Injilo No Saŋ 4 - Gúloku Díino

Ka Yensa ajellihinne bigokunom a didiirahu Samareya

¹ Afúrumi na, ayikyik m’andék anlób ingi índiigeeno m’angune a dayrahu ñanfarasiyaŋo. Bampút anyéjeeniŋ maro m'anyicaane k'anguy a dayrahu Yensa, immereŋ anfaŋi n'anrumun mi Yaya ayicne k'anguy a dayrahánam.

² Agida Yensa faŋo gara ayicimeh. Ñantaalibehinem ganyicehne jamaŋo.

³ Angu, Yensa bayennehini jamaŋo n’anlóbohne hómár, anfúror a didiirahu Júde k'andék aŋŋoolin ba a didiirahu Galile ingi ñantaalibehinem.

⁴ Agida, a hadéko aññantay andékum si didiirahu Samareya.

⁵ Angu andék f’andék ampút a saariŋo n’aretuhne Sikar. Agida Sikar, saariŋo nómár agune a didiirahu Samareya. Agida na atéejateeja guraho gu Yankuba anahne úbárám Isuf. Angu bampúti na, ñantaalibeŋo andék gútibilahu guyaahálaŋo a marseŋo.

⁶ Kanda Yensa, úmár n'ayohne dáde, anooh bi koloŋo n'aretuhne kolonku Yankuba, agida ni bísibaŋo abáári.

^7-8 Banoohiinooh udikaam úduk afúror ba búdiino. Úmár ummu Samareya. Agida ni ñantaalibeŋo anroŋor b’andékne gugilahu guyaahálaŋo. Udikaamo bapút a koloŋo, alahun na Yensa n’anooh. Yensa ayéjem: - Gúdiini unaham k’iruuh!

⁹ Úmár aŋoyind Yensa ayéj: - Kanda fi Uyahud, neeraŋ gupirenkinehne ukiina me ummu Samareya baaruŋo? Nim udikaamo ayéjne Yensa. Agida Ñanyahudo garanyennehinayeh ingi ñamhu Samareya.

¹⁰ Yensa ayéjem: - Hey! Aji úpápájuler ho Díino asíibane búneken ingi wúuro m’akiinahenne baaruŋo, fi ugumb ukiinaham k'anaho baaruŋo b'anéerumehne kanjébo!

¹¹ Udikaamo aŋoyindem ayéjem: - Kanda arafaŋ! Fi lahuro gubaag, te koloŋo aŋantinŋantin, angu neeraŋ gunahorunkunumne baaruŋo b'úyejne?

¹² Fég baŋ, koloŋo inno maamankint Yankuba awóojne k'abéndur mint. Úmár ingi imberenkinem ingi kooreŋenkinem nip baarukunom ganruuhohne. Karo fi ulahlah karo fi ufaŋi úmár Yankuba?

¹³ Balóbi nim Yensa ayéjem: - Ingah! Baaruku koloŋo inno, moŋon moŋon aruuhne, damiñ baaru afak alaham.

¹⁴ Kanda, ingah! Baaruŋo ba me ídekehne bunakánam, aruuhdir bámár, baaruh dafak aŋoolinkin alaham. Baaruŋo bámár aguyhuneh a binaanam ininkaman baaruku koloŋo b’abuturohne abena, b’anéerumehne kanjébo ka bandór.

¹⁵ Yensa balóbi nim udikaamo ayéjem: - Kanda arafaŋ! Naham baŋ baaruŋo bámár ki nim baaruh dafak alahaharaam ki nim diŋooliner nanka ba búdiin.

¹⁶ Yensa ayéjem: - Inini, déker huyulo údiigenken!

¹⁷ Udikaamo aŋoyindem ayéjem: - Me yikiri údiigeen. Yensa ayéjem: - F'óyejne yikuro údiigeen, marigeno gúlobne.

¹⁸ Kanda índiigeen ímákila ujahayeŋjahay ki ummu m'uguyayeŋne inini, jahuro. Úloblob gu marigen.

¹⁹ Úmár aŋoyindem ayéjem: - Kanda arafaŋ! Inini, ífefeg maro fi anabiyoŋ.

²⁰ Angu horaŋ akanne ninkinan Ñanyahudo úyejeŋ jamaŋo aññantay andék antúy Díino beŋen Jerusalem, agida mint Ñansamareyaŋo, nanka a montaaño inno gituyohomiŋne, ka maamaamankint antúyohomne káriman fam?

^21-24 Yensa ayéjem: - Udikaam, fiyum baŋ h’édekehne búteekinken. Waat inno bim n'adékireh, adasridas deh, n’ófekineŋne maro kantígo fankánam k'ótuyohoŋne Díino yikireŋ nafa. Karo ninkinan útuyohomoŋ a montaaño inno, karo Ñanyahudo antúyohom a bukoku Jerusalem. Kantígo kámár fankánam yikireŋ nafa. Ayikyik h’afaŋunumne n'ayik nafa imbi Díino, hómár agune n’íntuyorunku wúuro Díino. Nómár afaŋumne buyikhu nafa. Abocin ayéjem: Ingah! Díino jamméej. Angu, gúmár akanne aji wúur asíibay bútuyhunom bútuy b'apút a hafithinem, fo Jamméejhu Díino akááñinahinem. Agida Díino gatíbetib m’antúyohomne bútuy bu marigen a sabaabhu Jamméejhinem Jarenninno. Úpájuli, ninkinan Ñansamareyaŋo pájiiroŋ Díino n’útuyohoŋne. Agida mint Ñanyahudo ípájulemmiŋpájul. Faka a gubaarhu mint Ñanyahudo, Díino apahununkunehne jamaŋo.

²⁵ Yensa balóbi nim, udikaamo ayéjem: - Ípápájul mara m'ayéjuhne Umaasaŋo Mu Díino Acaabenne adék adékekineh. Inini, úmár apútodir, adék akeekir mintor inho Díino arenn nip.

²⁶ Yensa ayéjem: - Me igune maŋ úmár, m'iŋane balóbo ingi fi.

²⁷ Balóbi nim ñantaalibeŋo ampútor, m'andékne a marseŋo. Banfégi ni Yensa aŋŋane balóbo ingi udikaam abineeniŋ. Kanda haani utaalibe úmánduk bollendeŋ gumiku Yensa ayéjem: «Horaŋ gúsiibane imbi úmár?» wola: «Horaŋ gúlobhoŋne ingi úmár?»

²⁸ Ñantaalibeŋo bampútri, udikaamo anink na bihano k'agír ba a saariŋo. Bapúti ayéjeh ñammi saariŋo:

²⁹ - Índek índokoonuŋ k’úduk úfegeŋ údiigeeno m’alóbne h’ekanne nip ni wúur téekindom! Karo úmár agune Umaasaŋo Mu Díino Acaabenne?

³⁰ Fo udikaamo alóbne nim, jamaŋo anfúror a saariŋo aŋŋay bujonnaŋo bi Yensa agune.

³¹ A waato nómár agida ni ñantaalibehinem anyéjeh: - Arafaŋ, yaahar!

³² Úmár aŋoyindeeniŋ ayéjeeniŋ: - Me iyaahálayaahála guyaahála gu ninkinan pájiiroŋ.

³³ Angu Yensa balóbi nim ñantaalibeŋo ammiihayeh anyéjeh: «Karo úduk adohutemne guyaahálaŋo angu?»

³⁴ Yensa akir akeekireeniŋ h’asíibane búyejo, ayéjeeniŋ: - Me, ii, a búdetálinku dohohu m'abúuñureemne ingi bukaano h'asíibane mees, hómáráŋ nip asúumeemsuum, te faka akankaan k'ihay.

^35-36 Eke ninkinan gúyejheŋyej, «Afallay júunoŋ arenekeŋ ki jafaco abár.» Iyoo! Inini k'íteekinoonuŋ: Maanoŋo abábár jafac! Ningilinteŋ baŋ! Jamaŋo imme na n'ampare horoŋ búdomhu Gúloku Díino. Wúur m'afac maanoŋo acaamaacaam deh! Ingah! A waato inno m'aññantane anyik kanjébo ka bandór ambábár jafac. Angu, uworhu maanoŋo ingi ufaco, immereŋ anfégdir maanoŋo n’anfacne ansewohuneh dáde. Yensa abocin ayéjeeniŋ:

³⁷ Fégeŋ baŋ, funaareŋo marigen gafak alóbne: «Wúur aworhuneh maanoŋo. Gabohi uburo adék afac.» Eke nim funaareŋo alóbne?

³⁸ Úpájuleŋ, me íbuuñoonuŋbuuñ jafac bi ninkinan wodoŋ bi índukoŋo andóolne. Kanda ninkinan ufachánaŋ maanoŋo no índukoŋo anworne. Nim Yensa ayéjne ñantaalibehinem.

³⁹ Afúrumi na, Ñansamareyaŋo ñanlabahi anfiyum Yensa a gubaarhu ni udikaamo ayéjne: «Úmár alóblob h’ekanne nip!»

⁴⁰ Angu ñammi Samareya banyennehini ho udikaamo alóbne, andék imbi Yensa. Bampúti, ankomb bunothunom ki nim anooh na ingi immereŋ. Angu Yensa anooh na buruhu ásibaŋ anakaŋ.

⁴¹ K’angu anfak anyik ñanlabahi m’anfiyumem a gubaarhu h’alóbohne.

⁴² Banfiyumi Yensa, andek anyéj udikaamo: - Inini ii, mint ídommiŋdom h’otifurne mint k’ifiyummiŋ Yensa. Kanda guyroŋ gubaarhu h’ólobne bareŋ. Biyennehinmiŋ h’alóbohne nip, mint mees ífegmiŋ maro úmár agune Upahunku duniyaŋo.

Ka Yensa ajébunne úbáku uperefeŋo

⁴³ Yensa banoohi buruhu ásibaŋ anakaŋ a saariŋo n’aretuhne Sikar, ankeng ingi ñantaalibehinem k’andék a resiyoŋo n’akunaane, n’ayéjuhne didiirahu Galile.

⁴⁴ Agida Yensa ayéjyejer: - Anabiyoŋo, a saarihinem n’abosaane danlóki buninkhinem anabiyo, k'angu dambúuñaham ininkaman n’aññantane ambúuñaham. Kanda haani maŋ nim andék ba na.

⁴⁵ Agida, ñammi Galile ñanlabahi andékdek ba busorhu Gújunku Guwusunaamo Jerusalem. F’angune bim, anféfeg tamaseereŋo no Yensa akaanahne. Gújuŋo badéti, aŋŋooliner. Angu gúmár akanne fo Yensa apúturne a bukokunom, ankucunom hóbun.

⁴⁶ Agida Yensa f’agune a resiyoŋo nómár Galile, aŋoolin ba a saariŋo n’aretuhne Kana. Agida saariŋo nómár, nómár agune ka Yensa akúbulerne baaruku koloŋo akaan baaruku reseŋ. Angu, na a saariŋo n’aretuhne Kana, Yensa anrahne ingi uperefeŋo mu úbárám anér dáde. Uperefeŋo úmár, a saariŋo n’aretuhne Kapáneyum gagune, kanda

⁴⁷ f'ayennehinne maro Yensa ummo na Kana, afúrumor Kapáneyum adék alahuntam na. Angu uperefeŋo balahunti Yensa ayéjem: - Ingah! Bonkerer k’índokoŋ ba Kapáneyum k'újebindeem úbákum. Nim uperefeŋo akiinane Yensa. Agida kódiigeeno kómár anaman biniiroŋo afallahemne.

⁴⁸ Yensa aŋoyindem ayéjem: - Ninkinan, umpah aji féguroŋ tamaseereŋo ingi h'ajaahalihoonuŋne, dufiyumeŋ?

⁴⁹ Uperefeŋo aŋoyindem ayéjem: - Bonkerer k’índokoŋ jandiŋ wolo baniirom.

⁵⁰ Yensa aŋoyindem ayéjem: - Ingah! Ŋoolint ba na! Úbákán ajébhineh. Bayéjem nim uperefeŋo adóm gúlokunom k’atuŋul hadéko.

⁵¹ F'aŋane gúŋuño, anrah ingi ñandóolhánom n'ambúuñanteeniŋ a binaanam. Banrahi, immereŋ anyéjem: - Ingah! Wolo ayoofayoofa.

⁵² Angu, uperefeŋo amiihála ayéjeeniŋ: - Waat nooraŋ gakaanemne nim? Immereŋ anyéjem: - Déegen, waathu báárigo gúduhunku arino abénnáne.

⁵³ Angu bááhu wolo alentála maro kanjébhu wolo agidagida ingi waato no Yensa ayéjemne: «Úbákán ajébhineh.» Angu káriman dam, bááhu wolo ingi jamanku díkinem nip anfiyumne Yensa.

⁵⁴ Angu tamaseero nómár Yensa anakinne a didiirahu Galile f'aŋoolintne a didiirahu Júde.