Roma 4 - Nouveau Testament en Guidar

Wəsla Abraham də wətafa

¹ Mbari wənna dəhəm Abraham di?

² Maŋgəlva aɗi ka ɗəf təstəs na, vi wənna wəza nan sa? Ya an vaski na warah tive naw kaɓ aba Maŋgəlva. Amma dərah tive ɓa.

³ Gesiŋ ɗerewel anahək na: Abraham atafək Maŋgəlva, Maŋgəlva aŋɗanək ka ɗəf də goŋga vi wətaf nani.

⁴ Məgəɗ wəza pak aslək dərah gən əya nani, kaŋɗani va məpsən na mekeleŋ ɓa.

⁵ Amma aza Maŋgəlva tay vas ɓa. Amma ɗəf məs dəgəɗ wəza ɓa, apanək zən sən Maŋgəlva, asna Maŋgəlva waŋɗan sən ka wətafa waɗi ka ɗəf təstəs abani.

⁶ Ndəni Davit bo, anah pay məs apel wənna wəneken zə ɗəf məs Maŋgəlva aɗi ka ɗəf təstəs məza wəza ɓa. Amna:

⁷ Zit ɗii wasan neki an Maŋgəlva aviyanək mambray neti, an aɗamanək wəzlaɓ net pakə.

⁸ Zə ɗəf nan wasan neki an Ɗəfdaya dəŋɗan sən mambray nan ɓa.

⁹ Məskəl awreɗeŋ dədasoŋ mekret genegene kaaka sa? Ɗii məs dəsklaŋ awra ɓana net mekret asana genegene ndən ɓa sa? Nənahək dabəŋ na: Abraham atafək Maŋgəlva, aŋɗanək ka ɗəf təstəs abani.

¹⁰ Nadewɗe agəɗ vaskəs di? Daga dəɓəl əskəl awra ɓa sa, walla dərɓaga əskəl awra nani. Kay dərɓagani ɓa, dabəŋ ki əskəl awra agəɗə.

¹¹ Dərɓagani Abraham arah əskəl awra va gəla huwa ərbanna Maŋgəlva aɗiyək ka ɗəf təstəs abani vi ətaf nani, daga dəɓəl əskəl awra ɓa. Vaski Abraham asan ka affit ɗii məs dətafaŋ pakə, məs Maŋgəlva aɗi ke ɗii təstəs abani, ko an dəsklaŋ awra ɓa.

¹² Gesiŋ affit məskəl awreɗeyi. Amma məskəl awreɗe pakəŋ kirtin Abraham ɓa, say ɗii məs dəsbanən wətaf nan daga dəɓəl əskəl awra ɓa.

Va əpel na Maŋgəlva adaknah də wətafa

¹³ Maŋgəlva anah sənək Abraham na, sən əlfa nani adawrəh sən dələv pakə. Wən nan dəde azan vi asban ma henziŋ ɓa, amma vi asan təstəs aba Maŋgəlva vi wətaf nani.

¹⁴ An ɗəf arəhək zəgas pak vi asban ma henziŋ, asna wətaf atərna wəray əmpa ɓa, əpel na Maŋgəlva bo wakpaŋ zəga ɗarə.

¹⁵ Zəga tay ma henziŋ adaw ki sit ɗii ɓa, say wəda gədəv na Maŋgəlva kaaka'ə, Va dawka tay ɓa wəzlaɓ bo wasan ɓa.

¹⁶ Vini Maŋgəlva aziw gən əpel nan aka wətafa, vi dəsan gən ka əvəl nan na mekeleŋ. Əpel tay vaska akpaŋ na ɓa viyit kirtin Abraham pakə, viyit ɗii dərəhaŋ ma henziŋgi kaaka' ɓa, amma dit ɗii məs dəsbanən ətaf na Abraham pakə, Abraham akpaŋgək affəm pakə,

^17-18 va məver wənnani: Maŋgəlva amna nəɗikuk ka affit ɗii diiɗa, yaŋ Maŋgəlva anah sən əmpa bo: Ma əlfa nok wasan diiɗa va ngirzleɗ na disiŋ. Abraham atafək Maŋgəlva məs dədapsit zeŋgille sit ɗii mimtiti, waɗɗa zəga məs tay lahəŋ ɓa dəgəɗ gəni. Də əgani Abraham ataf Maŋgəlva, zəga tay ataf viyin. Vaski bo asan afit ɗii diiɗa.

¹⁹ Pay nani wəsva na Abraham tay va səkatə. Asənka aɓapna uwa kirin ɓa. Guluk nan Saratu bo təgalək sawɓa təɓap na wəɗi daway ɓa.

²⁰ Də as pak dəgəɗ kuzuŋ amakran aka wəpel na Maŋgəlva ɓa, amma yas dərəŋ adaw gakdakan də wətaf nan də sembe.

²¹ Atafək gesiŋ na, Maŋgəlva tay də sembe naɗɗa zəga məs anah vas pakə.

²² Apprəm kana, vini Maŋgəlva aŋɗan Abraham azan ka ɗəf təstəssə, vi wətaf nani.

²³ Wənnəŋ məvernəŋ na, vi Abraham mi kaaka ɓa, amma viyəm pak məverin.

²⁴ An mətafək Maŋgəlva, waŋɗam azan ka ɗii təstəssə, ndəni dəsil gən Ɗəfdaya nam Zezu Krestu səkəti əmta.

²⁵ Maŋgəlva apanək amtəka, vi mambray namə. Asil gənək səkəti əmta, ka məsam gən təstəs aba Maŋgəlva vini.