Yunus 1 - Gúloku Díino

Fo Umuyhintor abúuñne Yunus k'afoy hadéko b'abúuñemne

^1-2 Ba balób gídekehne a gubaarhu údiigeen údin Israyel m'aretuh Yunus, úbáku Amitay. Ayikyik bísiba bi UMUYHINTOR abúuñ Yunus ayéjem: - Kenger k'údek ba a bukooro búdenno b'aretuhne Niniwa. Gúputi na utengaheeniŋ a hójondoŋo h'ankaanahne. Ífefeg mara immereŋ anlápurlápur fanfaŋ. Nim UMUYHINTOR alóbne Yunus.

³ Kanda Yunus, bayennehini hómár, aŋay hágirhu UMUYHINTOR k'akok bi bukooro b'aretuhne Taasis, k'afoy hadéko Niniwa bi UMUYHINTOR abúuñemne. Angu baŋay hadéko bi Taasis, apút a saariŋo n'aretuhne Jopa. Bapúti Jopa alahun na batoŋ n’adékeh ba Taasis. Angu acaam biyeŋo k’antuŋul hadéko ingi ñandóolhu batoŋo. Nim Yunus arífne hágirhu UMUYHINTOR.

⁴ Angu, bantuŋuli hadéko UMUYHINTOR akucunor búkido, búkid b'ayik sembe fanfaŋ. Búkido amalah dáde k'aŋay bubichu batoŋo.

⁵ Angu ñandóolhu batoŋo andewun dáde. Moŋon moŋon aŋay gukiinahu gufaashánam ki nim, gúduko, apahánam. Kanda mukuroŋoŋ na. Ankomb faka butaahihu bayaaho andabunah a fankaaso ki nim batoŋo ayeh, biki alim. A waato nómár Yunus ummo na sínduufo a bájegenenku batoŋo. Adúufduuf fo ahuunin.

⁶ Angu, ulaameku batoŋo adék alahunam na. Ayéjem: - Fi horaŋ? Sínduuf?! Kenger! Kenger! Kengeri k'ukiina gufaashan! Gúduko ayikhineh bankabaŋ a binentor k'impirenoŋ impahoŋ.

⁷ Angu ñandóolhu batoŋo anyéj: - Inini, mintor, indoohoonuŋ jalihano k’inkaanoonuŋ kajuubero ki nim ímpájuloŋ wúuro m'adootne mintor baléero imba. Angu banjuuberi ingi jalihankánin ampájul mara a gubaarhu Yunus.

⁸ Ammiihmiihinem: - Angu fi nuko, eke fi udootne mintor baléero imba? Horaŋ gukanne k'udootor mintor búkido? Téekint mint! F'ugune hantaŋ? Téekint mint dohohon! Nómár agune nooraŋ? Beeraŋ gúfuruntne? Fi údin beeraŋ? Fi ummu siy nooraŋ? Téekint mint!

⁹ Ayéjeeniŋ: - Me, ii, údin didiirahu Israyel. Me Díino no arjanna gifuuhurinehne, n'ayabne fankaaso ingi réeŋo, m'ayéjuhne UMUYHINTOR.

¹⁰ Angu abocin atéekineeniŋ mara UMUYHINTOR abúuñemne, kanda afoyfoy. Atéekineeniŋ mara síibaaraŋ hadék b'abúuñemne k'aŋay hágirhu UMUYHINTOR. Angu balóbi nim ñammi batoŋo andéwun dáde k'anyéjem: - Inini, fi, horaŋ akanne k'ukaan hómár?

¹¹ Kanda gumbaŋo inno maŋ na n'afaŋunum n'ayindinah. Angu ñammi batoŋo anfak ammiihem, anyéjem: - Inini mint neeraŋ giñantaminne ikaanomiŋ ki fankaaso abénn guyindinaŋo?

¹² Yunus ayéjeeniŋ: - Inini, lahamuŋ k’uworomuŋ a fankaaso! Aji ukaaneŋ nim, anoohukuneh túum k’abénn guyindinaŋo g’aŋane. Ingah! Afeereemfeer mara h'ekanne akanne ki bawuco amalah ineeŋ.

¹³ Angu Yunus balóbi nim, immereŋ anfant anduulumbin k’anlah batoŋo anyéj: - Inini inyeenoŋ dáde. Gúduko ímputhunoŋ gulibilino gu beŋen. Angu bankaaniikaan dékereŋ mara gumbaŋo afaŋunfaŋun n'abénkin, k'aŋoyineeniŋ maŋ na.

¹⁴ Angu ankúbul jamméejenkinin k’ankokur imbi Díino k'antoŋ gukiinahu UMUYHINTOR ingi sembe anyéjem: - UMUYHINT! Ummu inini, aji iworemmiŋ a fankaaso buku úduk ulahur mint honj. Bonkerer, dahu úneer kayúulen mint a gubaarhu biniirohánom. Ummu kandudaŋ mint honj. Fi UMUYHINT, fi ukanne ki gumbaŋo ayindina. Ummu gireŋ. Fi úpápájul h'akanne udootor minti baléero imba. Angu bonkerer, dahu uyehen mint!

¹⁵ Angu banlóbi nim anlah Yunus k'anworom a fankaaso. Banworem a fankaaso, bawuco ingi gumbaŋo abénn, batoŋo anoohun.

¹⁶ Angu ñandóolhu batoŋo, banfégi hómár andewun dáde UMUYHINTOR k'ambúuñaham leeya, ankúbul jamméejenkinin imbi ámár Díino, anjíkirindem dáde.