Injilo No Saŋ 20 - Gúloku Díino

Fo búgááro aniimne a búyindo

¹ Afúrumi na, dimanso táptápuro, Mariyama ummu Magdala afura ba a búyindhu Yensa. Bapúti, alahun buwaalo b'arokumerne burukumbanku búyindo n'afúnnaa. Afég maro búgááro gireŋ na.

² Bafégi hómár, agír ba búteekinku Simon Piyer ingi utaalibeŋo úduko mu Yensa aninkne a hafithinem. Bapút ayéjeeniŋ: - Ingah! Ninkinan! Anfúnnfunn búgáku Umuyhintor a búyindo, kanda pájiirimiŋ k'anninkne.

³ Banyennehini hómár, Piyer ingi utaalibeŋo úduko antuŋul hadéko ba a búyindo.

⁴ Angu immereŋ inako angíreh ba a búyindo, kanda utaalibeŋo úduko, úmár afaŋumne n’akas Piyer. Angu úmár anohne Piyer apút a búyindo.

⁵ Bapúti na, aŋoya k’ayoogárina. Bayoogárinay, afég kasankeŋo ingi búliiro búduko b'angubinumne Yensa n’adabunaa a réeŋo. Hómár bareŋ gafégne na, kanda ŋandaŋ a búyindo.

⁶ Angu Simon Piyer bapútri mees, awúuh aŋan a búyindo. Baŋani, afég kasankeŋo n’aworaane a réeŋo

⁷ ingi búliiro b’adaabinumaane bigofo n'abopaa aninkaa hóburo.

⁸ Angu utaalibeŋo úduko m'anohumne apút anik aŋan a búyindo. Baŋanti, úmár mees afég kasankeŋo ingi búliiro n'aninkaane hóburo. Bafégi hómár, adóm maro Díino akengunkengun Yensa a biniiroŋo.

⁹ Agida immereŋ, ka Hañaañeno anyéjne Yensa akenghineh a biniiroŋo, na pájiireŋeŋer hóbun.

¹⁰ Angu banfégi maro búgááro gireŋ na, aŋŋuñ moŋon moŋon ba a díkinem.

Fo Mariyama ummu Magdala afégne Yensa

¹¹ Afúrumi na, Mariyama ummu Magdala aŋoolin ba a búyindo. Bapúti na, awonn k'ahooŋoh. Aŋoya k’ayoogárina.

¹² Bayóogárinay, afég maleekaŋaŋ anakaŋ n'annooh k’anninkerne búgáku Yensa. Adúko bi bigofo aguyerne, adúko bi hádiho aguyerne. Bayaah bafer maleekaŋaŋo ankaanane.

¹³ Angu banfégi Mariyama anyéjem: - Horaŋ guhooŋohne? K'ayéjeeniŋ: - Andoodooh búgáku Umuyhum te pájiiri k'anninkemne.

¹⁴ Mariyama f'alóbne nim mees akúbula. Bakúbulay, afég Yensa n'awonnáne na, kanda yitárom.

¹⁵ Angu, Yensa ayéjem: - Horaŋ guhooŋohne? Hantaŋ gútibehne? Kanda Mariyama yitárom. Úmár alahlah karo úmár agune m'amarahne búkááro búmár. Mariyama ayéjem: - Bonkerer! Aji ininkaman f'udoone búgááro, úteekineem k'oninkne k'ídek idoorom.

¹⁶ K'ayéjem: - Mariyama! F’ahuyemne nim, Mariyama ayitem k’anoorla ayéjem: - Rabuni! Agida Rabuni, nim agune «Arafaŋ» ingi gúlokinin guhebároŋo.

¹⁷ Yensa ayéjem: - Dahu ulaham ineeŋ, maro me fanti biŋoolin ba imbi Bááhum a raafo. Inini, ŋoolint ba imbi ñantaalibehum. Gúputi úyejeeniŋ: Me inini ba guŋoolin ba imbi Bááhum gídekehne. Bááhum, Bááhánan mees. Téekinteeniŋ maro me ba guŋoolin ba imbi Dínkum. Dínkum, Dínkinan mees. Angu ba hadéko gídekehne. Kuku úteekineeniŋ!

¹⁸ Mariyama bayennehini hómár, adék ba imbi ñantaalibeŋo k'ayéjeeniŋ: - Ninkinan! Me ífefeg Umuyhintor! K'atéekineeniŋ h'alóburemne.

Fo ñantaalibeŋo anfégne Yensa

¹⁹ Afúrumi na, bísibahu dimanso, bugaanigo yem, ñantaalibeŋo n’anjóg kantíg ínkánduk. Angu, k'anjógne immereŋ anrahunrahun hábángááro nip. Aji úfegeŋ n'anrahunne habángááro, mara n'andéwunne ñanlaameku Ñanyahudo. F'angune na, Yensa afúror a bájegenenkinin k'ayéjeeniŋ: - Díin akaan uyikeŋ básuum a hafitenkinan!

²⁰ Yensa balóbi nim, ajellihineeniŋ halathu halakánam ingi gu gusaalhánam mees. Ñantaalibeŋo banfégi Umuyhánin mees, anséwo dáde.

²¹ Yensa aŋoolinkin ayéjeeniŋ: - Díin akaan básuumo aguy a binanan! Ingah! Maŋ ni Bááhum abúuñureemne ba a binanan, maŋ nim me mees gídekehne ba búbuuñhánan. Íbuuñhunoonuŋ k'údekeŋ úteekineŋ jamaŋo kúmbuuñanku Díino.

²² Nim Yensa alóbne ñantaalibeŋo k'anjógne dam. Balóbi nim mees, afuurineeniŋ k'ayéjeeniŋ: - Ingah! Jahareŋ Jamméejhu Díino Jarenninno.

²³ Aji ubonkereŋ jamaŋo jínubonkánin, Díino abonkerhineeniŋ. Aji ufoyeŋ bubonkerhinin, Díino dabonkereeniŋ.

Fo Toma anrahne ingi Yensa

²⁴ Angu dam, fo ñantaalibeŋo anfégne Yensa, utaalibeŋo m'aretuhne Toma, úmár sodoŋ. Toma «Kuusaŋo» ganhuyohomne. Agida Toma atohtoh imbi ñantaalibeŋo Haalaŋo ingi Inako.

²⁵ Kanda fo índinenkinem anyéjemne, «Mint ífegmiŋfeg Umuyhintor!» úmár ayéjeeniŋ: - Me dómári hómár! Ingah! Me, aji fégirem f’emapun halato ha preegeŋo adújemne a halaho, ingi gulato gu gusaalo, me na dídom kara Umuyhintor ajébjeb.

²⁶ Angu afúrumi na, ayik lóokum amánduk, ñantaalibeŋo anrah a dígo nómár k'anjóg a gufaco. Kanda dam ungu, utaalibeŋo m'ayéjuhne Toma asosor. Kanda haani maŋ ni anrahunne dam babángááro, Yensa afútifut maŋ na k'anjógne. Awonn a jégenenkinin ayéjeeniŋ: - Díin akaan básuumo aguy a binanan!

²⁷ Angu balóbi nim mees, babollay ahuy utaalibeŋo m'ayéjuhne Toma. Ayéjem: - Toma! Dókulo! Adéker. Ayéjem: - Ingah! Mapunt halakum! Mapunt gusaalhum mees! Ayéjem: - Ingah! Bént kamantero. Me íjebjeb!

²⁸ Toma ayéjem: - Puuy! Marigen! Fi f'ugune Umuyhum! Fi f'ugune Dínkum.

²⁹ Toma balóbi nim, Yensa aŋoyindem ayéjem: - Inini fi búfegeem, ukur údom! Kanda ayikyik jamaŋo jup m'andóm ni fégurum. Immereŋ mungu anyikhineh barake báde. Iyoo! Nim Yensa alóbne dam Toma a bafiyundhunom.

H’akanne ki líibáro inno añaañaa

³⁰ Agida, Yensa akankaan tamaseereŋo jup no mint ñantaalibehinem ífegminne. Adúkoŋo ñaañiiraa nanka.

³¹ Kanda, ingah! Tamaseereŋo innoŋ n'aññaañaane nanka, aññaañaañaañ ba bajónkánan, nim ungu úfegeŋ, ufiyumeŋ maro Yensa, úmár agune Umaasaŋo Mu Díino Acaabenne, Úbáku Díino. Nim ungu, aji ufiyumemeŋ, uyikinkineŋ na kanjébo ka bandór. Angu, hómár akanne líibáro inno añaañaa.