Matiye 24 - Nouveau Testament en Guidar

Zezu arbanək va adaɓzluwən gəla metiŋ naw zuliya*

¹ Yaŋ Zezu agil sədəv gəla metiŋ naw zuliya, ambatka. Gewleɗ nan azoŋko zani vi karban sən wənna gəla metiŋ na zuli va mərkani.

² Yaŋ Zezu apsit na: Munokum tatə ulenin zigeɗis pak sa? Gesiŋ nədawnah sukum: Va kədaw lanənəska, apəl na kuwən məzleɓin aka kuwən maɓɓan ɓa, məzu zeleŋ waɓzlunən pakə.

An dədazan dabəŋ ki wəgrak dəlva

³ Adan Zezu asan aka gərəm na hereme, gewleɗ nan azoŋko zani, ndəɗaŋ ketirgiti, assohonənka: Anah səm ɗa dewɗe zigeɗis adaɗɗaŋ di? Mi dədarban na pay naziya nok agapka də əgrak dələv di?

⁴ Zezu azlansitike: Məzi zukum, vi adaw zokuməni.

⁵ Vi ɗii diiɗa wazoŋ də iya nawa, wanahaŋ na: Əntə Messiya*. Wazetin ɗii diiɗa.

⁶ Akəpprəmənən halabereɗe nawgay go'o ko faraɗa, amma kədaw geslne'eŋ ɓa. Aslək dəgəɗ gən vaska, amma wəgrak dəlvi tagay ɓa.

⁷ Ɗii meɓɓet wagayaŋ dit ɗii meɓɓeti. Məlĩ maɓɓan wakayaŋ mama məlĩ maɓɓani. Maya, də wəɓla na dələv wagəɗ a təki temtemi.

⁸ Bonoyis pak wade va tattuwãh na uwa adazan azat ɗak dədaway.

⁹ Ɗii wakukumən avet ɗii meɓɓeti vi dəzəm gukumən gən saha, wabay kuməni. Ɗii pak wazel kuməni vi kədasbawəni.

¹⁰ Pay nani ɗii diiɗa wapanən wətaf neti, wazanən ziti, wazelenən ziti.

¹¹ Məs kleŋɗe məwaŋ wən warbanən zit diiɗa, wazetin ɗii diiɗa.

¹² Mambray waməs wəzzan diiɗa sawɓa, əŋgla net ɗii diiɗa wafeti.

¹³ Amma məs dəsok zən ha gap wəgrak nani, wakohu.

¹⁴ Halabara nenek na məlĩ na Maŋgəlva wapel a duniya pakə, vi dəgəɗ gən saydawa azet ɗiiyi, asna wəgrak nan wade kana.

Daryaw də mbrayen

¹⁵ Akulanən an məs adawnahaŋ na mbrayeni daryawi, an məs kleŋ Daniyel anahə, tay ziwe atəki an salala*. (Ɗəf an məs dəŋɗani, say dəpprəman lewlewi.)

¹⁶ Asna ɗiiyen naka dələv na Zude say dənzoŋ gən aket gərmeŋge.

¹⁷ Ɗəffan naka balakə adawpirken wəgəm zigeɗ nan siŋgil ɓa.

¹⁸ Ɗəf məs na guliyo adawmilyan eŋgil kaw gəm lukut nan ɓa.

¹⁹ Tuwãhi viyit gil dədawayɗe gəm məzuweɗ gitin pay nani.

²⁰ Məkaman Maŋgəlva vi pay nan adawsan pay na səmnya ɓa, walla də pay naffet* ɓa.

²¹ Vi pay nani wəzəm saha wasan diiɗa, vandən dəgəɗ ɗaah ɓa va duniya asani ha gap dəpaŋka, agəɗ na dərɓagan ɗaah əmpa ɓa bo.

²² Maŋgəlva aderenik wəŋɗa na pay nani, va vaski ɓa, ɗəf tay napla ɓa. Amma aderenik pay nani viyit ɗiiyen aweli.

²³ Pay nani, an ɗəf anah sukumək na: Messiya* tayaŋka, walla taya da, kəltafnən ɓa.

²⁴ Vi messiyaɗe məwaŋ wənna dit məs kleŋɗe məwaŋ wən wazoŋ, waɗɗaŋ sokeneɗ diiɗa vi kaw zet ɗiiyen na Maŋgəlva aweli, va waɓapəni.

²⁵ Nənah sukumək dabəŋg, məpprəm lewlewi.

²⁶ An anahaŋ sukumənək na: Krestu tayawra, kədadoŋ ɓa, walla anahəŋgək na: Tay haɗammaŋka, kəltafnən ɓa.

²⁷ Va buwən adawiɗ a disiŋ daga səmba pay nampum ha amba pay na moskoyo, vaski bo wəziya na Wətən Ɗəf* adawsani.

²⁸ Vi atəki mogugoy asani, adaki mogdokɗe adak kalaŋ.

Wəziya na Wətən Ɗəffa*

²⁹ Go'ləŋgə dərɓaga pay na bonoy naka, pay wasərətə, təla akasak na ɓa, ngərzleɗ na disiŋ wabətaŋ, sembeɗ na disiŋ pak waɓlaŋ.

³⁰ Aŋki məs dədarban wənani, Wətən Ɗəf wade aka slay buwən a disiŋ, də sembe diiɗa gəm də gakdak metiŋgini.

³¹ Kaffon gozloro metiŋgini, waslin maslayɗe nan amba tapaslay pay poɗo pak a duniya, vi kakelet ɗiiyen aweli.

Wən məkpaŋga də sukoyo

³² Məpprəman wənna sukoyo adarban sukum: An kiva sukoyo askəka, gaslamba nan bo andəfka, kəsəŋnənək bo mənzi go'oy.

³³ Vaski bo an kuleninik zigeɗis tayɗaŋ vaska, məsənna, go'oy aza wəzani.

³⁴ Gesiŋ nədawnah sukum: Ɗiiyen mederet kakaŋka amtaŋ na zam sa zigeɗis dəɗaŋ gən ɓa.

³⁵ Disiŋ də dəlva fuŋ pak wagrakaŋ, amma wəpel naw agrak na ɓa.

Maŋgəlva kaaka dəsən pay nagrak dəlva

³⁶ Ɗəf tay dəsən pay adazan ɓa walla wənziya na pay nan ɓa. Ko maslayɗe na disiŋ, ko Wətən, say Affən kaaka dəsəna.

³⁷ An va dəgəɗ pay na Nuwa, vaski adaɗɗa pay wəziya na Wətən Ɗəffa*.

³⁸ Daga iŋkile dəɓlaŋ wəzoŋ ɓa, ɗii tahəŋ wəzəmaŋ, tahəŋ wəsaŋ, tahəŋ wəleŋgeŋ, tahəŋ wəkayaŋ gili dəwəke kirtit amba zile, ha pay na Nuwa atoŋ adəv bəlay.

³⁹ Dəsənən ɓa, ha iŋkile azetinik pakə. Vaski adaɗɗa pay wəziya na Wətən Ɗəffa.

⁴⁰ Pay nani ɗii wasoŋ sula a guliyo, kaw gəmi taka, mbək taka.

⁴¹ Gil wasoŋ wəsər amazit sula, kaw gəmi taka mbək taka.

⁴² Vi vaski məga, vi kəsənən pay nazo na Daya nokum ɓa.

⁴³ Məpprəman lewlewi: Va affən gəla asənək payan məhala adazan na, aleŋ na ɓa, appan na mahala wətoŋ eŋgil annanda ɓa.

⁴⁴ Vi vaski məzaɓan zukum mogoni, vi Wətən Ɗəf wade payan məs kəɗumoŋ akan ɓa samə.

Məgəɗ wəza mogoni gəm məgəɗ wəza mbrayen

⁴⁵ Məgəɗ wəza awani mogonəŋ di, de maɗulanəŋ di? Ndəni məs daya nan apet sən məɗɗaŋ wəza nan meɓɓet avani, vi dipsitgin zəga nawzəm də pay nani.

⁴⁶ Zəzay aza gawla nan an daya nan adek wərəhən daɗɗan vaska.

⁴⁷ Gesiŋ nədawnah sukum: Daya nan wapan zəga pak ava məgəɗ wəzaŋka.

⁴⁸ Amma an məgəɗ wəZaŋ mbrayni, aɗumko: Kakaŋ na daya naw aliyək dazani,

⁴⁹ atəŋgək wəzəmgit saha net məɗɗaŋ wəza, tay zəma, tay saa mbazla də witem dəndən.

⁵⁰ Daya nan wade də pay an məs dəɗum akan ɓa də pay məs dəsən ɓa.

⁵¹ Daya nan wazəm gən saha an tattuwãh diiɗa, wapsən zəga an napsit muluvuluvuɗe. Nan wahəmə wampəran slayən sən bonoy.