Injilo No Saŋ 7 - Gúloku Díino

Da Yensa asorne Gújunku Bákáso

¹ Angu afúrumi na, Yensa afaalen adékinah a didiirahu Galile bukawandinku jamaŋo. Na ganoohne bukawandinku jamaŋo mara lókiireŋ k'afúrum Galile adék a didiirahu Júde. Aji úfegi lókiireŋ k'afúrum Galile adék ba Júde maro na ñanlaameku Ñanyahudo gantíbehne bigokunom. Angu, gúmár akanne anoohi na a didiirahu Galile.

² Angu, ayikyik gujuŋ gúduk gu mint Ñanyahudo. Gújunku Bákáso ganyéjehne. Angu gújuŋo batéejari,

³ índoonenenku Yensa andéker andak anlahuntam k’anyéjem: - Fi, uñantay úfur nanka k’údek ba a didiirahu Júde k’ulahun bim m'angune a dayrahan. Ingah! Immereŋ mees aññantay anfég tamaseereŋo n'okaanahne.

⁴ Eke wúur m'asíiba ki gurethinem ayéega dañoob jamaŋo h'akaanahne? Inini, déker ba bim ki nim upiren ujellihin jamaŋo nip tamaseereŋo n’okaanahne ki nim jamaŋo ampájulo!

⁵ Aji úfegi ni índoonenenku Yensa anlóbne nim mara fiyindom.

⁶ Yensa aŋoyindeeniŋ ayéjeeniŋ: - Ingah! Ninkinan waatowaat gúsiibaheŋne upireneŋ ukengeŋ k'údekeŋ ba bim, kanda me waathum aroŋroŋ.

⁷ Ninkinan kandoŋ honj ki jamaŋo anfoyoonuŋ. Kanda me uhacaah. Anhaceemhac n'íteekinkeeniŋne maro hakaanankánin jóndoŋ. Angu, gúmár akanne anhacaam.

⁸ Inini ninkinan, ufant údekeŋ. Kanda me mungu bísibahum b'eñantane ídek aroŋroŋ.

^9-10 Angu fo Yensa alóbne nim, ankeng k’ankok ba a gújuŋo Jerusalem. Yensa mungu afant atúy na hotir a didiirahu Galile. Banoohiinooh, akeng akokálineeniŋ ba Jerusalem. Kanda baŋay hadéko, asutura hadékhinem.

¹¹ Angu na Jerusalem, a waathu gújuŋo, ñanlaameku Ñanyahudo ankomb bútibhu Yensa. Kanda fégurom. K’angu anyéjeh: - Angu inini umoraŋ?

^12-13 Kanda jamaŋo m’ansorne a gújuŋo bollendeŋeŋ balóbo a gubaarhu Yensa ki jamaŋo anyennehin. K’angu anhohayeh anyéjeh: «Úmár wúur újooni.» Índukoŋo aññopoh anyéjeh: «Wówo! Ummu wúur újondoŋ. Aŋosunkuneh jamaŋo nip.» Nim jamaŋo aŋŋane sinhohayo, kanda wúur bollendeŋ alób ki jamaŋo anyennehin maro bollendeŋeŋ ñanlaameku Ñanyahudo.

¹⁴ Angu da gújuŋo ayikne ásibaŋ alallaŋ, Yensa adék ba a Jaameŋo Adénno. Bapúti atoŋ bukawandinku jamaŋo.

¹⁵ Angu Yensa, f’atoŋne gukawandino, ñanlaameku Ñanyahudo anyéjayeh: - Kanda mintor! Apápájul Hañaañeno hóbun te karaŋáraŋ. Angu neeraŋ gapirenkinehne k'apájul Hañaañeno ineeŋ?

¹⁶ K’angu Yensa ayéjeeniŋ: - H'élobohne fúrunturoŋ a binaam. Imbi m'abúuñureemne gafúruntne.

¹⁷ Ingah! Wúuro m’asíibane búpájulo ho Díino asíibane, wúuro úmár apájihineh maro h’élobohne imbi Díino gafúruntne. Wúuro úmár dayéj muk a bigokum gafúruntne.

¹⁸ Wúuro m’alóbohne gunanaam asíibáásiib k’andankam. Ki úbuuñuraaŋo úwuuhinno asíibaháneh k'andank m'abúuñuremne. Wúuro úmár gara ajodumoh.

¹⁹ Inini, ninkinan, eke Anabila Musa adoohutoonuŋdoohut Luwaŋanku Díino? Kanda ninkinan, haani úmánduk búuñaaraŋ hómár. Angu horaŋ akanne útibheŋ bigokum?

²⁰ Balóbi nim mees, immereŋ aŋŋoyindem anyéjem: - Kanda, fi jéburo. Fáguh infa na arinken. Hantaŋ adékhinehne bútibhu bigokon?

²¹ Yensa ayéjeeniŋ: - Ninkinan, ingah! Me ii, ikankaan tamaseer amánduk a bísibaŋo bi guyohálaŋo. Kanda f’ekanne nim, ninkinan nip ujaháliheŋjaháli.

²² Woseneŋ baŋ! Eke ninkinan, Musa adoohutoonuŋdoohut luwahu gusunnahu índiigeeno? Agida hómár cosaan imbi maamaamankánan biriman fam. Kanda ingah! Eke gúduk ungo na, haani bísibaŋo bi guyohálaŋo usunnahaŋ jádiigeeno?

²³ Eke ninkinan, usunnahunaŋ kowol kódiigeen a bísibaŋo bi guyohálaŋo ba gúbuuñahu Luwahu Musa? Angu inini, horaŋ akanne k'uñuumuloŋ ingi me a gubaarhu n'íjebunne bigoku wúuro a bísibaŋo bi guyohálaŋo?

²⁴ Ninkinan! Bénteŋ bulekhu balóbo a gubaarhu n'úfegorumoŋne. Ingah! Guŋayeŋ bulekhu balóbo, ulekeŋ a binaal.

²⁵ Angu índukoŋo m’angune Jerusalem, banyennehini ni Yensa akawandahne anyéj: - Kanda mintor! Eke bigoku ummu ñanlaamekintor gantíbehne?

²⁶ Angu, horaŋ akanne k’ambénnem k'alóboh ineeŋ? Karo immereŋ andómdom inini maro úmár agune Umaasaŋo Mu Díino Acaabenne?

²⁷ Kanda dapiren k'aguy úmár! Eke Umaasaŋo Mu Díino Acaabenne anyéjyej dapájulaa b'afúruntne? Kanda úmár, mintor ímpájulomoŋpájul, infak ímpájuloŋ b'afúruntne.

²⁸ Angu fo Yensa ayennehinne n’anlóbne nim, gaŋay kawando a Jaameŋo Adénno, ayoofunoh síngiirhinem k'ayéjheeniŋ : - Ninkinan! Hóge úpájulemuŋpájul? Hóge úpájuleŋpájul b’ífuruntne? Ingah! Me dékoraarári. Faka m'abúuñureemne gara ajodumoh. Kanda m'abúuñureemne, ninkinan pájiiromoŋ.

²⁹ Kanda me ípájulempájul maro imbi úmár gífuruntne, te úmár abúuñureemne ba a binanan.

³⁰ Angu Yensa balóbi nim, ansíiba buhubhánom kanda wúur pirendeŋ bumapunkánam maro Yensa, bísibahánam aroŋroŋ.

³¹ Agida ñanlabahi m'angune na anfiyumfiyum Yensa. Immereŋ anlóboh anhohayeh k'angu anyéjeh: - Kanda ummu! Añantay aguy Umaasaŋo mu Díino Acaabenne. Ninginteŋ tamaseereŋo n'akaanahne. Yikireŋ wúur m'afaŋam bukanku tamaseereŋo!

³² Angu ñanfarasiyaŋo ingi ñanlaameku alimaamaŋo anyennehin jamaŋo n’anhohayehne. Banyennehini, ambúuñ ñammarahu Jaameŋo Adénno ba bulaku Yensa.

³³ Angu bampúti imbi Yensa, úmár ayéjeeniŋ: - Me ii, ifant imiñilaháneh hotir ingi ninkinan k’ikir iŋoolin ba imbi m'abúuñureemne.

³⁴ Iŋoolindir, ninkinan útibhunumuŋ, kanda dupireneŋ k’úfegemuŋ maro b’igune, ninkinan dupireneŋ k'úputoŋ bim.

³⁵ Angu balóbi nim, ñanlaameku Ñanyahudo ammiihayeh k’anyéjeh: - Kanda, mintor! N’ayéjne mintor, aŋoolindir dimpirenoŋ k’ínfegomoŋ. Neeraŋ gasíibane búyejo na? Angu beeraŋ gañantane adék bi dínfegomoŋne? Bam beeraŋ gadékehne? Karo alahlah ba hadék ba imbi Ñanyahudo m’andékne k’anguy akooroŋo n’aŋantinne? Karo nuko aguyhuneh ba bukawandinku mi guyroŋoŋne Ñanyahud?

³⁶ Angu k’ayéjne íntibhunomoŋ, dimpirenoŋ k’ínfegomoŋ, k’afak ayéj bim, mintor dimpirenoŋ k’ímputoŋ bim, na nuko, neeraŋ gasíibane faka búyejhintor?

Fo Yensa ammíirinahinne Jamméejhu Díino Jarenninno ingi baaruŋo b’anéerumehne kanjébo

³⁷ Afúrumi na, bísibaŋo bibiyaamo bi gújuŋo apút. Agida bímár afaŋunumne n'anafa. Angu dam Yensa awonn na a barumuno k’angu alóboh kabaŋ ayéjeeniŋ: - M'asíiba baaru adéker a binaam k'aruuh. Wúur m’afiyumeem adéker a binaam k'aruuh.

³⁸ Ingah! Aji údekári a binaam k'uruuh, «baaruŋo b'anéerumehne kanjébo abutohuneh hafithen afuuh dáde.» Nim gañaañne a Hañaañeno.

³⁹ Agida Yensa f’aretne na baaruŋo b'anéerumehne kanjébo, na Jamméejhu Díino Jarenninno galóbumohne. Ayikhineh bísiba bi jamaŋo m’anfiyumemne anjakáneh Jamméejo jámár, kanda bísibaŋo bímár aroŋroŋ. Úpájuleŋ, waato nómár ni Díino fanti bakucun Jamméejhinem Jarenninno imbi jamaŋo. Agida a waato nómár ni Yensa fanti bakengunaa k'ajah guramunkánam. Angu, gúmár akanne Díino fanti bakucun Jamméejhinem Jarenninno imbi m’anfiyumemne.

⁴⁰ Angu, dam barumuno akankaan habíd hanak a gubaarhu Yensa. Immi ganyéji: - Kanda! Marigeno, úmár agune Anabiyoŋo n'ayéjuhne a Hañaañeno adék adékekineh.

^41-42 Immi anyéjeh: - Kanda úmár agune Umaasaŋo Mu Díino Acaabenne. Kanda índukoŋo aññopoh k’anyéjeh: - Wówo! Úmár gireŋ! Ingah! Umaasaŋo Mu Díino Acaabenne dafúrumor a didiirahu Galile deh! Aññañaañ a Hañaañeno maro afúrumokuneh a muhenku umaasaŋo Dawuda, te Dawuda a saariŋo n’aretuhne Betlihem gabosaane. Angu, na Umaasaŋo Mu Díino Acaabenne añantane afúrumor. Dafúrumor Galile.

⁴³ Nim jamaŋo ganlóbohne. Inini, gúmár akanne ankaani habíd hanak. Immi imbi Yensa, immi hóburo.

⁴⁴ Índukoŋo ansíiba bulakánam, kanda wúur mapundom a waato nómár.

⁴⁵ Angu ñanfarasiyaŋo ingi ñanlaameku alimaamaŋo imme na bútuyoh. Agida ambúuñbuuñer ñammarahu Jaameŋo Adénno ba bulaku Yensa. Lahurom. Angu aŋŋoolin ba imbi m’ambúuñureeniŋne. Bampúti, ñambúuñhánin anfég maro doohuroŋoŋ Yensa. K’angu ammiiheeniŋ anyéj: - Kanda ninkinan, m’údekeŋne budooŋo umoraŋ? Horaŋ akanne lahururomoŋ?

⁴⁶ Anyéjeeniŋ: - Mint, ídekmiŋdek baman maŋ bim. Bíputmiŋ, iwonnmiŋ k’ijantenmiŋ balókunom. Kanda halóbankánam yikireŋ ingi m’ammíir. Angu, gúmár akanne laháremmiŋ.

⁴⁷ Ñanfarasiyaŋo aŋŋoyindeeniŋ anyéjeeniŋ: - Hom?! Ninkinan mees, ahar aŋoosunoonuŋoosun!

⁴⁸ Inini ningeŋ baŋ imbi mint ñanfarasiyaŋo ingi ñanlaamekánan, hantaŋ afiyumemne? Yikireŋ!

⁴⁹ Ningeŋ baŋ a Luwaŋanku Musa! Ingah! Jamaŋo immi n’angaalaane, yikireŋ haani úmánduk m’apájul binaahu Díino ingi Luwaŋankánam. Anhalakihalaki nip. Nim ñanfarasiyaŋo anlóbne.

⁵⁰ Agida dam ayikyik ufarasiya úduk m’asor. Gurethinem Nikodem. Nikodem fam adékdek k'anwooñ ingi Yensa. Angu bayennehini ho índinenkinem ñanfarasiyaŋo anlóbne ayéjeeniŋ:

⁵¹ - Ninkinan, hey! Hóge mintor a luwahintor inyikoŋyik binaal k’inlekoŋ balóbo ni huyuro wúuro k'umiihem káriman a bigofo baman a gukalo? Yikuroŋoŋ deh!

⁵² Kanda Nikodem balóbi nim ankombom buyeefulo k’anyéjem: - Huyi! Karo fi fi mees údomdom maro Umaasaŋo Mu Díino Acaabenne afúrumokuneh Galile? Inini, déker k’uning Hañaañeno! Hóge ayikyik anabiyoŋ m’afúrumor bim? Yikireŋ deh! Haani amánduk.

⁵³ Angu f'anlóbne nim ambicay, moŋon moŋon adék ba a díkinem.