Luka 3 - Nouveau Testament en Guidar

Va Zaŋ məgəɗ baptem adarban wənna

¹ Yaŋ Tiberiyus, məlĩ na Roma, azəmək məlĩ wəsva klaw kiyən sle, Pontiyu Pilatuyi governer aka dələv na Zude, Herodə tamə ndəni məlĩ na Galile, məlmən an Filipi tamə ndəni dədawzəm məlĩ aka dələv na Ituriya gəm dələv na Tarakonitis, Lizaniya tamə ndəni dədawzəm məlĩ aka dələv na Abilene.

² Annas də Kayafas tamə ndəɗaŋgəŋ ɗii gugiriɗ net məs dəlveŋge na Maŋgəlva. Pay dəpaska wəpel na Maŋgəlva adek aza Zaŋ wətən Zakari awra.

³ Abalək aka dələv na maŋgava məlpa na Zordan pakə, amna: Mətubiyə, mətaf baptem Maŋgəlva waviyan sukum mbreyit nokum.

⁴ Agəɗək va məs kleŋ Ezay aver adəv kleŋ nani: Ɗəf tay wənzla vamvəl awra: Məzaɓan tive vi Ɗəfdaya, məɗɗa sən tive dəsoŋgən sarara.

⁵ Təki an kətikətik pak dəsan gən daka daka, ki gərəm də mosorgo pak kaw ziw gəni, tiveɗ məherɗeke pak wakpaŋ slerɗeki.

⁶ Ɗii pak wawlanən va Maŋgəlva adawkoh gəmə.

⁷ Ɗii diiɗa azoŋguk aza Zaŋ vi dəɗɗa sit gən baptem. Apsit na: Kirtit barwayɗe nawa dənah sukum na wakukohoŋ səma wəda gədəv na Maŋgəlva an dədazan di?

⁸ Məgəɗ wəza an narban na kətubiyaŋka, kəpplanənək wəza nokum məsvani, kədaɗumoŋ amokrokum də wənnəh na: Dəhiŋgiɗin Abraham mənani ɓa. Naw əntatənah sukum, Maŋgəlva tay də sembe na kpeŋget kuneŋge dəkpaŋgaŋgən kirtin Abraham.

⁹ Məzaɓani zlimbe kaw bəl wəlaŋga daga səza gbumgburən, wəlaŋga məs awa mogon ɓa pak kaw bəlni, kaw sapni aka offo.

¹⁰ Ɗii assohonənka: Awani dəslə azam naɗɗa kandi?

¹¹ Apsit na: Ɗəffan də lukutɗe sula say duɗakan də ɗəffan məs nan tay ɓa. Ɗəffan də zəga nawzəm tamə, say dəɗɗa vaska'a.

¹² Duwanɗe bo azoŋguk aza Zaŋ vi kawrəh baptem, assohonənka: Məsən zəga, ya nam mi an dəslə azam naɗɗa kandi?

¹³ Azlan sitik na: Kədawtafaŋ zəga səvet ɗii dayki an məɗi sukum wənnan nawtafən ɓa.

¹⁴ Sozeɗ bo azoŋko, assohonənək vaska, aɓɗaŋ na: Nam tam awani dəslə azam naɗɗa di? Azlan sitik na: Kədawtafaŋ arya net ɗii də gagay ɓa walla də saydawa na teperke ɓa, amma məga iya nokum.

¹⁵ Ɗii tahəŋ wəganən də mekreti ko naway pak tay ɗum na: Kuzuŋ Zaŋ ngi Messiya*.

¹⁶ Yaŋ Zaŋ anah sit enet pak na: Naw əntatə gəɗ sukum baptem dit iŋkile, amma ɗəf məs dəday kiyu də sembe wade. Ko nawpel slapat net hensek nani nəgap ɓa. Wagəɗ sukum baptem də Əmpəs Salala gəm də offo na kita.

¹⁷ Tay də tekpesle naw seŋger hay nan avani, vi kaw ɗakan hay dit keselme. Wakkalan hay a maha annanda, amma wazle keselme də offo an məza amta ɓa.

¹⁸ Də wəpel wən temtem diiɗa sit ɗii vaska, ndəni Zaŋ arah wəpel sit labara neneke.

¹⁹ Zaŋ ahayanək Herodə vi agəmət guluk na məlməni, agəɗək mambray maɓɓan temtem diiɗa.

²⁰ Yaŋ Herodə agəɗ zəga mbrayen an dəray diiɗa əmpa, asganək Zaŋ a daŋgay.

Zezu atafək baptem

²¹ Yaŋ dərɓaga ɗii pak arəhaŋ baptem, yaŋ Zezu tam arah baptem. Adan adawzuliya, disiŋ akolko,

²² Əmpəs na Maŋgəlva aprikik akan də gəba zən va mukuɗuŋgulo. Wəpel adek sə disiŋ, amna: Əstə Wətu an na makrawa, əntatə neken zu di'is sawɓa.

Mazlalwa na Zezu

²³ Zezu agəɗək wəsva kaklaw hoku yaŋ atəŋ wəza nani. Va ɗii ada ɗumoŋ, wətən Zozeffi, Zozef tamə wətən Heliyi,

²⁴ Heli wətən Mattat, Mattat wətən Lewi, Lewi wətən Melki, Melki wətən Zannay, Zannay wətən Zozef,

²⁵ wətən Mattatiyas, wətən Amos, wətən Nahum, wətən Esli, wətən Naggay,

²⁶ wətən Maata, wətən Maatatiya, wətən Semeyn, wətən Zozek, wətən Zoda,

²⁷ wətən Zowanan, wətən Resa, wətən Zorobabel, wətən Salatiyel, wətən Neri

²⁸ wətən Melki, wətən Addi, wətən Kosam, wətən Elmadam, wətən Eri,

²⁹ wətən Zezu, wətən Eliyezer, wətən Zorim, wətən Mattat, wətən Lewi,

³⁰ wətən Simoŋ, wətən Zuda, wətən Zozef, wətən Zonam, wətən Eliyakim,

³¹ wətən Meleya, wətən Menna, wətən Mattata, wətən Natan, wətən Davit,

³² wətən Zeze, wətən Obet, wətən Bo'ez, wətən Sala, wətən Nasoŋ,

³³ wətən Aminabut, wətən Admin, wətən Arni, wətən Hesrom, wətən Fare, wətən Zuda,

³⁴ wətən Zakub, wətən Isak, wətən Abraham, wətən Tara, wətən Nakor,

³⁵ wətən Saruku, wətən Ragaw, wətən Falek, wətən Eber, wətən Sala,

³⁶ wətən Kaynam, wətən Afarasada, wətən Sem, wətən Nuwa, wətən Lamek,

³⁷ wətən Matusala, wətən Enok, wətən Zarat, wətən Malelel, wətən Kaynam,

³⁸ wətən Enos, wətən Setu, wətən Adam, wətən Maŋgəlva.