Matiye 1 - Nouveau Testament en Guidar

Dəhəŋgiɗ Zezu

¹ Ma əlfa na Zezu Krestu, wətən Davitti*, wətən Abraham:

² Abraham duwa Isak, Isak duwa Zakubu, Zakub duwa Zuda dit milmiŋgiɗni,

³ Zuda duwa Fares də Zara, dət Tamar, Fares duwa Esrom, Esrom duwa Aram,

⁴ Aram duwa Aminadabu, Aminadabu duwa Nason, Nason duwa Salmoŋ,

⁵ Salmoŋ duwa Bo'ez, dət Rahab, Bo'ez duwa Obed, dət Rutu, Obed duwa Zesse,

⁶ Zesse duwa məlĩ Davitti. Davit duwa Salmoŋ, dət guluk na Uriya,

⁷ Salmoŋ duwa Robo'am, Robo'am duwa Abiya, Abiya duwa Asa,

⁸ Asa duwa Zozafa, Zozafa duwa Zoram, Zoram duwa Oziya,

⁹ Oziya duwa Zowatam, Zowatam duwa Akaz, Akaz duwa Ezekiyas,

¹⁰ Ezekiyas duwa Manasse, Manasse duwa Amos, Amos duwa Zosiya,

¹¹ Zosiya duwa Zekoniyas dit milmiŋgiɗni, gala məke Israyel a Babilon.

¹² Səza məke Israyel a Babilon, Zekoniyas duwa Salatiyel, Salatiyel duwa Zorobabel,

¹³ Zorobabel duwa Abiyu, Abiyu duwa Eliyakim, Eliyakim duwa Azor,

¹⁴ Azor duwa Sadok, Sadok duwa Akim, Akim duwa Eliyu,

¹⁵ Eliyu duwa Eliyazar, Eliyazar duwa Matan, Matan duwa Zakubu,

¹⁶ Zakub duwa Zozef zilit Mari, məs tuwa Zezu, məs adawyaŋ na Messiya*.

¹⁷ Sap gən ma əlfa na, səza Abraham ha gap Davitti, ma əlfa klaw kin poɗo, səza məke Israyelɗe a Babilon ma əlfa klaw kin poɗo, səza məke Israyelɗe a Babilon ha Messiya, ma əlfa klaw kin poɗo.

Uwa na Zezu Krestu

¹⁸ Vaŋki uwa na Zezu Krestu agəɗə. Mari, mani, Zozef məzu dahta, gala təɓəl əsap də Zozef ɓa, təɗiyək daway də Əmpəs Salala.

¹⁹ Zozef zilta ɗəf mogoni, tay wəsban Maŋgəlva dəŋgəl əgil gən wənnat appaka ɓa, aɗumonək kapat məhaɗama.

²⁰ Adan adaɗum vaska, maslay na Ɗəfdaya adek əsine akani, anah sənək na, Zozef wətən Davit* kəgeslne dawgəmət Mari, ɗak nok ɓa, vi an dəsəɗ adəvta də gakdak na Əmpəs Salalayi,

²¹ watə wə wina, wakəlvan na Zezu. Vi wakohgit ɗii nan səka mbrayen neti.

²² Amma aspak agəɗə, vi kaɗɗa an Ɗəfdaya annah də ma məs kleŋ na:

²³ Waŋ mgbuɓɓo watəɗi daway watə wə wina, kawyani na Immanuyel, va wənah na: Maŋgəlva tay də mənamə.

²⁴ Gala afɗah səket sini, Zozef aɗɗak va maslay anah səni, agəmtək gon ananda,

²⁵ məza wəvoŋ dəndət ɓa, ha ndət bok wina Zozef alvanək na Zezu.