. Ya mbarmbari kəda ɓapən wətafwən di?

⁴⁵ Kəda ɗumoŋ na wanəwəli kum aba Affuwa ɓa. Moyis məs kəsənaŋgəŋka, ndəni na wəli kum.

⁴⁶ Va kətafənək Moyis gesiŋ na, kəta wakətafwəni, vi Moyis wənaw averi.

⁴⁷ Amma adan kətafən an aver ɓa, mbari kəda ɓapən wətafən wəpel naw di?