Injilo No Saŋ 8 - Gúloku Díino

Udikaamo m’ammumbne n’aŋay kunnungaŋo

¹ Afúrumi na, Yensa adék ba a Montaaño Olifo.

² Gucunkánom táptápáro aŋoolin ba a Jaameŋo Adénno. Angu jamaŋo andékeh ba bulahunkánam. Angu maŋ nim gankanne f'andek anrumun na tip. Yensa úmár mungu anooh maŋ na k'aŋay bukawandinkinin.

³ Angu f’aŋane kawando ñanfarasiyaŋo ingi ñankeekihu Hañaañeno ampútor. Agida immereŋ n'andoohor udikaam úduk m’amumbaa n’aŋay basango. Angu bampútri, anwonnálin udikaamo a jannoho

⁴ k'anyéj: - Arafaŋ, udikaamo ummu amumbaamumb n’aŋay basang.

⁵ Eke Luwahu Musa ayéjyej, udikaamo m’akanne basango, agihaa bawaalo f’adék aniiro. Angu inini, fi neeraŋ gúyejne? Karo ibujommiŋ, karo neeraŋ?

⁶ Agida, na ansíibáásiib buninkuku Yensa kábo ki nim ampiren k’andékirem a binaal. Angu Yensa mungu ajokun k’aŋay guñaaño a réeŋo.

⁷ Kanda jamaŋo ammincineh na k’annotohom ki k'alób. Bamiñilay Yensa ayoofa aŋoyindeeniŋ k’ayéjeeniŋ: - Inini ninkinan, moŋon moŋon m’afeerem maro yikireŋ jínub, anohum apad udikaamo buwaalo.

⁸ Angu Yensa ajokun aŋoolin abocin guñaaño a réeŋo.

⁹ Jamaŋo banyennehini ni Yensa alóbne ankeng úmánduk úmánduk k'ambicay. Ñanlaamero annohumne andék ba kireŋ índukoŋo k'ambicay immereŋ nip f'adék afalla na udikaamo ingi Yensa bareŋ.

¹⁰ Angu Yensa ayoofunaa k’aning, fégireŋ na wúur. Ayéj udikaamo: - Angu immeraŋ? Yikireŋ m'ayéj uñantay ubujaa?

¹¹ Udikaamo ayéjem: - Wówo! Yikireŋ m'ayéj nim. Yensa ayéjem: - Me mees díyejo uñantay ubujaa. Inini déker, kanda dahu úduk ubocinahar bukanku hójondoŋo.]

Jiyanku duniyaŋo inno, jímár ingine Yensa

¹² Ayikyik bísiba bi Yensa akawandah ayéjeh: - Me ingine jiyaaŋo j'awúnnurohne k'ampiren anfég hóbun a duniyaŋo inno. Wúuro m'atifeemne daguyahar a bumurul. Aguyhuneh a jiyaaŋo j'adékikinemne ba a kanjébo ka bandór.

¹³ Angu balóbi nim, ñanfarasiyaŋo anyéjem: - Heh! Fi, gúseediyahu bigokon guŋane! Angu mint dijahmiŋ h'ólobne. Dipirenmiŋ k'ijahmiŋ balóku m'aséediyane bigokunom. H'oŋane gúseediyahu bigokon yikireŋ nafa.

¹⁴ Yensa aŋoyindeeniŋ ayéjeeniŋ: - Haani íseediya bigokum, h'élobne marigen maro ípápájul b'ífuruntne ingi b'ídekehne. Agida ninkinan pájiiroŋ b'ífuruntne ingi b'ídekehne.

¹⁵ Ninkinan, guŋayeŋ bulekhu balóbo guru uninginkinkeŋ ho Díino alóbne a ninlekorumo. Ninkinan ufant ulekeŋ maŋ ni jamaŋo anlekehne balóbo baŋ. Me ŋayri búneku haani úmánduk kayúulenkinem.

¹⁶ Kanda ninlekorunkum balóbo, a binaal gininkne. Fégeŋ baŋ, me úmánduk gireŋ. Bááhum m'abúuñureemne gaséediyahumseediya.

¹⁷ Eke aññañaañ a luwaŋankánan maro aji ñanraagof inak anséediyahen, afeero maro séedo nómár ayikhineh nafa? Eke luwaŋo nim gayéjne?

¹⁸ Inini, me, ñanraagofo inak angune na m’anséediyaheemne. Me moo k'ílob gunaam gu bigokum. Bááhum m'abúuñureemne mees, ummo na gúseediyahum.

¹⁹ Yensa balóbi nim aŋŋoyindem anyéjem: - Angu inini bááhán umoraŋ? Aŋoyindeeniŋ ayéjeeniŋ: - Ninkinan nuko! Aji úpájulemuŋpájuler, ugumb úpájiheŋer Bááhum mees. Kanda ninkinan pájiirumuŋ, angu gúmár akanne pájiiroŋ Bááhum.

²⁰ Nim Yensa akawandne dam a Jaameŋo Adénno. Agida n’anooh a gúbidhu keesenku sadaŋaŋo. Wúur pirendeŋ bulakánam maro bísibahánam fanti bapút.

Ka Yensa ayéjne: «Me igune.»

²¹ Yensa afak ayéj jamaŋo: - Me ba hadéko gídekehne. Kanda útibhunumuŋ te dúfegemuŋ. Kanda ninkinan, uniirohunoŋ ni jínubonkánan kafariiraa. Ingah! B'ídekehne faŋo, ninkinan dupireneŋ k'úputoŋ bim.

²² Balóbi nim, ñanlaameku Ñanyahudo anlóboh ayéjeh: - Angu n'ayéjehne ba hadék dínfegomoŋ, ingi b'adékehne, mintor dimpirenoŋ búput bim, karo inini ba gubujoora gasíibane?

²³ Banlóbi nim mees, Yensa apájul, ayéjeeniŋ: - Ninkinan uguyeŋne jamanku réeŋo. Kanda me mungu ummu raaf. Ninkinan ñammi duniyaŋo inno. Kanda me ummu duniyaŋo inno gireŋ.

²⁴ Gúmár gitengahoonuŋne maro ninkinan uniirohunoŋ ni jínubonkánan kafariiraa. Ingah! Aji dómároŋ maro me igune m'igune úduk uniirohunoŋ ni jínubonkánan kafariiraa.

²⁵ Angu immereŋ aŋŋoyindem anyéjem: - Inini, fi nuko f’ugune hantaŋ? Yensa ayéjeeniŋ: - Me igune maŋ wúuro m'íteekinoonuŋne káriman faliiho.

²⁶ Me ipirenkineh íteekinoonuŋ halabay a gúbidhu kayúulenkinan, kanda k'íteekinoonuŋ bareŋ maro m'abúuñureemne gara ajodumoh. H’ajellihinkumne hómár bareŋ gíteekinehne jamaŋo.

²⁷ Angu, fo Yensa alóbne nim, ñanlabahi wuturoŋoŋ maro ho Báábám Díino, hómár galóbumohne.

²⁸ Angu Yensa, bafégi maro h’alóbne, jamaŋo wuturoŋoŋ ayéjeeniŋ: - Ingah! Me igune wúuro m'íteekinoonuŋne káriman faliiho. Ayikhineh bísiba b'úpájihineŋne mara me igune Údiigeeno M'acaabenaane. Ninkinan, ba buyoofunkunom gúdekiheŋne. Uyoofunoŋdir Údiigeeno M'acaabenaane gukur úpájihineŋne maro me igune maŋ úmár. Ayéjeeniŋ: - Dam úfekineŋ maro giri ikaanoorah honj. Dam úfekineŋ maro h’eŋane búteekinkinan nip, ho Bááhum Díino ajellihineemne.

²⁹ Ingah! m'abúuñureemne a binanan umomiye ingi me. Hoobálahadum maro gikaanakaan h'asúumne úmár nip.

³⁰ Nim Yensa alóbne a Jaameŋo Adénno dam, te f’aŋane balóbo ñanlabahi anfiyumem.

Ka Yensa alóbne a buguyhu úsoku Iblisa

³¹ Angu, Yensa ayéj Ñanyahudo m’anfiyumemne: - Ingah! Ninkinan, moŋon moŋon alahne kawandhum aliŋ, marigen fi utaalibehum.

³² Ingah, aji ulahi kawandhum aliŋ, úpájihineh maro nómár agune ho marigeno. Agida a sabaabhu marigeno nómár, uguyhunoŋ ininkaman ñansóog m'ambennaa.

³³ Fo Yensa alóbne nim, immereŋ aŋŋoyindem anyéjem: - Angu horaŋ akanne k'úyeji mint iguyhunemiŋ ininkaman ñansóog m'ambennaa? Ingah! Mint guyahadimiŋ ñansóku wúur. Mint, ii, a muhenku Ibrahiima gífuruntuminne.

³⁴ Angu, Yensa aŋoyindeeniŋ ayéjeeniŋ: - Ingah! Ninkinan! Janteneŋ baŋ k'íteekinoonuŋ marigeno! Ugurumaareŋ aŋane bukanku hójondoŋo, hójondoŋo alakánam k’aguy úsokánom. Afeero mara uguyhuneh úsoku hójondoŋo h'okaanahne.

³⁵ Inini, úsoku wúuro, hóge apiren atoh a bádimo ba dígo baman dagurumaareŋ? Wówo! Dapiren k’atoh! Úbáku ummu dígo ba bareŋ apirenkinehne atoh a bádimo bámár baman dagurumaareŋ.

³⁶ Ayéjeeniŋ: Gúmár gíyejoonuŋne, aji Úbáku Díino apahunoonuŋ k'úbennahaŋ, duguyahaaraŋ angu ñansóku bukanku hójondoŋo. Uguyhunoŋ jamaŋ ñampahi.

³⁷ Inini me nuko, ípápájul maro ninkinan a muhenku Ibrahiima gúfurunteŋne, kanda maŋ nim guŋayeŋne bútibhu bigokum. Nim guŋayeŋne bukaano maro lahudumuŋ balókum.

³⁸ Kanda me, ho Bááhum Díino ajellihineemne, maŋ hómár gílobumohne. Kanda ninkinan mees gukankaŋkaan ho bááhánan ajellihinoonuŋne.

³⁹ Fo Yensa alóbne nim aŋŋoyindem anyéjem: - Ingah! Maamankint, úmár agune Ibrahiima. Banlóbi nim Yensa ayéjeeniŋ: - Karo nim o? Kanda ninkinan! Aji marigen, ninkinan a muhenku Ibrahiima gúfurunteŋne, ugumb ukankaŋ ho Ibrahiima akaanahne. Kanda ninkinan ŋayroŋ bukaano hómár.

⁴⁰ Kanda me gíteekinkoonuŋteekin marigeno no Díino atéekineemne. Kanda ninkinan uŋayeŋŋay bukaano ho Ibrahiima kaanahadaŋne, maro ninkinan bigokum gútibheŋne.

⁴¹ Na ninkinan gukankaŋkaan ínhonduko ingi ho bááhánan akaanahne. K'anyéjem: - Mint bááh úmánduk bareŋ giyikminne. Úmár agune Díino. Mint guyrimiŋ jaraah j'ambosaa a kunnungaŋo.

⁴² Ayéjeeniŋ: - Ingah! Aji ninkinan jaraku Díino, ugumb upokunkumuŋer maro imbi ámár gífuruntne. Ingah! Me dékoraarári. Díino abúuñureemne.

⁴³ Inini, ninkinan, horaŋ akanne wuturoŋ ho me ílobne? Ninkinan aji úfegeŋ ni wuturoŋne h’élobne maro yikuroŋ ilaah ijantenumo.

⁴⁴ Bááhánan agune Iblisa. Angu, gúmár akanne úsiibahaŋ bukaano ho bááhánan asíibane. Ayéjeeniŋ: - Ningeŋ baŋ, Iblisa, úmár ubujum káriman fam. Faka wonnáhadaŋ a marigen. Iblisa, wúur mu yikahadaŋ marigen. Iblisa apulpul hajodaŋo maro hómár bareŋ galóbuntohne. Iblisa ulaameku hajodaŋo nip.

⁴⁵ Kanda me marigeno gílobohne, angu gúmár akanne dómároŋ h’élobohne.

⁴⁶ Amiiheeniŋ ayéj: - Hóge imbi ninkinan ayikyik m’apirenkinehne aséediya karo iyikyik jínub? Kanda gílobi marigeno, horaŋ akanne ninkinan pirendoŋ k’údomoŋ gúlokum?

⁴⁷ Kanda m'agune ingi Díino, úmár gayennehineyennehin Gúloku Díino. Kanda ninkinan guyroŋ ingi Díino, gúmár akanne ufoyeŋ buyennehindukum.

⁴⁸ Fo Yensa alóbne nim immereŋ aŋŋoyindem anyéjem: - Fi údin Samareya deh! F’éyejminne fáguh aruurenruur na imarigenmiŋmarigen.

⁴⁹ Yensa ayéjeeniŋ: - Fo úyejeŋne me fáguh aruureemruur, na nim gireŋ. Me gíbuuñabuuña Bááhum Díino kanda ninkinan mungu uheelenemuŋheelen.

⁵⁰ Ingah! Me ŋayri bútib ki jamaŋo andankam. Hómár nip íbendurbendur Bááhum Díino maro úmár gadékehne ba bulekhu balóbo. Yensa abocin ayéjeeniŋ:

Úbáro ingi Ibrahiima

⁵¹ Janteneŋ baŋ k'íteekinoonuŋ marigeno! Wúuro m’abúuñane kawandhum daniirohar.

⁵² Yensa balóbi nim, immereŋ aŋŋoyindem anyéjem: -Iyoo! Angu, arennumrennum mint maro fi fáguh aruurenruur. Horaŋ akanne k’úyej m’abúuñane kawandhan daniirohar? Agida Ibrahiima aniironiiro! Anabiyoŋoŋo anniironiiro, fi f'úyej m’abúuñane kawandhan daniiro!

⁵³ Ingah! Haani maamankint Ibrahiima aniironiiro. Neeraŋ gupirenkinehne úyejoora ufaŋi úmár? Anabiyoŋoŋo anniironiiro mees. Fi kaaraŋ guninkne bigokon?

⁵⁴ Yensa aŋoyindeeniŋ ayéjeeniŋ: - Ingah! Me guyroŋ karo guyoofunoora giŋane. Aji iyoofunooray, guyoofunooraŋo g’eyoofunoorane dayik nafa. Kanda Bááhum Díino, úmár gayoofunkumne. Abocin ayéjeeniŋ: - Ninkinan, ingah! Gúyejheŋyej úmár guramunkaŋne k’uhuyomoŋ Díino. Nim gúyejeheŋne.

⁵⁵ Agida ninkinan pájiiromoŋ faŋo. Kanda me ípájulempájul arenn fet. Aji íyeji pájiirem, iguyhuneh ujoda, maŋ ni ninkinan ujodahaŋne. Kanda Díino, me ípájulempájul ifak íbuuñaham a gúlokunom.

⁵⁶ Ingah! Maamankánan Ibrahiima aséwosewo dáde f'alahne maro adék afékineh jamaanihum. Adékiidek afég, te f’afégne asúumemsuum dáde.

⁵⁷ Angu, fo Yensa alóbne nim anyéjem: - Puuy! Fi fi, ni fanti búputun díineŋ jamaŋinak ingi haala! Neeraŋ gakaanorumne k'úyej úfefeg Ibrahiima?

⁵⁸ Ayéjeeniŋ: - Janteneŋ baŋ k'íteekinoonuŋ marigeno. Me, jandiŋ Ibrahiima babosumaane, me igune m’igune.

⁵⁹ Angu, fo Yensa alóbne nim, antot bawaalo k’anyéj ba bugikinem ambujom. Angu Yensa afúr a buteerehu Jaameŋo Adénno k’ajokála ni wúur fégurom.