Yunus 2 - Gúloku Díino

Ho Yunus alóbne UMUYHINTOR f'agune a búyeku dakato

¹ Angu, Yunus baworaa a fankaaso UMUYHINTOR abúuñ dakat dadeh k'adómom. Dakato badómem aguy na a búyeku dakato buruhu ásibaŋ alallaŋ, jaket báárig.

² Angu Yunus alób ingi UMUYHINTOR, Díino Amánduko n'aramunahne maŋ na a búyeku dakato, ayéj:

³ - UMUYHUM. Me, a waato n'eyohne dáde, ikiinahenkiina dáde. Bikiinahen, uwaalaraam k'unahaam h'ekiinahenne. Oo! UMUYHUM! F'edasne bukenum ikiinahenkiina k'upahánaam. Bikiinahen uyennehindeem, k'unahaam. Abocin ayéj UMUYHINTOR:

⁴ - Bikaanerenku fi akanne anworeem a fankaaso k'ilim na baman a réeŋununku fankaaso. Úbuuñribuuñ gumbaŋo k'adoorumbinkum, adékukum f'adék alimuneem.

⁵ Ilahlah karo útibareemtibar. Nim gilaherne. Kanda n'upahuneemne a baaruŋo, afeereem mara ifak ífekineh Jaamehen Adénno n'arennáne.

⁶ Agida n'ilim, iruuhoh baaruŋo, f'akaan ininkaman ba bubujhum gadékehne. Jakoboloraŋo agoolombinkum a bigofo.

⁷ Yunus abocin ayéj UMUYHINTOR: - Me, ilim a baaruŋo f'édek íput a kánkirunku montaaño. Akaanaam ininkaman iŋanŋan a kantíg k'ópájul gankimbenekimben gúmángááro k'anrahun, k'anlaho maŋ na baman dagurumaareŋ. Nim gilaherne. Kanda fi UMUYHUM, Díino n'efuuhurinehne, úfunnureemfunn a dasuno d'eguyerne k'uyoofunoom uŋoyineem a kanjébo.

⁸ F'ewosenne mara biniiro bareŋ afallaheemne, fam giŋoolinne a binankan, k'iŋay gukiinahan, fi UMUYHUM. Bikiinahen mees, gukiinaŋo g'ekiinahenne aŋaf baman maŋ na a raafo a Jaamehen Adénno n'arennáne.

⁹ Abocin afak ayéj UMUYHINTOR: - Hafaaso nafaaraŋ wúur. Angu, m'anfuuhurinehne hafaaso danfég kabonkerihen.

¹⁰ Me mungu, a gubaarhu hójooninno h'okandeemne ba búfunndukon leeyaŋo gídekehne. Iramunkuno a gubaarhu h'okandeemne mees. H'éjikirindenne mungu ídek ikankáneh. UMUYHUM, nim gikankánehne, mara fi bareŋ upirenne upahun jamaŋo.

¹¹ Nim Yunus alóbne ingi Díino a búyeku dakato. Balóbi nim UMUYHINTOR ayéj dakato: - Inini, lotorem a gúmeero! Dakato anik akaan maŋ nim k’alotom a gúmeero.