Matiye 22 - Nouveau Testament en Guidar

Wən məkpaŋga də wəɓele

¹ Zezu apel sitik wən məkpaŋga maɓɓan əmpa, apsit na:

² Awla an va məlĩ na Maŋgəlva aslə dəndən: Məlĩ tay ɓel sən guluk sən wətəni.

³ Yaŋ aslin gewleɗ nan wədawye ɗii aka zəga nawzəm nawɓel naka, amma də ngəmaŋ wəzoŋ ɓa.

⁴ Yaŋ aslin gewleɗ meɓɓeti də wəɗi sit wənnan na: Mənah sit ɗii məyet na: Mətawi wəllet bəlateɗe dit məgetgeɗe məkərti zəga naw zəm pak mədani. Zəga pak məzaɓani.

⁵ Amma ɗii məyet dəslgaŋ sləma ɓa ambataŋgək wəɗɗanən anneti, ɗəf maɓɓani a guli nan mbatə ɗəf maɓɓan tamə wəman vani,

⁶ ɗii dembirgit armeninik gewleɗ na məlĩ neki azəm gitinik saha, abayninke.

⁷ Gədəv məlĩ adəka, aslinik sozeɗ nani kawbey ɗii neti məzlani walaŋ gəla neti.

⁸ Yaŋ apsit gewleɗ nan na: Mədani zəga nawzəm naw ɓel səkay, amma ɗiiyen məyet dərəhaŋ wəzoŋ ɓa.

⁹ An vaski na ɗəɗaah məbal aket tiveɗ pakə, məya ko naway kərəhaŋ pakə, dəzoŋ wəzəma.

¹⁰ Məɗɗaŋ wəza ambataŋka aket tiveɗi, ayeninik ko naway arəhaŋ ɗii məɗɗaŋ mambray dit məɗɗaŋ mogon pakə. Gəla aknahək dit ɗiiyi.

¹¹ Məlĩ atoŋko kawle ɗii məyeti. Awələk ɗəf aweleŋgit ɗiiyi, məs dəgul lukut naw ɓel ɓa.

¹² Amna: Baynawa mbari kətoŋ aŋ məza lukut naw ɓel ɓaŋ di? Dərah nawzlan sən ɓa.

¹³ Yaŋ məlĩ apsit gewleɗ nan na: Məɓɓruk tələn də van pak məsgan ara guzliyo, də həm gən də əmpəran slayən adaka.

¹⁴ Yaŋ Zezu aməs nah na: Ɗii məyet diiɗa amma məs məwelit tahəŋ diiɗa ɓa.

Wən nafaɗ garama

¹⁵ Farisiyenɗe* akalaŋka vi kaɗɗa kuket narma Zezu də wəpel nani.

¹⁶ Aslininik gewleɗ neti dit gewleɗ na Herodə aza Zezu, apsənən na: Məsən zəga, məsənka ɗəffan təstəs kənani, istat ərban tive na Maŋgəlva də goŋga kaw geslne sən wəpel net ɗii ɓa, vi nok kaslga sləma əwelet ɗii ɓa.

¹⁷ Mbar kədaɗum di anah səm ɗa: Ma henziŋ atakək əpsən zomorgol sən məlĩ na Roma sa walla də tak ɓa?

¹⁸ Zezu asənək wəɗum netiŋ mbraynəŋka, apsit na: Awlet kana, məluvuluvu nokuməŋka, vi mi kədaslənaŋ pêveŋ abaw di?

¹⁹ Mərban su suley an kəda faɗaŋ zomorgol dəndən vani. Arban sənənək suley na təbəsə.

²⁰ Yaŋ Zezu assoheti: Aŋ foto na naway də iya na zanəŋ məvernəŋ di?

²¹ Aɓɗaŋ na: Foto na məlĩ na Romayi. Zezu apsit na: Məmndagan sən an dəslə aza məlĩ na Roma, məpsən Maŋgəlva bo an dəslə səni.

²² Adan apprəmən wəzlan nan vaska, agətaŋka, yaŋ apanəni ambataŋgə.

Wəssoh aka wənna wəsilye net ɗii mintiti

²³ Pay nan Sadusiyenɗe azoŋko za Zezu. (Net tahəŋ wənahaŋ na wəsilya tay səka əmta ɓa.) Assohonənək Zezu:

²⁴ Məsən zəga, Moyis anahək na: An ɗəf amtək məza əppa kirin ɓa, say məlmən dəzəm gən gəla zat guluk nani dəɗi sən gən zev ɗəf nani.

²⁵ Yaŋ ɗii meɓɓet tahəŋ awalaŋgəm də məlma zit buhul. An dabəŋ akayək gulku amtəka duwaŋ kirin ɓa, mbagət guluk katərgəta.

²⁶ Ma sula'ən azəmək gəla zata, nan bo amtəka duwaŋ kirin ɓa, vaski də mo hoko'it pakə, ha ndəɗaŋ buhul pak azəmaŋgək gəla zata dəpaŋ kirin ɓa.

²⁷ Yaŋ dərɓeget pak guluk bo təmtəka.

²⁸ Ya kaŋ an vaski na pay wəsilya səka əmta na ga nawa təl sat səmbet kandi? Vi ndəɗaŋ buhul pak aɗitənka.

²⁹ Amma yaŋ Zezu azlan sit na: Munokum tatə Zaŋ sawɓa, vi kəsənən an məverin adəv ɗerewel ɓa də sembe na Maŋgəlva pak kəsənən ɓa.

³⁰ Pay wasilyo net ɗii mimtiti, akayaŋ na guluk ɓa, wakpaŋgaŋ va maslayɗe na Maŋgəlva a disiŋ.

³¹ Kəŋɗanən an məs Maŋgəlva apel aka wən nasilyo səka əmta ɓa sa? Amna:

³² Əntə Maŋgəlva na Abraham gəm Maŋgəlva na Isak, Maŋgəlva na Zakubu. Maŋgəlva net ɗii mimtiti ɓa, amma Maŋgəlva net ɗii medereti.

³³ Ɗii dəpprəmənən pak agətaŋgək aka wəpel nan sawɓa.

Ma henziŋ an dəday pakə

³⁴ Adan Farisiyenɗe* apprəmənən na Zezu adayək kiyit Sadusiyenɗe də wəpel nani, akkalaŋka.

³⁵ Ɗəf suweleŋgit taka, məsən zəga na ma henziŋ na Maŋgəlva aŋgəl karma Zezu də wəpel na mani, assohonəka:

³⁶ Məsən zəga ma henziŋ awani dəday kiyit pak di?

³⁷ Zezu azlan sənək na: Aŋglu Maŋgəlva Ɗəfdaya nok də makrok pakə, də zeŋgillok pakə, də wəmpəs nok pakə.

³⁸ Ndəni ma henziŋ an dəday kiyit pak də gakdak pakə.

³⁹ Ma sula'ən bo tay va ndəni. Aŋglu meggok va kəŋglu zuko.

⁴⁰ Ma henziŋ na Moyis də wəpel net məs kleŋɗe pak asapək adivit ma henziŋɗe suleski.

Messiya* gəm Davit

⁴¹ Zezu assohotik Farisiyenɗe* məs də kalaŋ adaka:

⁴² Mbar kədaɗumoŋ aka Messiya di? Wətən naway di? Apsənən na: Wətən Davitti*.

⁴³ Zezu apsit na: Ya an vaski na mbari Davit aya na Ɗəfdaya di? Əmpəs na Maŋgəlva arban sənəka vi vaski anah na:

⁴⁴ Ɗəfdaya anahsən Ɗəfdaya naw na: Asok aka va dəzəŋ nawa, nəvoŋgiti gən məzuzelkun amba tulko.

⁴⁵ Ya an Davit ayak na Ɗəfdaya səŋgay Krestu adak kpaŋ wətən di?

⁴⁶ Ɗəf tay dəzlan sən wən ko taka ɓa, daga siskiŋ ko naway makran wəzla dassoh wənna.