Wəza net Masləŋɗe 6 - Nouveau Testament en Guidar

Aweleŋgək ɗii buhul dəbaahaŋ sitin gin masləŋɗe

¹ Pay nan dəpaska, ɗii məzu tafaŋ tahəŋ wənzləraŋ pay pakə, wəgay agəɗək aka waleŋgit Yahudiyenɗe məzupeleŋ ma Grek, dit Yahudiyenɗe na walaŋ gəla. Yahudiyenɗe məs dəsənaŋ ma Grek aɓɗaŋ na: Gil net gəbayɗe nam awrəhaŋ way va adawɗakən pay pak ɓa.

² Vini gewleɗi klaw kiyit sula akkaletin ɗii məs dətafaŋ pakə, aɓɗaŋ na: Dəslə məppanə gən wəpel wənna Maŋgəlva vi wənna uɗakan way ɓa.

³ An vaski na, milmiŋgiɗwa, muwel ɗii buhul suwaloŋkum, ɗii təstəssə, məs məknahit də Əmpəs Salala, məs də wəsən an təstəssə, məppanə gən wəzaŋ aveti.

⁴ Nam na, məgaysən gən wəzuliya də wəpel wənna Maŋgəlva.

⁵ Wən nan annekək zit ɗii dətafaŋ pakə, awelinik Etiyen, ɗəf məs də wətafa, məs dəknah də Əmpəs Salala. Gəm əmpa bo awelinik Filip, gəm Porokorus, gəm Nikanor, gəm Timon, gəm Parmenas, də Nikalawus ɗəf na Antakiya malakayi məs dətoŋ wəsban wənnet Yahudiyenɗe.

⁶ Ɗii na Maŋgəlva akeninik azet masləŋɗe. Masləŋɗe azuliyaŋka, aɗiyənək vet aket ɗii məwelit neki, aɗininik aka wəza neti.

⁷ Vaski bo wəpel na Maŋgəlva adawtraya. Wəŋɗa net ɗii dətafaŋ tayənzləra pay pak a Zerusalem, ɗii diiɗa suweleŋgit məs dəlveŋge atafənək wənnani.

Ɗii gugiriɗ net Yahudiyenɗe armanənək Etiyen

⁸ Etiyen ndəni ɗəf məs dəknah də sembe də mbəlembəle na Maŋgəlva, agəɗək sokeneɗ diiɗa aweleŋgit ɗiiyi.

⁹ Amma ɗii maɓɓet məs dəzoŋ sədəv gəla nakkal net Yahudiyenɗe, məzu ɗiiyen zit na balemɗeŋ ɓa, dəŋgluwən wənna Etiyen ɓa, aweleŋgit bo Yahudiyenɗe tahəŋ məs dəzoŋ sə Sirene də Aleksandiriya. Ndəɗaŋ dit Yahudiyenɗe məs dəzoŋ sə Silikiya də Asiya, abayaŋgək ma də Etiyen.

¹⁰ Amma Əmpəs na Maŋgəlva apelsənək Etiyen də wəsən an metiŋgin ha dəɓapən wəbay man ɓa.

¹¹ Vini apsitin deleɗ sit ɗii meɓɓet dənahaŋ gən na: Məpprəmək apelik mbrayen aka ma henziŋ na Moyis, də aka Maŋgəlva pakə.

¹² Vaski kan asil gənən makret ɗii na walaŋ gəla, ɗii gugiriɗe dit məsənaŋ zəga na ma henziŋ. Azlahaŋ sənənək Etiyen, armanənka, akanənək abet məzu səɓaŋ.

¹³ Yaskan akiyən saydaweɗ məwaŋsənən tepelke, aɓɗaŋ na: Ɗəffəŋka, tay pel mbrayen pay pak aka gəla na Maŋgəlva an salala, də aka mahenziŋ na Moyis pakə.

¹⁴ Vi məpprəmək dawnah na: Zezu məs na Nazaret wazlu gəla na Maŋgəlva, wakpaŋgan wən məs Moyis arban səməŋka.

¹⁵ Məzu səɓaŋ məs dəsoŋ adak pak aziyənək heret aka Etiyen, awlanənək haran agilik va maslay.