Wəza net Masləŋɗe 5 - Nouveau Testament en Guidar

Ananiyas dət Safira

¹ Ɗəf tay na, iya nan na Ananiyas, dət ɗak nan Safira, aslerinik meti avələnək guli neti.

² Awɗeketik deleɗ nani, azeɓetik meɓɓeti, meɓɓet bo akek azet masləŋɗe. Ɗak nan bo təsənək wənneti.

³ Piyer apsəna: Ananiyas, vimi kəppan Satan atoŋ amakrok di? Kəwək tepelke sən Əmpəs Salala*, kəɗɗametik deleɗ meɓɓet na guli noko.

⁴ Daga kəɓəl wəvəl guli nan ɓa noki, səza kəvəl bo noki. Ya vimi kərma makrok kaɗɗa wəza zevin aŋkəŋ di? Sən Maŋgəlvayi kəwəsən tepelke, sit ɗiiyi ɓa.

⁵ Adan Ananiyas apprəm wənnəska, asbərka, amtəka. Ɗii məs dəpprəmən wənnəs pak makret azlaka.

⁶ Gewleɗ azoŋko, atərnənka agil gənənka, andəknənka.

⁷ Dərɓagani təbəs hoku, ɗak nan tədeke, amma təsən an məs dəgəɗ aka zilit ɓa.

⁸ Piyer apsət na: Anah su wənnet deleɗ nokum va kəvələn guli nokum da? Safira təzlanəka, təmna: Vaski deleɗ nani.

⁹ Piyer apsət na: Vimi kəslerin mokum də ziluk kaw rakan Əmpəs na Ɗəfdaya di? Gewleɗ məs də ndəkən ziluk tahəŋ ameŋgle kakaŋka, nok bo waslokuni.

¹⁰ Vaski ləŋgə təsbərka təmtəka. Gewleɗ atoŋgoŋko, arəh tənək məmtəta, aslatənka, andək tənək amaŋgava magamas na zilta.

¹¹ Makret kretiyenɗe məs dəpprəmən wənnəs pak azlaka.

Masləŋɗe aɗɗaŋgək sokeneɗ diiɗa

¹² Masləŋɗe aɗɗaŋgək sokoneɗ diiɗa aweleŋgit ɗiiyi. Ɗii məs dətafaŋ pak akkalaŋgək amba genzek na Salmoŋ.

¹³ Ɗəf nawalaŋ gəla tay dədadan azet ko taka ɓa vi geslne, ko də ɗii adawnahaŋ na ɗii mogetiŋ zlaŋ.

¹⁴ Pay pak zel dit gil tahəŋ wənzləraŋ aket də wətaf Ɗəfdaya.

¹⁵ Yaŋ kan ɗii adaw kinin məs gbəgbaɗe aket tiveɗi, məvoŋgit aket hargaŋguɗe dit buseɗe, vi an Piyer tay toŋ dədaka, kuzuŋ zeŋgilhen wambat aketi.

¹⁶ Ɗii diiɗa dəzoŋ sə walaŋ gəla məs tuwəɗ ki Zerusalem pakə, akiyənik məs gbəgbaɗe neti, dit ɗii mitemti, pakəs ambəlaŋka.

Masləŋɗe azəmaŋgək saha avet ɗiiyi

¹⁷ Məs dələv* metiŋgin dit ɗii məs dədasoŋ dəndən pak dit ɗii məs dədasbetin Sadusiyenɗe, aɗɗaŋgək kotorok net masləŋɗe diiɗa sawɓa. Aɓɗaŋ na, say wəzəm git saha.

¹⁸ Armeninke, asgetinik a daŋgay.

¹⁹ Amma yaŋ dəfəɗ nani maslay na Ɗəfdaya ade, akoluk madambeɗe na daŋgay, agil gitik masləŋɗe apsit na:

²⁰ Mədoŋ adəv gəla metiŋ naw zuliya*, mənah sit ɗii pak wənna zeŋgille meleketeni.

²¹ Masləŋɗe aɗɗanənək vaska, də mompum pum atoŋgoŋguk adəv gəla metiŋ naw zuliya, adaki atəŋgaŋ wərban wənnan sit ɗiiyi. Yaŋ məs dələv metiŋgin dit ɗii məs dədasbanən pakə, ayeninik ɗii gugiriɗ net Yahudiyenɗe pakə dit məzu səɓaŋ net Yahudiyenɗe pak akkalaŋka, yaŋ kan aslinin sozeɗ dədoŋ gən wəkayetin masləŋɗe sə daŋgay də kiyən gini.

²² Sozeɗ agapaŋgək a daŋgay, dirihin masləŋɗe ɓa, yaŋ amilyoŋ anah sitin wənnan sit məzu səɓaŋ.

²³ Aɓɗaŋ na: Mərəhək madamba pak məmpani, məzu ganən pak tahəŋ wəganəni, amma yaŋ mukol madamba na, mərah ko ɗəf taka adak ɓa.

²⁴ Adan daya net məgaŋ gəla metiŋ na zuli dit ɗii gugiriɗ net məs dəlveŋge apprəmən vaska, wənnan atapetike, dəsənən an məs dəgəɗ azet masləŋɗe ɓa.

²⁵ Yaŋ ɗəf ade nah sit na, yaŋ ɗii məs kərmaŋ a daŋgay nek tahəŋ adəv gəla metiŋ naw zuliya, tahəŋ wərbanən wən sit ɗii adaka.

²⁶ Yaŋ daya net məgaŋ gəla metiŋ na zuli ambat adak dit ɗii nani vi kaw keti, akininik masləŋɗe neki, amma də gagayi ɓa, ageslne'eŋke vi ɗii adaskenin dit kuneŋge ɓa.

²⁷ Adan akiyən masləŋɗe, aziw gitinik abet məzu səɓaŋ sitin ɗiiyi. Yaŋ daya net məs dəlveŋge asgesiti.

²⁸ Apsit na: Mətakuməka, kədarbanən wən sit ɗii də iya na Zezu ɓa, amma mula kan va məs kədaɗɗaŋ, kərbanənək wənnəŋka, atrayək a Zerusalem pakə. Mokum aka wəki əmta na ɗəffəŋ akam sa?

²⁹ Piyer dit masləŋɗe azlansənənka: Nam ma Maŋgəlva mədapprəm ɓana, met ɗiiyi ɓa.

³⁰ Maŋgəlva net dəhiŋgiɗmə məs dəsil gən Zezu səkəti əmta, an məs kəbayaŋ də wəkpa'ən aka wəlaŋga məzliwrihe.

³¹ Maŋgəlva bo agakdakanəka, aɗiyək aka van dəzən dəsan gən daya, məzu koh git ɗiiyi, dərban gən wənna tubiya də wənna viyan mambray net ɗii na Israyel.

³² Mənam də Əmpəs Salala məs Maŋgəlva adapsit ɗii nan məs dətafaŋ, mənamtə mədaɗɗa saydawa na wənnəŋka.

³³ Adan məzu səɓaŋ apprəmən wənnəs vaska, gidivit adəka, aynanənək makret nawbay masləŋɗe.

³⁴ Amma ɗəf maɓɓan tay taka ambeti, Farisiyenni iya nan Gamaliyel. Məsən zəga na ma henziŋgi, ɗəf gakdaki azet ɗii pakə. Asilke, aziwik aweleŋgit ɗii məzu səɓaŋ. Anah sitik sozeɗ də gilgitin gən masləŋɗe.

³⁵ Yaŋ apsit məzu səɓaŋ sitin ɗii na: Munokum Israyelɗe, məzi zukum aza an məs kədaŋglaŋ wəɗɗaŋ sitin ɗiiyiŋki.

³⁶ Dabəŋ nani Tewdas dəde, amna ɗəfdayayi. Ɗii gap səkat poɗo dəsbanənni, amma məbayni, məzəsbanən bo atrayaŋka, wənnan agraka.

³⁷ Dərɓagani, Zudas ɗəf na Galile ade, pay ɗii adawvereŋ na dəlva. Nan bo asbanənka, amma adan məbayən, məzəsbanən atrayaŋka.

³⁸ Ndəni kan nədawnah sukum məzar səzet ɗiiyiŋki. Məppeti, an wənneti də wəza net pak səza ɗəf ade, asna wazə.

³⁹ Amma an səza Maŋgəlva ade, kəɓapənna wətak wəlet ɓa. Məzi zukum kədawgayaŋ də Maŋgəlva. Məzu səɓaŋ atafənək wənnani.

⁴⁰ Yaŋ aməsaŋ wəyenin masləŋɗe, avirninke, apsitin na kədawpeleŋ ɗaah də iya na Zezu ɓa. Yaŋ apetini.

⁴¹ Masləŋɗe agilyoŋguk suweleŋgit məzu səɓaŋ, ambataŋka, zit annekik diiɗa vi Maŋgəlva aɗiyik ka ɗii məs dəgapaŋ nawzəm saha vi iya na Zezu.

⁴² Pay pak tahəŋ wəpeleŋ wənna Maŋgəlva, tahəŋ wərbanən labara nenek na Zezu Messiya* adəv gəla metiŋ naw zuliya*, ko eŋgili.