Hənhən 10 - Nouveau Testament en Guidar

Maslay dət ɗerewelək muzliyəkə

¹ Yaŋ nula maslay maɓɓan dapriken sə disiŋ də sembe. Məzəɗ slay buwən akani, də məzəɗa akani, haran bo va paya, tələn bo va anzil offo.

² Ɗerewelək muzliyək məkolət tat avani, yaŋ azlak tələn dəzəŋ aka pe'e, tələn zlaɓay bo zlak aka dəlva.

³ Yaŋ aŋgəsl vamvəl dayadaya, va ɓolu dawbay gagay. Ɗərɓaga wənzla vamvəl nani, wəhay na buwən buhul azlansənənək də ɓaɓəlma diiɗa.

⁴ Adan wəhay na buwən buhul agrak wəpel nani, nəzaɓanək zu kawverin, yaŋ nəpprəm wəla ɗəf sə disiŋ dawnah su na: Arma wənna wəhay na buwən buhuliŋki kədaverin ɓa.

⁵ Maslay məs nuwəl tələn zlaŋgaytaka aka pe'e də aka dəlva fuŋ naka, aslanək van dəzəŋ a disiŋ,

⁶ yaŋ a suway də iya na Maŋgəlva məs madaran ha faɗə, məs dəzəməɗ kəti a disiŋ də zəga na dəvən pakə, dəzəməɗ dəlva fuŋ də zəga na dəvən pakə, məs dəzəməɗ pe'e də zəga na dəvən pakə. Maslay nak amna: An dəŋgəl əɗɗa laŋka, wagəɗ kakaŋka.

⁷ Daga pay sən maslay ma buhulet adatəŋ wəffon gozloro, Maŋgəlva wagrak wən məɗama nan dəpaska, va anah sit məɗɗaŋ wəza nan məs kleŋɗe.

⁸ Yaŋ wəla ɗəf məs nəpprəm dəde sə disiŋ nak apel suwək əmpa apsu na: Dokə tafət ɗerewelək mukolət muzliyak kədak səva maslay məs dəziw a pe'e də aka dəlva fuŋ ndaka.

⁹ Yaŋ nəmbat kla maŋgava maslay naka, yaŋ nəssohon dəpsutə gən ɗerewelək muzliyak nakə. Yaŋ apsu na, agəmta azəmta, watəsat trah adəvko, amma aza mok na watəsat gənɗət va amama.

¹⁰ Nəgəmtək ɗerewelək muzliyak nak səvani, nəzəmtəka, gənɗəttə amawa, amma adan nəsɗəkta, təkpaŋgək trah adəvwa.

¹¹ Yaŋ mənah su kana, say dewle kəl gən wərban wənna Maŋgəlva əmpa'a sit ɗii aka dələv pakə, sit ɗii ma əlfa temtemi dit milyeŋge.