Matiye 12 - Nouveau Testament en Guidar

Zezu gəm pay naffete*

¹ Yaŋ pay mbərən, pay naffete, Zezu atoŋguk kla dəv guli na alkamari (zev hay neti). May tay da gewleɗ nani, vini anzlaŋ kiyən taka taka, ampərəni.

² Adan Farisiyenɗe* awlanən vaska, anahsənən Zezu na: Gewleɗ nok tahəŋ wəɗɗaŋ wəza an dəslə naɗɗa pay naffet ɓa.

³ Zezu azlansitike: Kəŋɗanən ɗaah ɓa sa an məs Davit agəɗə, ndəni dit ɗii nani may adaw detiŋ ɓa sa?

⁴ Atoŋgoŋguk adəv gəla na Maŋgəlva, azəmənək wayan məɗiyən vi Maŋgəlva, ko vi tahəŋ də tive nawzəmən ɓa say malumɗe kaaka ma henziŋ apsit tive nawzəmən.

⁵ Walla kəŋɗanən ɗaah adəv ɗerewel na ma henziŋ məs dəlveŋge tahəŋ wəɗɗaŋ wəza adəv gəla metiŋ naw zuliya* pay naffet ɓa sa? Daska tahəŋ wəpəl nən an ma henziŋ anahə, amma mbrayni ɓa.

⁶ Əntatə nah sukum: An dəday ki gəla metiŋ naw zuliya də gakdak tayaŋka.

⁷ An kəpprəmənək an məs wənəs andəkə: Ula saha nəŋgələ, wənna taw wəla zəga mamaya nəŋgəl ɓa, an vaski na kulenina va məɗɗaŋ mambray ɓa, dəɗɗaŋ mambray ɓa.

⁸ Vi Wətən Ɗəffi* affən pay naffete.

Ɗəf məs van məmtəni

⁹ Zezu asilik sədaka, ambatka, agulko adəv gəla nakkal net Yahudiyenɗe maɓɓani.

¹⁰ Ɗəf məs van məmtən taya dak. Ɗii nadəv gəla nan aŋgəlaŋ kawrəh Zezu də mambray vi adaɗɗa wəza an dəslə naɗɗa pay naffet* ɓa. Vi ni assohonən na: Ma henziŋ apanək tive na mbəl gən ɗəf pay naffet sa?

¹¹ Zezu azlan sit na: An ɗəf suwalaŋ kum, an tay də time taka kaaka'ə abətək avov pay naffet na kawgil gəni ɓa sa?

¹² Ɗəf kpak adayək ki time də sləma ɓasa, vi vaski lewi wəɗɗa wəza mogon pay naffete*.

¹³ Yaŋ Zezu anahsən ɗəf nak na: Appar voko. Apparək vani akpaŋgək va van maɓɓani.

¹⁴ Farisiyenɗe* agulyoŋko, akkalaŋka vi kaɗɗa kuket nawzan Zezu.

Gawla an məs Maŋgəlva aweli

¹⁵ Adan Zezu apprəm kuket net vini, asilik səkəti nani, ambatka, ɗii diiɗa asbanənka. Ambəlgitik məs gbəgbaɗe pakə.

¹⁶ Amma abayək meti, adasakaŋ aka wənnan ɓa.

¹⁷ Də wən aski an məs kleŋ Ezay anah də sangən gesiŋ amna:

¹⁸ Maŋgəlva amna: Aŋki gawla naw an məs nəweli, an məs nəŋgəl neneken zu dəndən. Wanəslən Əmpəs naw akani, wasaksən dələv pak wənna kita an təstəssə.

¹⁹ Agay na də ɗəf ɓa, aŋgəsl na vamvəl ɓa, ɗəf tay napprəm wəlan aket tiveɗ ɓa,

²⁰ agrakan na wəŋzlan ngav an mətəŋ wəŋzlan nəŋ ɓa. Amtan na pitirlak akən tədawɗəm tagay ɓa, ha say an aziw ginik kita an gesiŋ.

²¹ Dələv pak waɗumoŋ aka iya nani.

Va Zezu azlan sit məs kotorokɗe nani

²² Yaŋ akiyaŋ sənən daŋgar sən Zezu, goryomi pakə, vi tay də tuya. Zezu apetenke, apelke, awəlka.

²³ Agət sitik ɗii pakə, agətaŋka, anahaŋ na: Ɗəffəŋka, wətən Davitti* ɓa sa?

²⁴ Amma adan Farisiyenɗe* apprəmə nən vaska, anahaŋgək na: Ɗəffəŋka Belzebul məlĩ net tuyeŋɗe dəpsən sembe nawgil gən tuya.

²⁵ Amma Zezu asənək wəɗum neti, apsit na: Məlĩ pak an ɗii nan də slereŋ aweleŋgit ɓa, məlĩ nan warayə, walaŋ gəla awani di pakə, walla gəla awani di pakə, an ɗii nan dəslereŋ ɓa, aziw na ɓa kpakə.

²⁶ An Satan tayərɓəh tuya nani, an dəslereŋ dəndən zəknan ɓa, mbari məlĩ nan alziw di?

²⁷ Munokum tatə nahaŋ na də Belzebul nədawgil gən tuya. Ya an vaski na naway dədapsit sembe sit kirtukum nawgilgit tuyeŋɗe vet tam kandi? Kirtukum sən kiyit tahəŋ wərban sukumən na kəɗɗaŋgək mbrayen.

²⁸ Nawkpak də sembe na Əmpəs na Maŋgəlva nədawgil gən tuyeŋɗe, vi ndəni dərban na məlĩ na Maŋgəlva adek azokum.

²⁹ Ɗəf tay nawtoŋ eŋgil ana ɗəf gurom da, kaw hal ɓa, say dəɓɓruku gən dabəŋ, dəhal gən zigeɗ neŋgil annanda pakə.

³⁰ Ɗəf məs awsan də in ɓa, məzu zel nawi. Ɗəf məs də baah su wəkkal ɓa, watrayə.

³¹ Vi vaski nədawnah sukum: Ɗii warəhaŋ wəviyan mbrayen net pak də wəpel mbrayen pakə. Amma məs dəzelen Əmpəs Salala arah na wəviyan mbrayen nan ɓa sam.

³² Ko məs dəpel mbrayen aka Wətən Ɗəffa* warah wəviyan mbrayen nani, amma məs dəzelen Əmpəs Salala, arah na wəviyan mambray nan ɓa sam. Ko pay an kakaŋka, ko pay an dədazani.

Wəlaŋga də uwa nani

³³ An wəlaŋga mogoni uwa nan tam kawsan mogoni. An wəlaŋga nan mogoni ɓa uwa nan zlaŋ awsan mogon ɓa. Kawsəni wəlaŋga aza uwa nani.

³⁴ Munokum zemvit barwayɗe, mbar kədawɓapaŋ wəpeleŋ wənet zigeɗ mogeti yaŋ munokum zəknokum mbray kum di? Vi ma ɗəffa ana makra ɗəf nan adawpele.

³⁵ Ɗəf mogoni wagilgit zigeɗ moget səkəti wəzaɓet mogoni, ɗəf mbrayen wagilgit zigeɗ mbreyit səkəti naw zeɓet mbrayen.

³⁶ Əntatə nah sukum: Pay wəgrak dəlva, ɗii wazlanən aba kita aka wəpel ana met ɗarɗar apeleŋ pakə.

³⁷ Ɗərɓaga wəpel noki mətaw kita altaw kita akoko, an salala kənani walla məs mambray kənani.

Məsohoŋ sokene

³⁸ Ɗiiyen naweleŋgit Məsənaŋ zəga na ma henziŋ dit Farisiyenɗe* anahsənənək Zezu: Məsən zəga mamaka kəgəɗ səm gən sokeneɗi, vi məsəngən na Maŋgəlva də slənuk gesiŋ.

³⁹ Zezu azlansitike: Ɗiiyen kakaŋkiŋki, mbreyitiŋ, məluvuluvuɗeŋ aza Maŋgəlva. Tahəŋ wəssohoŋ sokene, amma arəhaŋ na ɓa, say sokene na məs kleŋ Zonas.

⁴⁰ Va Zonas agəɗ pay hoku dəfəɗ hoku adəv kəlfa, vaski Wətən Ɗəf* tam adaɗɗa, pay hoku dəfəɗ hoku adəv magamasə.

⁴¹ Pay wəgrak dəlva ɗii nawalaŋ gəla na Niniwe wasilyoŋ abet ɗiiyen dəpaŋka, kawtawən kita, vi ɗii na Niniwe atubiyaŋgək daga apprəmənən wəpel na Zonas. Yaŋ an dəday ki Zonas də gakdak tayaŋka.

⁴² Pay wəgrak dəlva məlĩyaŋ na dohoŋ watəsil abet ɗiiyen dəpaŋka ka wəliti, vi tədek sə faraɗa vi kapprəm wəpel na Salmoŋ də wəsən nani. Yaŋ an dəday ki Salmoŋ də gakdak tayaŋka.

Wamilyo na tuya

⁴³ An tuya agilik səka ɗəffa, wabbal awra wakay təki naffete, an dərah ɓa,

⁴⁴ asna wanah na: Wanəmil adəv gəla naw məs nəgil sədəvən naka. An amilik adəvən, warəh məfaɗəni, məzaɓani, amma ɗəf tay adəvən ɓa.

⁴⁵ Asna wambatə, waki tuyeŋɗe meɓɓet buhul, mbreyit dayki an madabəŋ, wasoŋ adəv gəla nani. Wəsuwa na ɗəf nan wasan tuwãh dayki an dabəŋ. Vaski alsan sit ɗiiyen mambrayɗe dəpaŋka.

Milmiŋgiɗin Zezu dət mani

⁴⁶ Pay Zezu adawpel tagay, may man dit milmiŋgiɗin azoŋko, aziweŋke appaka, metaka pel dəndən.

⁴⁷ Ɗəf maɓɓan apsən Zezu na: Mok dit milmiŋgiɗuk yeŋ ziwziw appaka, metaka pel di'isi.

⁴⁸ Zezu apsən na: Nawattə əmma di? Mədəŋgaŋ milmiŋgiɗu di?

⁴⁹ Yaŋ Zezu arbet gewleɗ nan də vani, amna: Eŋkiŋ may əmma dit milmiŋgiɗwa.

⁵⁰ Vi ɗəffan dəgəɗ əŋgla na Affu an na disiŋ, ndəni məlmu mizilin gəm məguluŋguta gəm əmma.