Yunus 4 - Gúloku Díino

Fo Yunus añuumulne, Díino ayik bankabaŋo

¹ Anabila Yunus, mungu, bafégi ni Díino abonkerne jamanku Niniwa, ahóoja dáde.

² Ayéj UMUYHINTOR: - Ah! UMUYHUM! Eke hómár gibenuhne f'eroŋne bim a bukokum? Me ípápájul mara nim gukankánehne. Gúmár akanne me ígir ídekeh ba a bukoku Taasis. Agida me ípápájul n'úmiirne. Afeereemfeer mara fi Díin n'abonkerumeh, n'ayik bankabaŋo dáde. Kasáro buñuumul. Bupokunkon afufuuh dáde. Gutengay jamaŋo, ukaskas bubayunku gúfeguno g'údekeherne ba gúfeginkininer. Nim gúmiirne. Inini, ífefeg mara ba bubonkerhinin gúdekehne. Me na súumurum.

³ Inini, UMUYHUM, bujoom. Biniiroŋo akohumeemne kanjébo.

⁴ Yunus balóbi nim, UMUYHINTOR aŋoyindem ayéjem: - Inini, fi n'uñuumulohne inini, hóge a marigen gugune?

⁵ Balóbi nim Yunus akeng afúr a bukooro akok bi bísibaŋo afúruntohne. Badékiidek awonn k'ajóonin bákáso k'agog na. Banoohi na k'agoga aningeh bukooro, n'asíiba búpájulo h'adékehne buyiko a bukooro.

⁶ Angu, f'anoone na, UMUYHINTOR awalun sino maŋ na k'agoogenem, nim dayoh dáde. Yunus, bafégi sinoŋo asúumom dáde.

⁷ Kanda gucunkunom harennaamo, Díino abúuñor faka apus. Angu, apuso adék akáb sinoŋo nip f'adék alaaf.

⁸ Angu bísibaŋo barenni, Díino abúuñor bawuc b'adúhun, b'afúrumor bi bísibaŋo afúruntohne. Bísibaŋo acukunkom ingi sembe k'agíf maf arino agír. Afaŋunum n'ayoh angu. Añuumul ingi UMUYHINTOR fanfaŋ. Angu, aŋoolin akiina Díino ayéjem: - Bújoom! Me, biniiroŋo akohumeemne kanjébo!

⁹ Díino aŋoyindem ayéjem: - Yunus! Fi n'uñuumulohne ineeŋ a nintiku ni sinoŋo aniirone, hóge a marigen gugune? Yunus aŋoyindem ayéj: - Oo! Abábár iñuumul. Nanka k'egune, biniiroŋo akohumeemne kanjébo.

¹⁰ Angu, UMUYHINTOR ayéjem: - Inini, fi f'ummo na n'uwoseneh a gubaarhu sinoŋo bareŋ. Agida hantaŋ akanne ki sinoŋo awal? Ingah! Fi rufundo sinoŋo! Me irufunne. Fi muyuro. Bacumbi miñireŋ aniiro. Buruhu bísiba ímbenduk bareŋ gawalne. Te na bareŋ gukokurne jamméejhen.

¹¹ Kanda, bukooro boŋon, Niniwa, m'úyejne ikoomun, wosendo a gubaarhu immereŋ! Ingah! Jamaŋo m'angune na anrumunrumun deh! Ninginkint na! Meŋen nip biyabárenkum. Ingah! Jaraaho j'angune na pirendeŋeŋ anficálahin hójooninno ingi hójondoŋo. Immereŋ ambábár agofoŋ wuuliyeŋ keme ingi buruhur. Abónonkánin mees anlabalaba fanfaŋ. Síibaari bukoomunkánin. Te f'umoŋe n'uñuumuloh a gubaarhu n'ibujne sinoŋo k'úyejeh ibuj jamanku Niniwa nip, biki iyik bankabaŋo imbi immereŋ? Horaŋ akanne? Nim Díino alóbne ingi Yunus. Na líibáro inno amukne.