Yohanna 13 - Nouveau Testament en Guidar

Zezu askoɓək tilit gewleɗ nani

¹ Apələk wəsɓəta taka naɗɗa wəzləra na Paska*. Zezu asənək pay nan agapək napan duniya, kamndan aza Affən. Aŋgluwik ɗii nan na duniya aŋgluwik ha pay nagrak nani.

² Zezu dit gewleɗ nan tahəŋ wəzəmaŋ moskoya, Ibilisa aɗɗak wəɗum nan amakra Zuda, wətən Simoŋ Iskariyot, vi kawzəm ki Zezu.

³ Zezu asənka, daga səza Maŋgəlva ade, wamil aza Maŋgəlva əmpa, Maŋgəlva apsənək sembe aka zəga pakə.

⁴ Asilik sətəki wəzəm waya, agbukuk lukut nani, aynanək zana.

⁵ Yaŋ amet iŋkile adəv tasa, atəŋgək wəskoɓ tilit gewleɗ nani, akəlɓitik iŋkile dəzana məs aynə naka.

⁶ Adek aza Simoŋ Piyer. Piyer apsən na Ɗəfdaya wakəskoɓ təlu sa?

⁷ Zezu azlansən na: Kəsəna an məs nədaɗaŋ tagay kakaŋ ɓa. Amma akəsən abeŋ suɗike.

⁸ Piyer apsən na: Awwo kəskoɓ na təlu ɓa. Zezu apsəna: An nəskoɓ tuluk ɓa na, haran nok taya zaw əmpa ɓa.

⁹ Piyer apsən na: Ɗəfdaya, asna kədaskoɓ təlu kaaka ɓa, amma askoɓ vaw də kiyu pakə.

¹⁰ Zezu apsən na: An ɗəf aslayka, wəray tay naslay əmpa ɓa. Say tələn kaaka adoskoɓo, vi zən salalayi. Salala kənanaŋ, amma pak kənanaŋ vas ɓa.

¹¹ Zezu asənək ɗəf məs nawzəm kini, vi ni anah na: Pak kənanaŋ salala ɓa.

¹² Səɓa Zezu agrak wəskoɓ tilti, aguluk lukut nan əmpa, asanək atəki nawzəma, apsit na kəpprəmanənək məs nəgəɗ sukuməŋ sa?

¹³ Munokum tatə yəwənna mərbə zəga may Ɗəfdaya, Vaski gesiŋ bo, vi vas nan gesiŋ.

¹⁴ Vi vaski, an mərbə zəga nani, wala Ɗəfdaya, wanəskoɓ təlkum sa, an vaski na aslək kəskoɓən gən təl zukum.

¹⁵ Nəɗɗa vas na wərban sukumi, vi kəɗɗanən gən vaska va nəɗɗa sukum.

¹⁶ Gesiŋ nədawnah sukum: Məgəɗ wəza aday na ki daya nan də daya ɓa, masləŋ bo aday na ki məzu sləŋ gən də daya ɓa.

¹⁷ Kəkaŋ kəsənənka, wakpaŋ zəzay azokum an munokum tatəɗɗanən vaska.

¹⁸ Nəpel akokum pak ɓa, nəsinik ɗiiyen nəweli. Amma aslək an ɗerewel apel dəsaŋ gən gesiŋ: Məs dəzəm way də ina ndən dəɓoŋ akawa.

¹⁹ Nənah sukumək daga kakaŋka, daga wənnan dəɓəl wəɗɗa ɓa. Vi an agəɗka kəsənən gən na əntə nəsaw ina.

²⁰ Gesiŋ nədawnah sukum: Ko naway dətaf masləŋ nawa, atafwəkana. Ko naway dətafwa, atafək ɗəf məs də slənwa.

Zezu arbanək Zuda məs dədawzəm kini

²¹ Səɓa Zezu apel wənnəska, makran assanka, amna: Gesiŋ nədawnah sukum, ɗəf taka səmbokum wazəm kiwa.

²² Gewleɗ nan awlanənək ziti, dəsənən na aka nawa adawpele di ɓa.

²³ Gawla məs Zezu aŋgəl taya maŋgava Zezu.

²⁴ Piyer Simoŋ amirzi'ik də haran dəssohon gən Zezu aka naway apel di.

²⁵ Gawla nan assohonək Zezu də wəseske'e, naway di Ɗəfdaya.

²⁶ Zezu azlanəka: Wanəgul vawa wanərɗa waya sədəv hiluwe, ɗəf məs nədapsəni ndəni. Yaŋ Zezu arɗa way sədəv hiluwe ayopuko aret teɓi apsənək Zudas wətən Simoŋ Iskariyot.

²⁷ Yaŋ Zudas ataf way mərɗan naka, Satan aguluk a makrani. Zezu apsən na: An məs kəŋgəl wəɗɗa aɗɗa gu'u.

²⁸ Ɗəf tay səmbet ko taka dəpprəm vi mi Zezu anahsən vas di ɓa.

²⁹ Vi Zudassi mərəm deleɗi, ɗii diiɗa azet na Zezu adaŋgla wənahsən na dokəlbaah zəga dənɗaŋ an məs naɗɗa wəzləra dəndən walla anah na apsit zəga maɓɓan sit məs saheŋɗe.

³⁰ Yaŋ Zuda ataf way naka agilik gu ləŋgə. Dəfɗi.

Wəɗi wən məs naɗɗa meleketeni

³¹ Dərɓaga wəgilya na Zuda, Zezu amna: Kakaŋ na gakdak na Wətən Ɗəf* arbanək zəni, gakdak na Maŋgəlva bo arbanək zən dəni.

³² An gakdak na Maŋgəlva arbanək zən adəv Wətəni, Maŋgəlva bo warban gakdak məs Wətən arah sən kini. Vaski adaɗɗani.

³³ Kirtuwa əntat də munokum pay suɗike kaaka tagay. Dərɓagani wakəkayawəni, amma əntatə nahsukum kakaŋ na məs nənah sit Yahudiyenɗe na: Kəɓapaŋ na wəmbat a təki məs nədadaw ɓa.

³⁴ Yaŋ nəɗi sukumək məs kədaɗɗaŋ meleketeni: Məŋglu zukum. Say məŋglu zukum va nəŋgulukum.

³⁵ An munokum tatə wəŋgluwən zukum asna ɗii wasən kumən na gewleɗ naw kənanaŋ.

Zezu də Piyer

³⁶ Simoŋ Piyer assohonək Zezu: Ɗəfdaya aŋga kədadok di? Zezu azlan sənəka: Kəɓap na wəmbat atəki məs nədadaw kakaŋ ɓa, amma abe aŋ na wakəsbawa.

³⁷ Piyer apsən na: Vi mi nəsbok na kakaŋ ɓa di? Nəzaɓanək zuwa vi kapsən zeŋgillewa, kamta viko.

³⁸ Zezu apsən na: Kəzaɓanək zuk napsən zeŋgillok viyu gesiŋ sa? Gesiŋ nədawnah suko: Ha gəmnda adawhəm paa man taka wakənah təl hoku kəsənu ɓa.