Injilo No Saŋ 2 - Gúloku Díino

Da Yensa afúnnáne tamaseero aliiho

¹ Afúrumi na, dahankánam ayikyik bajah a saariŋo n’aretuhne Kana a didiirahu Galile. Angu nunku Yensa adék asor.

² Anhuyhuyer Yensa mees ingi ñantaalibehinem k'andék.

³ Bampút a bajaho, a jégenenku bajaho, baaruku reseŋo adét. Baaruku reseŋo badéti nunku Yensa ahuy Yensa k’ayéjem: - Yensa! Baaruku reseŋo adédet.

⁴ Úmár ayéjem: - Ayo, hóge me iñantay ikaan na honj? Me waato no Díino ayéjeemne aroŋroŋ.

⁵ Na nunku Yensa aŋoolin adék alahun ñantédaŋo k'ayéjeeniŋ: - Inini, Yensa aji apútri, neŋen neŋen gayéjoonuŋne, ukaanaŋ. Hogeh uyennehineŋyennehin?

⁶ Agida ayikyik na dinhan dínde d’alódumaa ingi bawaalo, te Ñanyahudo andokuneh baaruŋo b'agune na k'ampiren anyica maŋ ni luwaŋankánin amiihulne. Angu, ahanaŋ amákilaŋ ingi ímbenduk agune na. Te ahanaŋo ámáráŋ, beŋen beŋen gadoohodooh litaraŋ jamaŋirenek ba keme ingi buruhur.

⁷ Angu, bamiñaamiñ Yensa adéker, adék ayéj ñantédaŋo: - Inini ahanaŋo innoŋ, dínteŋ k’ukaanaŋ na baaruŋo! Andak andíin. Bandíini ahanaŋo f’arumun tip baman a habilo,

⁸ adéker ayéjeeniŋ: - Yikiteŋ na ulaameku gújuŋo! K’andak anlahun ulaameku gújuŋo k’annéerem baaruŋo.

⁹ Údiigeeno aruuh baaruŋo b'akúbulane aguy angu baaruku reseŋ, kanda pájiireŋ bi baaruŋo bámár afúruntne. Agida ñantédaŋo mim ampápájul n’adékorumne maro immereŋ andínne baaruŋo. Angu ulaameku gújuŋo bañumay mees, ahuy ummu bajaho

¹⁰ k’ayéjem: - Kanda fi! Neeraŋ gakaanorumne k’úneer mint baaruku reseŋo f’édek ideerumiŋ kukur úneer mint b'afaŋumne n'asúum? Hóge nim gakankuhne? Eke mintor, gúputi a bajaho, annéero b’afaŋumne n’asúum guliih, guruuhi f’ódek uhay k'ankir ambiyam báduko. Kanda fi ubiyambiyam b’afaŋumne n’asúum dáde! Nim ulaameku gújuŋo alóbne.

¹¹ Angu tamaseero nómár, nómár agune aliiho no Yensa ajellihinne jamaŋo. Akankaan nómár a saariŋo n'aretuhne Kana. Agida Kana agune a didiirahu Galile. Na gajellihinne jamaŋo bafukunom b'afúruntne imbi Díino. Angu ñantaalibehinem, banfégi hómár, anfiyumem.

¹² Angu, bafúrumi na, Yensa ingi nunom ingi índoonenenkinem ingi ñantaalibehinem andék ba a saariŋo n'aretuhne Kapáneyum, k’andak annooh na ásibaŋ.

Da Yensa atibaarne ñanjuliyaŋo a Jaameŋo Adénno

¹³ Afúrumi na, fo gújuŋo g’ayéjuhne Gújunku Guwusunaamo atéejarne, Yensa adék ba Jerusalem, úmár ingi ñantaalibehinem.

¹⁴ Bampút Jerusalem andék ba a Jaameŋo Adénno. Bampúti a Jaameŋo Adénno anlahun na ñanjuliyaŋo a buteereŋo. Immi anjuliya ahayaŋo, immi anjuliya saahaŋaŋo, immi anjuliya bakuyeereŋo ba bukaanunku leeyaŋaŋo. Immi anwocálahineh bakodiŋo maŋ na a buteerehu Jaameŋo Adénno.

¹⁵ Yensa bafégi h'aŋŋane bukaano, jifahánam anuy k’adooh ñankindo k'akaan sihonj k'atibaareeniŋ na ingi saahaŋankánin ingi ahayankánin nip. Ñanwocálahinku bakodiŋo mungu, Yensa afooŋulfooŋul taabálankinin ingi bakodiŋo nip.

¹⁶ Adék ayéj ñanjuliyahu bakuyeereŋo: - Kengereŋ nanka! Fúteŋ nanka ingi bakuyeerenkinan nip! Dahu udoohoŋ díku Bááhum ukaanaŋ kanjuliyah!

¹⁷ Angu, ñantaalibehinem banfégi ho Yensa akanne, anlentála ho anabiyoŋo añaañne a Hañaañeno. Añañaañ ayéj: Díino! Bupoko b'ipokunne díken, awusunawusuna bikino. Bupoko búmár adak abujhunum. Nim gañaañne.

¹⁸ Angu ñanlaameku Ñanyahudo, banfégi ho Yensa akanne, andak ammiihem anyéjem: - Fi nuko! A gubaarhu horaŋ gutibaarunkunehne ñanjuliyaŋo nanka a Jaameŋo Adénno? Inini, kandut mint tamaseer n’épájulorunkuneminne maro uyikyik sembe k’utibaar ñanjuliyaŋo nanka!

¹⁹ Yensa aŋoyindeeniŋ ayéjeeniŋ: - Inini, filiireŋ jaameŋo inno! Ufiliyeŋdir mees, unahamuŋ ásibaŋ alallaŋ k’ikengun adúk.

²⁰ Immereŋ anyéjem: - Ingah! Jaameŋo inno n’íloduminne buruhu díineŋ jamaŋinak ingi amákilaŋ ingi amánduk (46), f’úduk úyej úlodhuneh jaameŋo inno buruhu ásibaŋ alallaŋ bareŋ!

²¹ Agida Yensa, f'alóbne nim ni immereŋ pájiireŋeŋ maro funaare galóbne a gubaarhu arinkinem ingi jankenghinem a biniiroŋo.

²² Da Díino akenguntemne a biniiroŋo, ñantaalibehinem anlentála k'andóm ho Yensa alóbumne. Te anfak anfaŋunum n'anfiyum Hañaañeno.

²³ Angu, a gújuŋo g’ayéjuhne Gújunku Guwusunaamo, Yensa gakaanakaan tamaseereŋo Jerusalem. Ñanlabahi banfégi tamaseereŋo nómáráŋ, anfiyumem a gubaarhu hómár.

²⁴ Kanda Yensa mumum fiyundeeniŋ maro apájuleeniŋpájul arenn fet.

²⁵ Jadaŋ k'amiih wúur maro moŋon moŋon Yensa apápájul h'agune a hafithinem.